ਨਹਮਯਾਹ 1

1 ¹ਹਕਲਯਾਹ ਦੇ ਪੁੱਤਰ ਨਹਮਯਾਹ ਦੇ ਬਚਨ। ਵੀਹਵੇਂ ਵਰ੍ਹੇ ਦੇ ਕਿਸਲੇਵ ਮਹੀਨੇ ਵਿੱਚ, ਜਦੋਂ ਮੈਂ ਸ਼ੂਸ਼ਨ ਦੇ ਕਿਲੇ ਵਿੱਚ ਸੀ, ^a a v1 ਕਿਸਲੇਵ ਇਬਰਾਨੀ ਕਲੰਡਰ ਦਾ ਨੌਵਾਂ ਮਹੀਨਾ ਸੀ, ਜੋ ਨਵੰਬਰ ਦੇ ਅਖ਼ੀਰ ਤੋਂ ਦਸੰਬਰ ਵਿੱਚ ਪੈਂਦਾ ਹੈ।

²ਮੇਰੇ ਭਰਾਵਾਂ ਵਿੱਚੋਂ ਇੱਕ, ਹਨਾਨੀ, ਯਹੂਦਾਹ ਤੋਂ ਕੁਝ ਮਨੁੱਖਾਂ ਨਾਲ ਆਇਆ। ਮੈਂ ਉਨ੍ਹਾਂ ਤੋਂ ਉਨ੍ਹਾਂ ਯਹੂਦੀਆਂ ਬਾਰੇ ਪੁੱਛਿਆ ਜੋ ਬਚ ਗਏ ਸਨ, ਜੋ ਗ਼ੁਲਾਮੀ ਵਿੱਚੋਂ ਰਹਿ ਗਏ ਸਨ, ਅਤੇ ਯਰੂਸ਼ਲਮ ਬਾਰੇ। ³ਉਨ੍ਹਾਂ ਨੇ ਮੈਨੂੰ ਦੱਸਿਆ, “ਜਿਹੜੇ ਬੰਦੀਵਾਸ ਵਿੱਚੋਂ ਬਚ ਗਏ ਹਨ, ਉਹ ਓਥੇ ਸੂਬੇ ਵਿੱਚ ਵੱਡੀ ਬਿਪਤਾ ਅਤੇ ਨਿਰਾਦਰੀ ਵਿੱਚ ਹਨ। ਯਰੂਸ਼ਲਮ ਦੀ ਸ਼ਹਿਰ ਪਨਾਹ ਢਾਹੀ ਗਈ ਹੈ, ਅਤੇ ਉਸ ਦੇ ਫਾਟਕ ਅੱਗ ਨਾਲ ਸਾੜੇ ਗਏ ਹਨ।”

⁴ਇਹ ਬਚਨ ਸੁਣ ਕੇ, ਮੈਂ ਬੈਠ ਗਿਆ ਅਤੇ ਰੋਇਆ, ਅਤੇ ਕਈ ਦਿਨ ਸੋਗ ਕਰਦਾ ਰਿਹਾ, ਵਰਤ ਰੱਖ ਕੇ ਅਤੇ ਸੁਰਗ ਵਿੱਚ ਸਾਡੇ ਪਿਤਾ ਦੇ ਹਜ਼ੂਰ ਪ੍ਰਾਰਥਨਾ ਕਰਦਾ ਰਿਹਾ। ⁵ਮੈਂ ਆਖਿਆ: ਹੇ ਸੁਰਗ ਵਿੱਚ ਮੇਰੇ ਪਿਤਾ ਜੀ, ਬੇਨਤੀ ਹੈ, ਹੇ ਮਹਾਨ ਅਤੇ ਭਿਆਨਕ ਪਰਮੇਸ਼ੁਰ, ਜੋ ਆਪਣੇ ਪ੍ਰੇਮ ਕਰਨ ਵਾਲਿਆਂ ਅਤੇ ਆਪਣੇ ਹੁਕਮਾਂ ਦੀ ਪਾਲਣਾ ਕਰਨ ਵਾਲਿਆਂ ਨਾਲ ਨੇਮ ਅਤੇ ਅਟੱਲ ਪ੍ਰੇਮ ਨਿਭਾਉਂਦਾ ਹੈ, ⁶ਤੇਰਾ ਕੰਨ ਧਿਆਨ ਲਾਵੇ ਅਤੇ ਤੇਰੀਆਂ ਅੱਖਾਂ ਖੁੱਲ੍ਹੀਆਂ ਰਹਿਣ, ਤਾਂ ਜੋ ਤੂੰ ਇਹ ਪ੍ਰਾਰਥਨਾ ਸੁਣੇਂ ਜੋ ਮੈਂ, ਤੇਰਾ ਦਾਸ, ਇਸਰਾਏਲ, ਤੇਰੇ ਦਾਸਾਂ, ਦੇ ਲਈ ਹੁਣ ਤੇਰੇ ਹਜ਼ੂਰ ਦਿਨ-ਰਾਤ ਕਰਦਾ ਹਾਂ—ਮੈਂ ਉਨ੍ਹਾਂ ਪਾਪਾਂ ਦਾ ਇਕਰਾਰ ਕਰਦਾ ਹਾਂ ਜੋ ਅਸੀਂ ਇਸਰਾਏਲੀਆਂ ਨੇ ਤੇਰੇ ਵਿਰੁੱਧ ਕੀਤੇ ਹਨ। ਮੈਂ ਅਤੇ ਮੇਰੇ ਪਿਤਾ ਦੇ ਘਰਾਣੇ ਨੇ ਪਾਪ ਕੀਤਾ ਹੈ। ⁷ਅਸੀਂ ਤੇਰੇ ਨਾਲ ਬਹੁਤ ਬੁਰਾ ਕੀਤਾ ਹੈ, ਅਤੇ ਉਨ੍ਹਾਂ ਹੁਕਮਾਂ, ਬਿਧੀਆਂ, ਅਤੇ ਨਿਆਵਾਂ ਦੀ ਪਾਲਣਾ ਨਹੀਂ ਕੀਤੀ ਜੋ ਤੂੰ ਆਪਣੇ ਦਾਸ ਮੂਸਾ ਨੂੰ ਹੁਕਮ ਦਿੱਤੇ ਸਨ।

⁸ਬੇਨਤੀ ਹੈ, ਉਹ ਬਚਨ ਯਾਦ ਕਰ ਜੋ ਤੂੰ ਆਪਣੇ ਦਾਸ ਮੂਸਾ ਨੂੰ ਦਿੱਤਾ ਸੀ: “ਜੇ ਤੁਸੀਂ ਬੇਈਮਾਨ ਹੋਵੋਗੇ, ਤਾਂ ਮੈਂ ਤੁਹਾਨੂੰ ਕੌਮਾਂ ਵਿੱਚ ਖਿਲਾਰ ਦਿਆਂਗਾ, ⁹ਪਰ ਜੇ ਤੁਸੀਂ ਮੇਰੇ ਵੱਲ ਮੁੜੋਗੇ, ਮੇਰੇ ਹੁਕਮਾਂ ਦੀ ਪਾਲਣਾ ਕਰੋਗੇ, ਅਤੇ ਉਨ੍ਹਾਂ ਉੱਤੇ ਚੱਲੋਗੇ, ਤਾਂ ਭਾਵੇਂ ਤੁਹਾਡੇ ਕੱਢੇ ਹੋਏ ਲੋਕ ਅਕਾਸ਼ ਦੇ ਦੂਰ ਸਿਰੇ ਉੱਤੇ ਵੀ ਹੋਣ, ਮੈਂ ਉਨ੍ਹਾਂ ਨੂੰ ਓਥੋਂ ਇਕੱਠਾ ਕਰਾਂਗਾ ਅਤੇ ਉਸ ਥਾਂ ਲੈ ਆਵਾਂਗਾ ਜੋ ਮੈਂ ਆਪਣੇ ਨਾਮ ਨੂੰ ਵਸਾਉਣ ਲਈ ਚੁਣਿਆ ਹੈ।”

¹⁰ਇਹ ਤੇਰੇ ਦਾਸ ਹਨ, ਤੇਰੀ ਪਰਜਾ, ਜਿਨ੍ਹਾਂ ਨੂੰ ਤੂੰ ਆਪਣੀ ਵੱਡੀ ਸ਼ਕਤੀ ਅਤੇ ਆਪਣੇ ਬਲਵੰਤ ਹੱਥ ਨਾਲ ਛੁਡਾਇਆ ਹੈ। ¹¹ਬੇਨਤੀ ਹੈ, ਹੇ ਮੇਰੇ ਪ੍ਰਭੂ ਪਿਤਾ, ਤੇਰਾ ਕੰਨ ਆਪਣੇ ਦਾਸ ਦੀ ਪ੍ਰਾਰਥਨਾ ਵੱਲ, ਅਤੇ ਆਪਣੇ ਦਾਸਾਂ ਦੀ ਪ੍ਰਾਰਥਨਾ ਵੱਲ ਧਿਆਨ ਲਾਵੇ—ਜਿਹੜੇ ਤੇਰੇ ਨਾਮ ਦਾ ਭੈ ਮੰਨਣ ਵਿੱਚ ਖ਼ੁਸ਼ ਹੁੰਦੇ ਹਨ। ਅੱਜ ਆਪਣੇ ਦਾਸ ਨੂੰ ਸਫ਼ਲਤਾ ਦੇ, ਅਤੇ ਇਸ ਮਨੁੱਖ ਦੇ ਸਾਹਮਣੇ ਉਸ ਉੱਤੇ ਦਯਾ ਬਖ਼ਸ਼। ਉਸ ਸਮੇਂ ਮੈਂ ਪਾਤਸ਼ਾਹ ਦਾ ਸਾਕੀ ਸੀ।