ማቴዎስ 7 FHB Father's Heart Bible™

7 ¹“ምእንቲ ኸይፍረደኩም፥ ኣይትፍረዱ። ²በቲ እትፈርድዎ ፍርዲ ኽትፍረዱ ኢኹም፤ በቲ እትዕቅኑሉ መዐቀኒ ድማ ክትዕቀኑ ኢኹም እሞ። ³ስለ ምንታይ ነቲ ኣብ ዓይኒ ሓውካ ዘሎ በሰር ትጥምት፥ ነቲ ኣብ ዓይንኻ ዘሎ ጒንዲ ግና ኣይተስተብህሎን? ⁴ወይ ኣብ ዓይንኻ ጒንዲ እንተሎ፥ ንሓውካ ከመይ ኢልካ ‘እቲ በሰር ካብ ዓይንኻ ከውፅኣልካ ሕደገኒ’ ክትብሎ ትኽእል? ⁵ኣታ ግቡዝ፥ ቅድም ነቲ ኣብ ዓይንኻ ዘሎ ጒንዲ ኣውፅእ፤ ሽዑ ነቲ ኣብ ዓይኒ ሓውካ ዘሎ በሰር ከተውፅእ ኣፀቢቕካ ክትርኢ ኢኻ።

⁶“ነቲ ቅዱስ ንኣኽላባት ኣይትሃብዎ፤ ኣዕናቝኹም ከዓ ኣብ ቅድሚ ሓሰማታት ኣይትደርብዩ፤ ብኣእጋሮም ረጊፆም ከይረግፅዎም፥ ተመሊሶም ድማ ከይሰላልዑኹም።

ኣቦ ነቶም ዝልምኑ ይህብ

⁷“ለምኑ፥ ክትቕበሉ ኢኹም፤ ድለዩ፥ ክትረኽቡ ኢኹም፤ ኳሕኵሑ፥ ክኽፈተልኩም እዩ። ⁸ኵሉ ዝልምን ይቕበል፥ ዝደሊ ድማ ይረክብ፥ ንዝዃሕዅሐ ኸዓ ይኽፈተሉ እዩ እሞ። ⁹ካባኻትኩምከ እንታዋይ ሰብ እዩ፥ ወዱ እንጀራ እንተ ለመኖ፥ እምኒ ዝህቦ? ¹⁰ወይ ዓሳ እንተ ለመኖ፥ ተመን ዝህቦ? ¹¹እምበኣር ንስኻትኩም ክፉኣት ክነስኹም፥ ንደቅኹም ፅቡቕ ህያብ ምሃብ እንተ ፈሊጥኩም፥ እቲ ኣብ ሰማይ ዘሎ ኣቦኻትኩም ነቶም ዝልምንዎ ፅቡቕ ነገር ክንደየናይ ኣብዚሑ ዘይህቦም!

¹²“ስለዙይ ኵሉ እቲ ሰባት ንኣኻትኩም ክገብሩልኩም እትደልይዎ፥ ንስኻትኩም እውን ከምኡ ግበሩሎም፤ ሕግን ነብያትን እዚ እዩ እሞ።

¹³“በቲ ፀቢብ ደገ እተዉ፤ እቲ ናብ ጥፍኣት ዘምርሕ ደገ ሰፊሕ፥ መንገዱ ድማ ገፊሕ እዩ እሞ፥ ብእኡ ዝኣትዉ ኸዓ ብዙሓት እዮም። ¹⁴እቲ ናብ ህይወት ዘብፅሕ ደገ ግና ፀቢብ፥ መንገዱ እውን ፀቢብ እዩ፤ ዝረኽብዎ ድማ ውሑዳት እዮም።

ብፍሬኦም ይልለዩ

¹⁵“ካብ ነብያት ሓሰት ተጠንቀቑ፤ ንሳቶም ናባኻትኩም ብኽዳን ኣባጊዕ ይመፁ፥ ብውሽጦም ግና መንጠልቲ ተዃሉ እዮም። ¹⁶ብፍሬኦም ከተለልይዎም ኢኹም። ካብ እሾዅዶ ወይኒ ይእከብ፥ ወይ ካብ ኣሜከላ በለስ? ¹⁷ከምኡ ድማ ኵሉ ፅቡቕ ኦም ፅቡቕ ፍረ ይፈሪ፥ እቲ ሕማቕ ኦም ግና ሕማቕ ፍረ ይፈሪ። ¹⁸ፅቡቕ ኦም ሕማቕ ፍረ ክፈሪ ኣይኽእልን፥ ሕማቕ ኦምውን ፅቡቕ ፍረ ክፈሪ ኣይኽእልን እዩ። ¹⁹ፅቡቕ ፍረ ዘይፈሪ ኵሉ ኦም ይቝረፅ፤ ናብ ሓዊውን ይድርበ። ²⁰እምበኣርከስ ብፍሬኦም ከተለልይዎም ኢኹም።

ፍቓድ ኣቦ ዝገብሩ ጥራሕ

²¹“ኵሉ እቲ ‘ጐይታይ፥ ጐይታይ’ ዝብለኒ ናብ መንግስቲ ኣቦና ኣይኣቱን እዩ፤ እቲ ፍቓድ እቲ ኣብ ሰማይ ዘሎ ኣቦይ ዝገብር ደኣ እምበር። ²²በታ መዓልቲ እቲኣ ብዙሓት ‘ጐይታይ፥ ጐይታይ፥ ብስምካዶ ኣይተነበናን፥ ብስምካ ኣጋንንቲ ኣይኣውፃእናን፥ ብስምካ ብዙሕ ተኣምራት ኣይገበርናን?’ ክብሉኒ እዮም። ²³ሽዑ ኣነ ‘ከቶ ኣይፈለጥኩኹምን፤ ኣቱም ገበርቲ ዓመፅ፥ ካባይ ርሓቑ’ ኢለ ኣግሂደ ኽነግሮም እየ።

ኣብ ከውሒ ትከል

²⁴“እምበኣር ነዝ ቃላተይ እዙይ ሰሚዑ ዝገብሮ ኵሉ፥ ነቲ ቤቱ ኣብ ከውሒ ዝሰርሐ ለባም ሰብኣይ ይመስል። ²⁵ዝናም ወረደ፥ ውሒዝ መፀ፥ ንፋሳት ነፊሶም ነታ ቤት እቲኣ ሃረምዋ፤ ኣብ ከውሒ ተሰሪሓ ስለ ዝነበረት ግና ኣይወደቐትን። ²⁶ነዝ ቃላተይ እዙይ ሰሚዑ ዘይገብሮ ኵሉ ኸዓ፥ ነቲ ቤቱ ኣብ ሑፃ ዝሰርሐ ዓሻ ሰብኣይ ይመስል። ²⁷ዝናም ወረደ፥ ውሒዝ መፀ፥ ንፋሳት ነፊሶም ነታ ቤት እቲኣ ወቕዕዋ፤ ወደቐት ድማ፤ ውድቀታ ኸዓ ዓብዪ ነበረ።”

²⁸ኢየሱስ ነዝ ቃላት እዙይ ተዛሪቡ ምስ ወድአ፥ እቶም ህዝቢ ብትምህርቱ ተገረሙ፤ ²⁹ከምቶም መምህራን ሕጎም ዘይኮነስ፥ ከም በዓል ስልጣን ይምህሮም ስለ ዝነበረ እዩ።