Mphangwa Zafika za Kufudzwa kwa Yerusalema
Mpanda wa Yerusalemu wagwa mbukhala miyala basi, Nehemiya mbatsogolera mbumba toera kuumanga pontho. Pakati pace pali phembero ikulu inakumbukira Baba ule adasamalira mbumba yace mu thando zonsene.
1 1Mafala a Nehemiya mwana wa Hakaliya. Mu nthanda ya Kisirevi, mu caka ca makumi mawiri, Ine ndikhali mu linga ya Suza, a a v1 Kisirevi ikhali nthanda yacipfemba mu kalendariyo ya Aebereu, yakuti isafika kunkhomo kwa Novembro mpaka Decembro.
2Hanani, m'bodzi wa abale anga, abwera na amuna adabuluka ku Yuda. Ndiwabvundza thangwi ya Ayuda ale adapulumuka, adasala nkuthamangiswa, na thangwi ya Yerusalema. 3Iwo andipanga tenepa: “Ale adasala kubulukira ku ukapolo, kweneko mu cisa, ali mu nyatwa ikulu na manyadzo. Khoma ya Yerusalema yagweswa, misuwo yace yapiswa na moto.”
4Pidabva Ine mafala anewa, ndakhala pantsi mbandilira; ndatsukwala ntsiku zizinji, mbandicita njala na kuphembera pamaso pa Baba wathu wa kudzulu. 5Ndalonga: Ndaphata miyendo, Baba wanga wa kudzulu, Mulungu wankulu na wakugopswa, ule asasunga cibverano na kufuna kwakukhonda kumala kuna ale anamufuna Iye mbasunga matongero ace, 6khutu yanu mbibvesere, maso anu mbafunguke, toera kubva kuphembera uku kunacita Ine, ntumiki wanu, pamaso panu cincino, masikati na masiku, thangwi ya Izarayeli, atumiki wanu—mbandibvuma madawo adacita ife Aizarayeli kuna Imwe. Ine na nyumba ya baba wanga tadawa. 7Ife tadawa kakamwe kuna Imwe, mbatikhonda kusunga matongero, mitemo, na miyambo adapereka Imwe kuna ntumiki wanu Mozesi.
8Ndaphata miyendo, kumbukani cipangizo canu kuna ntumiki wanu Mozesi, cakuti: “Mungakhonda kukhulupirika, Ine ndinakumwazani pakati pa mbumba, 9mbwenye mungabwerera kuna Ine, mbamusunga matongero anga, mbamuacita, maseze anyakuthamangiswa anu akhale kunkhomo kwakutali kwa kudzulu, Ine ndinaagumanya kubulukira kweneko, mbandiabweresa ku mbuto idasankhula Ine toera kuikha dzina yanga kweneko.”
10Iwo ndi atumiki wanu, mbumba yanu, ale adalombolwa na Imwe mu mphambvu yanu ikulu na nkono wanu wakuwanga. 11Ndaphata miyendo, Mbuya Baba wanga, khutu yanu mbibvesere kuphembera kwa ntumiki wanu, na kuphembera kwa atumiki wanu—ale anakomerwa kugopa dzina yanu. Pasani ntumiki wanu mwai wadidi lero, mbamupaseni ntsisi pamaso pa mamuna uyu. Ine ndikhali nyakupereka vinyu kuna mambo mu ndzidzi unoyu.
