மத்தேயு 7

7 ¹“தீர்ப்பிடாதிருங்கள், அப்பொழுது நீங்களும் தீர்ப்பிடப்படமாட்டீர்கள். ²ஏனெனில் நீங்கள் எந்தத் தீர்ப்பினால் தீர்ப்பிடுகிறீர்களோ, அந்தத் தீர்ப்பினாலேயே நீங்களும் தீர்ப்பிடப்படுவீர்கள்; எந்த அளவினால் அளக்கிறீர்களோ, அந்த அளவினாலேயே உங்களுக்கும் அளக்கப்படும். ³உன் கண்ணிலிருக்கிற உத்திரத்தைக் கவனியாமல், உன் சகோதரன் கண்ணிலிருக்கிற துரும்பை ஏன் பார்க்கிறாய்? ⁴அல்லது, உன் கண்ணிலே உத்திரம் இருக்கும்போது, ‘உன் கண்ணிலிருக்கிற துரும்பை நான் எடுத்துவிடுகிறேன்’ என்று உன் சகோதரனிடம் எப்படிச் சொல்லுவாய்? ⁵மாயக்காரனே, முதலில் உன் கண்ணிலிருக்கிற உத்திரத்தை எடுத்துப்போடு; அப்பொழுது உன் சகோதரன் கண்ணிலிருக்கிற துரும்பை எடுத்துப்போட தெளிவாய்ப் பார்ப்பாய்.

⁶“பரிசுத்தமானதை நாய்களுக்குக் கொடாதேயுங்கள்; உங்கள் முத்துக்களைப் பன்றிகளுக்கு முன்பாகப் போடாதேயுங்கள்; போட்டால் அவைகளைத் தங்கள் கால்களால் மிதித்து, திரும்பி உங்களைப் பீறிப்போடும்.

கேட்கிறவர்களுக்குப் பிதா கொடுக்கிறார்

⁷“கேளுங்கள், அப்பொழுது உங்களுக்குக் கொடுக்கப்படும்; தேடுங்கள், அப்பொழுது கண்டடைவீர்கள்; தட்டுங்கள், அப்பொழுது உங்களுக்குத் திறக்கப்படும். ⁸ஏனெனில் கேட்கிற எவனும் பெற்றுக்கொள்ளுகிறான்; தேடுகிறவன் கண்டடைகிறான்; தட்டுகிறவனுக்குத் திறக்கப்படும். ⁹உங்களில் எந்த மனிதனாவது, தன் மகன் அப்பம் கேட்டால் அவனுக்குக் கல்லைக் கொடுப்பானா? ¹⁰அல்லது மீன் கேட்டால் அவனுக்குப் பாம்பைக் கொடுப்பானா? ¹¹பொல்லாதவர்களாகிய நீங்களே உங்கள் பிள்ளைகளுக்கு நல்ல ஈவுகளைக் கொடுக்க அறிந்திருந்தால், பரலோகத்திலிருக்கிற உங்கள் பிதா தம்மிடத்தில் கேட்கிறவர்களுக்கு நன்மையானவைகளை எத்தனை அதிகமாய்க் கொடுப்பார்!

¹²“ஆகையால், மனிதர் உங்களுக்கு எப்படிச் செய்யவேண்டுமென்று விரும்புகிறீர்களோ, அப்படியே நீங்களும் அவர்களுக்குச் செய்யுங்கள்; இதுவே நியாயப்பிரமாணமும் தீர்க்கதரிசன வாக்கியங்களுமாம்.

¹³“இடுக்கமான வாசல்வழியாய் உட்பிரவேசியுங்கள்; ஏனெனில் அழிவுக்குப் போகிற வாசல் விரிவும், வழி விசாலமுமாயிருக்கிறது; அதின்வழியாய்ப் பிரவேசிக்கிறவர்கள் அநேகர். ¹⁴ஆனால் ஜீவனுக்குப் போகிற வாசல் இடுக்கமும், வழி நெருக்கமுமாயிருக்கிறது; அதைக் கண்டுபிடிக்கிறவர்கள் சிலரே.

அவைகளின் கனியினால் அறியப்படும்

¹⁵“கள்ளத் தீர்க்கதரிசிகளுக்கு எச்சரிக்கையாயிருங்கள்; அவர்கள் ஆட்டுத்தோலைப் போர்த்துக்கொண்டு உங்களிடம் வருகிறார்கள், உள்ளேயோ அவர்கள் பட்சிக்கிற ஓநாய்கள். ¹⁶அவர்களுடைய கனிகளினால் அவர்களை அறிந்துகொள்வீர்கள். முள்ளுச்செடிகளில் திராட்சப்பழங்களையும், முட்செடிகளில் அத்திப்பழங்களையும் சேர்க்கிறார்களா? ¹⁷அப்படியே நல்ல மரமெல்லாம் நல்ல கனி கொடுக்கும், கெட்ட மரமோ கெட்ட கனி கொடுக்கும். ¹⁸நல்ல மரம் கெட்ட கனி கொடுக்கமாட்டாது, கெட்ட மரம் நல்ல கனி கொடுக்கமாட்டாது. ¹⁹நல்ல கனி கொடாத மரமெல்லாம் வெட்டப்பட்டு அக்கினியிலே போடப்படும். ²⁰ஆகையால், அவர்களுடைய கனிகளினால் அவர்களை அறிந்துகொள்வீர்கள்.

பிதாவின் சித்தத்தின்படி செய்கிறவர்கள் மாத்திரமே

²¹“என்னை நோக்கி, ‘ஆண்டவரே, ஆண்டவரே’ என்று சொல்லுகிறவன் எவனும் அல்ல, பரலோகத்திலிருக்கிற என் பிதாவின் சித்தத்தின்படி செய்கிறவனே எங்கள் பிதாவின் ராஜ்யத்தில் பிரவேசிப்பான். ²²அந்நாளிலே அநேகர் என்னை நோக்கி, ‘ஆண்டவரே, ஆண்டவரே, உம்முடைய நாமத்தினாலே தீர்க்கதரிசனம் சொல்லவில்லையா? உம்முடைய நாமத்தினாலே பிசாசுகளைத் துரத்தவில்லையா? உம்முடைய நாமத்தினாலே அநேக அற்புதங்களைச் செய்யவில்லையா?’ என்பார்கள். ²³அப்பொழுது நான் அவர்களை நோக்கி, ‘நான் ஒருபோதும் உங்களை அறியேன்; அக்கிரமச் செய்கைக்காரர்களே, என்னைவிட்டு அகன்றுபோங்கள்’ என்று வெளிப்படையாய்ச் சொல்லுவேன்.

கன்மலையின்மேல் கட்டுங்கள்

²⁴“ஆகையால், என்னுடைய இந்த வார்த்தைகளைக் கேட்டு, அவைகளின்படி செய்கிறவன் எவனும், கன்மலையின்மேல் தன் வீட்டைக் கட்டின புத்திமானாகிய மனிதனுக்கு ஒப்பாயிருப்பான். ²⁵மழை பெய்தது, வெள்ளம் வந்தது, காற்று அடித்து அந்த வீட்டின்மேல் மோதியது; ஆனாலும் அது கன்மலையின்மேல் அஸ்திபாரம் போடப்பட்டிருந்தபடியால் விழவில்லை. ²⁶என்னுடைய இந்த வார்த்தைகளைக் கேட்டும் அவைகளின்படி செய்யாதிருக்கிறவன் எவனும், மணலின்மேல் தன் வீட்டைக் கட்டின புத்தியீனனாகிய மனிதனுக்கு ஒப்பாயிருப்பான். ²⁷மழை பெய்தது, வெள்ளம் வந்தது, காற்று அடித்து அந்த வீட்டின்மேல் மோதியது; அது விழுந்தது; விழுந்த விழுகையும் பெரிதாயிருந்தது.”

²⁸இயேசு இந்த வார்த்தைகளைச் சொல்லி முடித்தபோது, ஜனங்கள் அவருடைய போதகத்தைக் குறித்து ஆச்சரியப்பட்டார்கள்; ²⁹ஏனெனில், அவர்களுடைய வேதபாரகர்களைப்போல அல்ல, அதிகாரமுடையவராகவே அவர் அவர்களுக்குப் போதித்தார்.