Jerusalem Leiluan Shanga Ngüh Loukei
Jerusalembü kümthang shuong leiluan kia, hoba Nehemiaei mütli to kho tongde dangngaitila leida. Jenyua yamlamang pendou danko jembü mütli khümenbü Bou che damentibü welaubü yaangbü che ki.
1 1Hakaliaeibü shou Nehemiaeibü ngühshuong hibü ki. Kislev lita, po saoche boubüa, ngo Susa Choba chem ka kikei, a a v1 Kislev kho Hibrubü litweenbü ka lit nyetboubü phainei nyiboubü lit kikei; kho November chasaang ka December sühko loukei.
2Kü jaisinasi shuong yoka che Hanani, Jihuda ka kibü müt shuong yoa louakei. Ngei haoen to langsenbü ka satenan joukei Jihudabü shuong shangabü, hoba Jerusalem shangabü phekei. 3Haoenei kü to lenkei, “Langsenbü ka joubü mütli shuong, kho kaophei ka, aeibou khonsak hoba himou ka kia. Jerusalem kümthang kho leiluan kikei, haoeibü bakou shuong wanei juokkei.”
4Ho ngüh ditan, ngo setan haapbei, hoba chalou lounyu mang haapbo, seneibü khuthükkabü Bou thedanga nyengko hoba welaukei. 5Ngei laukei: O kü khuthükkabü Bou, Mühghaü yaangbü hoba hatlamoklabü Mühghaü, aoei hao to sanoubü hoba haoeibü ngühkhüm jungeibü shuong to theyolanyobü hoba üeisanou lenda. 6Tatje ngo, no khangenbou, change nangnak nyi thedanga no khangenbü Israel shousi shuong shanga welaubü ho welau nyi ditla shanga, kaibü nou souhatko hoba kaibü nyek ipbukei kishi. Senei Israel shousi shuongei nyi khulimbo shonbü shabü kho ngei thekuda. Ngo hoba kü bou chemdangei shabü shona. 7Nyi no khangenbou Mosa la sakkubü ngühkhüm, deikhüm hoba song shuong ajungeiko, senei nyi to aeibou shedtikei.
8Tou no khangenbou Mosa la nyi kubü ngüh damentiashi: “Kanei shedbü kümalonga, ngei kan mütshuong yoto lintilabü, 9lausikei kanei kü jungto sepeilonga, hoba ngeibü ngühkhüm jungeiko, hoba khübü kho kümalonga, kaneibü langsenbü shuong khuthük thonbü saabüa kiasikei, ngei kho ka haoen kümetkulabü, hoba ngeibü nyen kho ka kitila shanga ngei pienbü kaoen to haoen leian loulabü.”
10Haoen kho kaibü hau yaangbü hoba kaibü kaangbüsekbü ik danko nyi püetbü no khangenbü shuong hoba nyi mütli ki. 11O Bunyubou kü Bou, kaibü nou no khangenboueibü welau to, hoba kaibü nyen souhatla olinbü no khangenbü shuongeibü welau to, souhatko kishi. Tat chaloua no khangenbou la kümsilei haüthüktiashi, hoba ho müt thedanga hao to onou hankushi. Kho chaloua ngo Choba thung jungbou kikei.
