Matthew 8

8 ¹Ana kaphungwui eina tā tharan, mi kachungkhana ali shurrai. ²Phārrei kakazā akha rāda, awui mangāli khuktizanglaga, "Amei, nana phaningmiakha, ili tharngasakshapra" da hānga.

³Jishuna apāng khangkāda ali sāza̱da hānga, "Ina phaningmina; tharchaolu." Ngalāngda awui khangaphār chi phāhaowa. ⁴Jishuna ali hānga, "Mi akhala mahānglu, kha vāda nakhalatta pāngmonli chitheilu kala athumwui vang shākhi sākhavai Mosesna kaso kahai lemmet chi chigatlu."

Jishuli Matakhakhai Shitkasang

⁵Ana Capernaumli azang tharan, shipai akhavā akhana awuili rāda, ali ngachonmida, ⁶hithāda hānga, "Proho, iwui rao shimli sheikasha̱da pisai, panglāk eina kakhanang mina."

⁷Ana ali hānga, "Ina rāda ali raimira."

⁸Shipai akhavā china ngahānkai, "Proho, nali iwui shimli rāzang ngasaki kaji ina makanāmana; tui maningla hānglu, kala iwui rao raihaora. ⁹Kaja ila akhavā akhawui azingli khalei mina, kala iwui azingli shipaibing lei. Ina kachikathā akhali 'Vālu' da kahāngna, ava vaira; khangatei akhali 'Rālu' da kahāngna, ava raira; iwui raoli 'Hi sālu' da kahāngna, ava sara."

¹⁰Chi kashā tharan, Jishuna matakhakhaoda athi kashurbingli hānga, "Kachangkhat eina ina nathumli kahāngna, Israelli chikathā shitkasang khalei mi akhala matheithuwa. ¹¹Nathumli ina kahāngna, zingsho kala zingtunwui eina mi kachung rāra, kala Abraham, Isaac kala Jacob peichaoda ithumwui Avā wungramli phazāli ngasora, ¹²kha wungram naomayarabing chili tangkhamang ayarli horshokhaora; apam chili mina ahā tarira kala kachap chapra." ¹³Jishuna shipai akhavāli hānga, "Vālu, nana shitsang kahai thada nawuili vaimiranu." Atam chichang chili awui rao raihaowa.

Jishuna Peterwui Shimli Raimi

¹⁴Jishuna Peterwui shimli azang tharan, Peterwui aniva̱ kharurda petli pisai kaji thei. ¹⁵Ana apāng sāza̱ tharan, awui kakharur phāhaowa, kala ana ngakarthuida ali otram ngatha̱mi. ¹⁶Chithang ngazin athumna kameo zangkasa mi kachungkha awuili khuirai; ana tui akha eina manglābing chi kashamshoka kala kakazā saikorali raimi. ¹⁷Hi Isaiah marānna hāngkahai tui chi ungshunghaowa: "Ana ithumwui khangazan khuihaowa, kala ithumwui kazāt phungkai."

Jishu Thishurkiwui Aman

¹⁸Jishuna awui kuimareida mi kachungkha theilaga, athumli lakhavāk kānkā khavai kasoi. ¹⁹Kala kapime akhana ali rāhānga, "Ojā, nana vāki apam kachidala ina nali shurra."

²⁰Jishuna ali hānga, "Ramfala akhur lei, khamasaili vānaobing athip lei, kha miwui Naomayara chiva awui ngayaizang ngasāmkhui khavaipam maleimana."

²¹Sākhangatha̱bingwui ngachaili khangatei akhana ali hānga, "Proho, rida ishāvāli ungchifahaifaga."

²²Kha Jishuna ali hānga, "Ithi shurlu, kala thikahaibingli athumwui thikahaibing chifahai khavai nothāhaolu."

Jishuna Siphan Zingrot Chingrihai Ngasaka

²³Ana marikhongli kātonglaga, awui sākhangatha̱bingna ali shurthuwa. ²⁴Kala yanglu, shamadruli siphan zingrot kahakva̱ akha shokhaowa, chithākha khangaphaona marikhong chi khaluiphinhaowa. Kha ana pisai. ²⁵Chieina athumna ali mathotkhuilaga hānga, "Proho, ithumli huimilu! Ithum thihaoki jiura!"

²⁶Ana athumli hānga, "Khisāda nathum ngacheekhala, shitkasang kateobing?" Chieina ana ngakarthuida masi kala shamadru chili kahara, kala chingrihai kahakva̱ akha shokhaowa.

²⁷Mibing matakhakhaida hānga, "Hi kachikathā mikhala? Masinala shamadrunala awui kahāng khanganākhala?"

Avāwui Naomayarana Tangkhamang Phongmi

²⁸Ana lakhavāk kānkāda Gadarenebingwui ngaleili vā tharan, kameo kazanga mi khani chikhurwui eina shoklaga ali samphang khavai rāngaroka; ani tara̱ sākashe sākahaiwui vang, khipānakha chi shongfa eina mangaruivārarmana. ²⁹Anina panglāk eina vaoda hānga, "Varewui Naomayara, nana inili khi sāki kajikhala? Atam mahungda inili rekharekmi khavai hili rārala?" ³⁰Atam chitharan athumwui eina khalāda hok ashangva̱ akha phazāzatsai. ³¹Chieina kameobing china ali poi, "Nana ithumli kashamshok jiakha, hok ashangva̱ chili ithumli chihovāhaolu."

³²Ana athumli hānga, "Vālu." Chieina athum shoklaga hokbing chili azanga, kala ashangva̱ katonga chi amai tarenli yongkachup tāda shamadruli tāzangda tara̱li hikthatserhaowa.

³³Hok kahombing china ngasamungda keinungli vālaga, shokkahai saikora kala kameo kazanga mi khanili khi shokkahai kaji chila unghāngchithei. ³⁴Keinung katonga chi Jishuli samphang khavai shokvai; ali theilaga, athumwui aramwui eina zatthuimihai khavai ali poi.