ମାଥିଉ 8 FHB Father's Heart Bible™

8 ¹ସେ ପର୍ବତରୁ ଓହ୍ଲାଇ ଆସନ୍ତେ, ବହୁସଂଖ୍ୟକ ଲୋକ ତାହାଙ୍କ ପଛେ ପଛେ ଗଲେ। ²ଆଉ ଦେଖ, ଜଣେ କୁଷ୍ଠରୋଗୀ ତାହାଙ୍କ ନିକଟକୁ ଆସି ତାହାଙ୍କ ସମ୍ମୁଖରେ ଆଣ୍ଠୁମାଡ଼ି ପଡ଼ି କହିଲା, “ହେ ପ୍ରଭୁ, ଯଦି ଆପଣ ଇଚ୍ଛା କରନ୍ତି, ତେବେ ମୋତେ ଶୁଚି କରିପାରନ୍ତି।”

³ସେଥିରେ ଯୀଶୁ ଆପଣା ହସ୍ତ ବିସ୍ତାର କରି ତାହାକୁ ସ୍ପର୍ଶ କରି କହିଲେ, “ମୁଁ ଇଚ୍ଛା କରୁଅଛି; ଶୁଚି ହୁଅ।” ସେତିକ୍ଷଣି ତାହାର କୁଷ୍ଠରୋଗ ଦୂର ହୋଇଗଲା। ⁴ପୁଣି ଯୀଶୁ ତାହାକୁ କହିଲେ, “କାହାକୁ କୁହ ନାହିଁ, ମାତ୍ର ଯାଇ ଯାଜକ ନିକଟରେ ଆପଣାକୁ ଦେଖାଅ, ଆଉ ସେମାନଙ୍କ ନିକଟରେ ସାକ୍ଷ୍ୟ ଦେବା ନିମନ୍ତେ ମୋଶା ଯାହା ଆଜ୍ଞା ଦେଇଅଛନ୍ତି, ସେହି ନୈବେଦ୍ୟ ଉତ୍ସର୍ଗ କର।”

ଯୀଶୁଙ୍କୁ ଚମତ୍କୃତ କରିଥିବା ବିଶ୍ଵାସ

⁵ସେ କଫର୍ନାହୂମରେ ପ୍ରବେଶ କରନ୍ତେ, ଜଣେ ଶତସେନାପତି ତାହାଙ୍କ ନିକଟକୁ ଆସି ବିନତି କରି ⁶କହିଲା, “ହେ ପ୍ରଭୁ, ମୋହର ଦାସ ପକ୍ଷାଘାତ ରୋଗରେ ଗୃହରେ ପଡ଼ିଅଛି, ଅତ୍ୟନ୍ତ ଯନ୍ତ୍ରଣା ଭୋଗ କରୁଅଛି।”

⁷ଯୀଶୁ ତାହାକୁ କହିଲେ, “ମୁଁ ଯାଇ ତାହାକୁ ସୁସ୍ଥ କରିବି।”

⁸ଶତସେନାପତି ଉତ୍ତର ଦେଲା, “ହେ ପ୍ରଭୁ, ଆପଣ ଯେ ମୋʼ ଗୃହ ଭିତରକୁ ଆସିବେ, ଏଥିପାଇଁ ମୁଁ ଯୋଗ୍ୟ ନୁହେଁ; କେବଳ ବାକ୍ୟ କୁହନ୍ତୁ, ତାହାହେଲେ ମୋହର ଦାସ ସୁସ୍ଥ ହେବ। ⁹କାରଣ ମୁଁ ମଧ୍ୟ ଅଧୀନସ୍ଥ ଲୋକ, ଆଉ ମୋʼ ଅଧୀନରେ ସୈନ୍ୟମାନେ ଅଛନ୍ତି; ମୁଁ ଜଣକୁ ‘ଯାଅ’ ବୋଲି କହିଲେ ସେ ଯାଏ, ଆଉ ଜଣକୁ ‘ଆସ’ ବୋଲି କହିଲେ ସେ ଆସେ, ପୁଣି ମୋହର ଦାସକୁ ‘ଏହା କର’ ବୋଲି କହିଲେ ସେ ତାହା କରେ।”

¹⁰ଏହା ଶୁଣି ଯୀଶୁ ଚମତ୍କୃତ ହେଲେ ଓ ଆପଣା ଅନୁଗାମୀମାନଙ୍କୁ କହିଲେ, “ସତ୍ୟ ମୁଁ ତୁମ୍ଭମାନଙ୍କୁ କହୁଅଛି, ମୁଁ ଇସ୍ରାଏଲ ମଧ୍ୟରେ ଏପରି ବିଶ୍ଵାସ କାହା ଠାରେ ପାଇ ନାହିଁ। ¹¹ପୁଣି ମୁଁ ତୁମ୍ଭମାନଙ୍କୁ କହୁଅଛି, ଅନେକେ ପୂର୍ବ ଓ ପଶ୍ଚିମ ଦିଗରୁ ଆସି ଆମ୍ଭମାନଙ୍କ ପିତାଙ୍କ ରାଜ୍ୟରେ ଅବ୍ରହାମ, ଇସ୍‌ହାକ ଓ ଯାକୁବଙ୍କ ସହିତ ଭୋଜନରେ ବସିବେ, ¹²କିନ୍ତୁ ରାଜ୍ୟର ସନ୍ତାନମାନେ ବାହାରର ଅନ୍ଧକାରକୁ ନିକ୍ଷିପ୍ତ ହେବେ; ସେଠାରେ ରୋଦନ ଓ ଦନ୍ତର କିଡ଼ିମିଡ଼ି ହେବ।” ¹³ଆଉ ଯୀଶୁ ଶତସେନାପତିକୁ କହିଲେ, “ଯାଅ, ତୁମ୍ଭେ ଯେପରି ବିଶ୍ଵାସ କଲ, ସେପରି ତୁମ୍ଭ ପ୍ରତି ହେଉ।” ପୁଣି ସେହି ଦଣ୍ଡରେ ତାହାର ଦାସ ସୁସ୍ଥ ହେଲା।

ପିତରଙ୍କ ଗୃହରେ ଯୀଶୁ ସୁସ୍ଥ କରନ୍ତି

¹⁴ଯୀଶୁ ପିତରଙ୍କ ଗୃହରେ ପ୍ରବେଶ କରି, ପିତରଙ୍କ ଶାଶୂ ଜ୍ଵରରେ ଶଯ୍ୟାଗତ ହୋଇଥିବା ଦେଖିଲେ। ¹⁵ସେ ତାହାର ହସ୍ତ ସ୍ପର୍ଶ କରନ୍ତେ ତାହାର ଜ୍ଵର ଛାଡ଼ିଗଲା, ଆଉ ସେ ଉଠି ତାହାଙ୍କ ସେବା କଲା। ¹⁶ସନ୍ଧ୍ୟା ହୁଅନ୍ତେ ଲୋକମାନେ ଭୂତଗ୍ରସ୍ତ ଅନେକଙ୍କୁ ତାହାଙ୍କ ନିକଟକୁ ଆଣିଲେ; ପୁଣି ସେ ବାକ୍ୟ ଦ୍ଵାରା ଆତ୍ମାମାନଙ୍କୁ ବାହାର କରିଦେଲେ ଓ ପୀଡ଼ିତ ସମସ୍ତଙ୍କୁ ସୁସ୍ଥ କଲେ। ¹⁷ଏଥିରେ ଯିଶାଇୟ ଭାବବାଦୀଙ୍କ ଦ୍ଵାରା କଥିତ ଏହି ବାକ୍ୟ ସଫଳ ହେଲା, “ସେ ଆପେ ଆମ୍ଭମାନଙ୍କ ଦୁର୍ବଳତା ଗ୍ରହଣ କଲେ ଓ ଆମ୍ଭମାନଙ୍କ ରୋଗ ବହନ କଲେ।”

ଯୀଶୁଙ୍କ ଅନୁଗମନର ମୂଲ୍ୟ

¹⁸ଯୀଶୁ ଆପଣା ଚାରିଆଡ଼େ ଲୋକସମୂହ ଦେଖି, ଅପର ପାରିକୁ ଯିବା ନିମନ୍ତେ ଆଜ୍ଞା ଦେଲେ। ¹⁹ପୁଣି ଜଣେ ଶାସ୍ତ୍ରୀ ଆସି ତାହାଙ୍କୁ କହିଲା, “ହେ ଗୁରୁ, ଆପଣ ଯେକୌଣସି ସ୍ଥାନକୁ ଯିବେ, ମୁଁ ଆପଣଙ୍କ ଅନୁଗମନ କରିବି।”

²⁰ଯୀଶୁ ତାହାକୁ କହିଲେ, “କୋକିଶିଆଳିମାନଙ୍କର ଗାତ ଅଛି ଓ ଆକାଶର ପକ୍ଷୀମାନଙ୍କର ବସା ଅଛି, କିନ୍ତୁ ମନୁଷ୍ୟପୁତ୍ରଙ୍କର ମସ୍ତକ ରଖିବା ପାଇଁ ସ୍ଥାନ ନାହିଁ।”

²¹ଶିଷ୍ୟମାନଙ୍କ ମଧ୍ୟରୁ ଆଉ ଜଣେ ତାହାଙ୍କୁ କହିଲା, “ହେ ପ୍ରଭୁ, ମୋତେ ପ୍ରଥମେ ଯାଇ ମୋʼ ପିତାଙ୍କୁ କବର ଦେବାକୁ ଅନୁମତି ଦିଅନ୍ତୁ।”

²²କିନ୍ତୁ ଯୀଶୁ ତାହାକୁ କହିଲେ, “ମୋହର ଅନୁଗମନ କର, ଆଉ ମୃତମାନେ ଆପଣା ଆପଣା ମୃତମାନଙ୍କୁ କବର ଦେଉନ୍ତୁ।”

ଯୀଶୁ ଝଡ଼କୁ ଶାନ୍ତ କରନ୍ତି

²³ସେ ନୌକାରେ ଚଢ଼ନ୍ତେ, ତାହାଙ୍କ ଶିଷ୍ୟମାନେ ତାହାଙ୍କ ପଛେ ପଛେ ଗଲେ। ²⁴ଆଉ ହଠାତ୍ ସମୁଦ୍ରରେ ଏପରି ପ୍ରଚଣ୍ଡ ଝଡ଼ ଉଠିଲା ଯେ, ତରଙ୍ଗ ନୌକାକୁ ଆଚ୍ଛନ୍ନ କଲା; କିନ୍ତୁ ସେ ନିଦ୍ରିତ ଥିଲେ। ²⁵ସେଥିରେ ସେମାନେ ତାହାଙ୍କୁ ଜଗାଇ କହିଲେ, “ହେ ପ୍ରଭୁ, ଆମ୍ଭମାନଙ୍କୁ ରକ୍ଷା କରନ୍ତୁ, ଆମ୍ଭେମାନେ ମଲୁ।”

²⁶ସେ ସେମାନଙ୍କୁ କହିଲେ, “ହେ ଅଳ୍ପ ବିଶ୍ଵାସୀମାନେ, ତୁମ୍ଭେମାନେ କାହିଁକି ଭୀତ ହେଉଅଛ?” ତତ୍ପରେ ସେ ଉଠି ପବନ ଓ ସମୁଦ୍ରକୁ ଧମକ ଦେଲେ, ଆଉ ମହା ଶାନ୍ତି ହେଲା।

²⁷ସେଥିରେ ଲୋକମାନେ ଚମତ୍କୃତ ହୋଇ କହିଲେ, “ଏ କି ପ୍ରକାର ଲୋକ ଯେ, ପବନ ଓ ସମୁଦ୍ର ସୁଦ୍ଧା ଏହାଙ୍କ ଆଜ୍ଞା ମାନୁଅଛନ୍ତି?”

ପିତାଙ୍କ ପୁତ୍ର ଅନ୍ଧକାରର ସମ୍ମୁଖୀନ ହୁଅନ୍ତି

²⁸ସେ ଅପର ପାରିରେ ଗାଦରୀୟମାନଙ୍କ ଅଞ୍ଚଳରେ ଉପସ୍ଥିତ ହୁଅନ୍ତେ, ଦୁଇ ଜଣ ଭୂତଗ୍ରସ୍ତ ଲୋକ ସମାଧିସ୍ଥାନରୁ ବାହାରି ତାହାଙ୍କ ସଙ୍ଗେ ସାକ୍ଷାତ କଲେ; ସେମାନେ ଏପରି ପ୍ରଚଣ୍ଡ ଥିଲେ ଯେ, ସେହି ବାଟ ଦେଇ କେହି ଯାଇପାରୁ ନ ଥିଲେ। ²⁹ଆଉ ସେମାନେ ଚିତ୍କାର କରି କହିଲେ, “ହେ ଈଶ୍ଵରଙ୍କ ପୁତ୍ର, ଆପଣଙ୍କ ସଙ୍ଗେ ଆମ୍ଭମାନଙ୍କର କʼଣ ଅଛି? ଆପଣ କି ସମୟ ପୂର୍ବରୁ ଆମ୍ଭମାନଙ୍କୁ ଯନ୍ତ୍ରଣା ଦେବା ନିମନ୍ତେ ଏଠାକୁ ଆସିଅଛନ୍ତି?” ³⁰ସେହି ସମୟରେ ସେମାନଙ୍କଠାରୁ କିଛି ଦୂରରେ ଏକ ବୃହତ୍ ଘୁଷୁରିପଲ ଚରୁଥିଲା। ³¹ପୁଣି ଭୂତମାନେ ତାହାଙ୍କୁ ବିନତି କରି କହିଲେ, “ଯଦି ଆପଣ ଆମ୍ଭମାନଙ୍କୁ ବାହାର କରିଦେବେ, ତେବେ ସେହି ଘୁଷୁରିପଲ ଭିତରକୁ ଆମ୍ଭମାନଙ୍କୁ ପଠାଇ ଦିଅନ୍ତୁ।”

³²ସେ ସେମାନଙ୍କୁ କହିଲେ, “ଯାଅ।” ସେଥିରେ ସେମାନେ ବାହାରି ଘୁଷୁରିମାନଙ୍କ ଭିତରେ ପ୍ରବେଶ କଲେ; ଆଉ ସମସ୍ତ ଘୁଷୁରିପଲ ଗଡ଼ାଣିଆ ସ୍ଥାନରେ ଦୌଡ଼ି ଯାଇ ସମୁଦ୍ରରେ ପଡ଼ି ଜଳ ମଧ୍ୟରେ ମଲେ।

³³ସେଥିରେ ଘୁଷୁରିଚରାଳୀମାନେ ପଳାଇ ନଗରକୁ ଯାଇ ସମସ୍ତ ବୃତ୍ତାନ୍ତ, ପୁଣି ସେହି ଭୂତଗ୍ରସ୍ତ ଲୋକମାନଙ୍କ ପ୍ରତି ଯାହା ଯାହା ଘଟିଥିଲା, ସେହିସବୁ ଜଣାଇଲେ। ³⁴ଆଉ ସମଗ୍ର ନଗର ଯୀଶୁଙ୍କ ସଙ୍ଗେ ସାକ୍ଷାତ କରିବା ନିମନ୍ତେ ବାହାରିଆସିଲା; ପୁଣି ତାହାଙ୍କୁ ଦେଖି, ସେମାନେ ସେମାନଙ୍କ ସୀମାରୁ ପ୍ରସ୍ଥାନ କରିବା ନିମନ୍ତେ ତାହାଙ୍କୁ ବିନତି କଲେ।