نحمياه 1 FHB Father's Heart Bible™

1 ¹د حکلياه د زوئ نحمياه خبرې. د کسلو په مياشت کښې، په شلم کال کښې، زۀ د سوسن په قلعه کښې وم، ^a a v1 کسلو د عبرانى کليز نهمه مياشت وه، چې د نومبر د اخير نه د دسمبر پورې راځى.

²زما د وروڼو نه يو، حنانى، د يهوداه د څو سړيو سره راغلو. ما د هغو يهوديانو په حقله پوښتنه ترې وکړه چې ژوندى پاتې شوى وُو، څوک چې د جلاوطنۍ نه بچ شوى وُو، او د يروشلم په حقله هم. ³هغوئ راته ووئيل چې، ”هغه پاتونکى چې د اسيرۍ نه بچ شوى دى، هلته په صوبه کښې، په لوئے تکليف او بې‌عزتۍ کښې دى. د يروشلم ديوال نړېدلے دے، او د هغې دروازې په اور سوزېدلې دى.“

⁴کله چې ما دا خبرې واورېدلې، نو زۀ کښېناستم او وژړل، او څو ورځې مې ماتم وکړو، روژه مې ونيوله او زمونږ آسمانى پلار ته مې دُعا وکړه. ⁵ما ووئيل چې، اے په آسمان کښې زما پلاره، اے لوئے او هيبتناک خُدائ پاکه، چې له هغه چا سره چې تا سره مينه کوى او ستا حُکمونه ساتى، لوظ او وفاداره مينه ساتې، ⁶ستا غوږ دې متوجه وى او ستا سترګې دې خلاصې وى، ترڅو چې هغه دُعا واورې چې زۀ، ستا بنده، اوس ستا په حضور کښې، د شپې او ورځې، د اِسرائيل دپاره، چې ستا بندګان دى، کوم. او هغه ګناهونه منم چې مونږ اِسرائيليانو ستا په خلاف کړى دى. ما او زما د پلار کور ګناه کړې ده. ⁷مونږ ستا په خلاف ډېر بد کار کړے دے، او هغه حُکمونه، قانونونه او فېصلې مو ونۀ ساتلې چې تا خپل بنده موسىٰ ته حُکم کړى وو.

⁸مهرباني وکړه او هغه هدايت دې ياد کړه چې تا خپل بنده موسىٰ ته ورکړے وو چې، ”کۀ تاسو بې‌وفا شئ، نو زۀ به تاسو په قومونو کښې خواره کړم، ⁹خو کۀ تاسو ما ته راوګرځئ او زما حُکمونه وساتئ او پرې عمل وکړئ، نو اګر کۀ ستاسو جلاوطن شوى د آسمانونو تر وروستۍ څنډې پورې هم وى، زۀ به هغوئ له هغه ځائ نه راجمع کړم او هغه ځائ ته به يې راولم چې ما غوره کړے دے چې خپل نوم هلته مېشت کړم.“

¹⁰دوئ ستا بندګان دى، ستا قوم دے، چې تا د خپل لوئے قُدرت او د خپل زورور لاس په وسيله خلاصون ورکړو. ¹¹اے زما مالِک پلاره، مهرباني وکړه، ستا غوږ دې د خپل بنده دُعا ته متوجه وى، او ستا د هغو بندګانو دُعا ته چې ستا د نوم د ويرې نه خوشحالېږى. نن خپل بنده ته کاميابى ورکړه، او د دې سړى په مخکښې پرې رحم وکړه. هغه وخت زۀ د بادشاه ساقى وم.