Irwoogigei Inyee Tai
Isto temeet ne mi kondang'ung' inyee kotom itwae kiit ne ming'in ne mi kondap tupcheng'ung'. Soom, si kigoochin. Rwookyi kaneetik eng' logoekwak. Yeityo ng'olyoot ne nyigis: ye imwae, ‘Kiptaiyat, Kiptaiyat,’ ak agot koyai kimnatosyek, ko ma uu koyai mageetap Kwandanyo.
7 1“Ameirwook, si ma kiirwookok. 2Amu kiirwookok eng' kirwooget ne oirwoogen okweek, ak kiikwaawok eng' kakwaet ne oikwaawen. 3Amu nee si igeer kiit ne ming'in ne mi kondap tupcheng'ung', ago ma igeer temeet ne mi kondang'ung' inyee? 4Anan imuuchi ano ileenji tupcheng'ung', ‘Yan aiste kiit ne ming'in eng' kondang'ung',’ ye mi temeet eng' kondang'ung' inyee? 5Koikokeindet, isto tai temeet ne mi kondang'ung' inyee; yeityo igeer komyee si isto kiit ne ming'in ne mi kondap tupcheng'ung'.
6“Amogoochi sesenik kiit ne tiliil, amewiir sonoikuk eng' taitap toorook; si malipil icheek eng' keelyekwak, koweigei ak kobar okweek.
Koonu Kwanda Che Soomei
7“Osoom, si otaach; ocheeng', si onyooru; ogonygony, si keyatwok. 8Amu age tugul ne soomei kotaachei; ak ne cheeng'ei konyooru; ak ne igonygonyi keyatyin. 9Anan ng'oo chiito eng' okweek, ne ngo soom weeriinnyi magatyat, ko tos igoochi koita? 10Anan ye soomei njiryot, ko igoochi ereneet? 11Nooto anyun, ngot okweek che ya, ongen ogoochi lagoguk kagoochinoik che myachen, ko kisiir ano Kwandang'wong' ne po kipsengwet koonu tuguuk che myachen che soomei ineendet?
12“Nooto anyun, eng' tuguuk tugul, oyachi piik ko uu ye omache koyachinok okweek; amu niito ko Ng'atuutyet ak Maotik.
13“Ochut eng' kurgeet ne mariich, amu oo kurgeet, ak paraa ooreet, ne wei ole mi yoketyet, ak chaang' che chutei eng' ineendet. 14Ago mariich kurgeet, ak mariich ooreet, ne wei ole mi saboondo; ng'ering' che nyoorunee.
Kinai Eng' Logoekwak
15“Oriibegei maotik che lembenik: nyoonjinok ko ngoroigap keechiirek, ago ko suik che tonisyei eng' oeng'wak. 16Onai icheek eng' logoekwak. Tos keyumei sabibuk eng' katook, anan mogoonik eng' ng'ootweek? 17Ko uu nooto, keetit age tugul ne myee koiyei logoek che myachen, ago keetit ne ya koiyei logoek che ya. 18Mamuuchi keetit ne myee koiyei logoek che ya, ak mamuuchi keetit ne ya koiyei logoek che myachen. 19Keetit age tugul ne ma iyoei logoek che myachen ko kiebei ak kewiirchi maat. 20Nooto anyun, onai icheek eng' logoekwak.
Kityo Che Yaei Mogutyetap Kwanda
21“Ma age tugul ne leenjiwa, ‘Kiptaiyat, Kiptaiyat,’ ne chutei laitornatetap Kwandanyo, ago ineendet ne yaei mogutyetap Abba ne mi kipsengwet. 22Chaang' che leenjiwa eng' peetuunooto, ‘Kiptaiyat, Kiptaiyat, tos ma kiamaoti eng' kaineng'ung', ak keoone oik eng' kaineng'ung', ak keyai poisyonik che oo che chaang' eng' kaineng'ung'?’ 23Yeityo amwachi icheek imanda, ‘Ki ma anai okweek kogeny; oistoegei anee, okweek che tiye ng'atuutyet.’
Teech Eng' Koito
24“Nooto anyun, age tugul ne kasei ng'aleechu che anee ak koyai icheek, koegu ko uu chiito ne utaatyet ne ki koteech koonnyi eng' koito. 25Ki but ropta, kobwa peek che oo, ak ki iut usoonaik kobir koonooto, ago ma kibut, amu ki kigimit eng' koito. 26Ak age tugul ne kasei ng'aleechu che anee ak ma koyai icheek, koegu ko uu chiito ne perber ne ki koteech koonnyi eng' ng'aniek. 27Ki but ropta, kobwa peek che oo, ak ki iut usoonaik kobir koonooto, ak kibut—ak ki oo butetanyi.”
28Ye kingo kagobata Jeso komwa ng'aleechu, ki kwong'yo tuiyosyek eng' kaneetisyennyi, 29amu ki ineeti icheek ko uu chii ne tinyei kimnateet, ama ko uu siriikwak.