Soobei eng' Tonyossennyi
Twae Jeso mogondosaik, konyooru kayaneet ne oo eng' koitetap pogolap Roma ne ki ma anyooru eng' Israel, koiimji chii ne machei koosup ineendet kole mami ole imuuch korue, kosilen kipchurchuryet ne ki kigeen kasubikyik kole igesandech, ak kowal murenik aeng' che ya. Yeityo kosoomei nganaseet komugul si kowo.
8 1Kingo choorgei eng' tulweet, ko koosup tuiyosyek che chaang'. 2Ki nyoonji chii ne tinyei mogondosaik, ak kogutunyi eng' tainnyi, koleenji, “Kiptaiyat, ngot icham, imuuchi itiliilo.”
3Ki iyogoito Jeso eunnyi ak kotwae ineendet, koleenji, “Acham; itiliilit.” Eng' yooto kogisaapcho mogondosaikyik. 4Ki leenji Jeso ineendet, “Mat imwachi chii age tugul, ago ui iboorchigei tisiindet ak ikony kagoochinet ne ki ng'at Musa, koek paorunet eng' icheek.”
Kayanet ne Ki Kwong'ei Jeso
5Kingo wo Kapernaum, konyoonji koitetap pogol, kosoomei, 6koleenji, “Kiptaiyat, rui otwogindennyu gaa komeiyot poorwek, konyalilit miising'.”
7Ki leenji ineendet, “Anyonu ak asoop ineendet.”
8Kowolji koitetap pogol koleenji, “Kiptaiyat, ma anyoljino si inyo oriit kaanyu; imwa kityo ng'olyoot, ak kosoobi otwogindennyu. 9Amu anee ko aa chiito ne mi let ne po kimnateet, atinye asigarik che mi let anyo. Aleenji age, ‘Ui,’ ko wendi; ak age, ‘Nyoo,’ ko nyo; ak otwogindennyu, ‘Yai ni,’ ko yaei.”
10Kingo kas Jeso niito, ko kikwong'yo ak koleenji che ki isubu, “Iman, amwaiwok, ma anyooru chii age eng' Israel ne tinyei kayaneet ne ou ni. 11Amwaiwok, che chaang' che tuun kopunu eng' kong'asiis ak eng' tagiirwet, ak kotebee kobooto Abraham, Isak, ak Jakobo eng' laitornatetap Kwandanyo, 12ago lagogap laitornatet ko kiwiirtoi koba kutunyit ne saang', ole mi riirek ak ng'wasetap kelek.” 13Ki leenji Jeso koitetap pogol, “Ui, ingoyaak ko uu ye kiyan.” Ak kisoop otwogindennyi eng' sainooto.
Isoobei Jeso eng' Kootap Petero
14Kingo wo Jeso kootap Petero, kogeer kametap kwondap Petero koru kolalee maat. 15Ki twaei eunnyi, kogisaapcho maat, ak kong'eet ak koboisyechi ineendet. 16Kingo ek koskoleny, kimutyi che chaang' che ki tinyei oik; koon oichooto eng' ng'olyoot ak kosoop tugul che myandos. 17Ki kosulda niito ng'olyoot ne ki mwa maotindet Isaiah, koleen, “Ki inam weeng'enikyok ak koip myanwogikyok.”
Kerichotap Kosubu Jeso
18Kingo keer Jeso tuiyet ne ki koleelgei ineendet, kong'at icheek kolanda koba murot age. 19Ak ki nyoonji siriindet age ak koleenji, “Kaneetindet, asubun ole tugul ne iwe.”
20Ki leenji Jeso ineendet, “Tinyei lelwek keriingonik ak tinyei taritiigap kipsengwet susweek, ago Weeriitap chii ko ma tinyei ole koru metinnyi.”
21Ki leenji age eng' kasubik ineendet, “Kiptaiyat, chamwo tai awe atup kwandanyu.”
22Ago ki leenji Jeso ineendet, “Isubwo, ak ipagakta che kobek koitup che kobek.”
Siise Jeso Yumeet
23Kingo lany Jeso moinget, ko koosup kasubikyik. 24Ki ng'eetyo yumeet ne oo eng' nyanjet, kot koyiem peek moinget; ago koru ineendet. 25Ki pwa anyun kong'eetindoi ineendet, koleenji, “Kiptaiyat, isarwech! Kemei!”
26Ki leenji icheek, “Amu nee oiywei, okweek che kayaneet ne ming'in?” Yeityo kong'eet ak kokergong' yumeet ak nyanjet, ak kosiis nyanjet miising'.
27Ki kwong'yo piik, koleenji, “Ko chiito ne ou nee ni, kot koepchi iit yumeet ak nyanjet?”
Toorei Weeriitap Kwanda Kutunyit
28Kingo kagolanda koba murot age, eng' komoswegap Gadareenik, komong'u pik aeng' che tinyei oik eng' kereeriisyek kobwa ole mi ineendet; ki koroom miising' kot koma muuchi chii koba ooreenooto. 29Kiwaach koleenji, “Ketinye nee inyee ak acheek, Weeriitap Kamuktaindet? Kainyonu yu si igengeniech kotom koit sait?” 30Ki mi lugosyegap toorook che chaang' koamei eng' ole loo kitigin eng' icheek. 31Ak ki soomei oik koleenji, “Ngot ioonech, iyooktech kebo lugosyegap toorook.”
32Ki leenji icheek, “Owe.” Komong'u ak koba toorook, ak kolabat lugosyet komugul kochoorgei eng' korureet koba nyanjet ak kome eng' peek.
33Ki waakyo riibiik koba nganaseet ak komwa tugul, kobooto ne ki konyolji pichooto che ki tinyei oik. 34Komong'u nganaseet komugul kobwa ole mi Jeso; kingo keer ineendet, kosoomei koistoegei eng' komoswekwak.