ଯିରୂଶାଲମର ବିନାଶ ବିଷୟକ ସମ୍ବାଦ ଆସେ

ଯିରୂଶାଲମର ପ୍ରାଚୀର ଭଗ୍ନାବଶେଷ ହୋଇ ପଡ଼ିଅଛି, ଏବଂ ନିହିମିୟା ତାହା ପୁନଃନିର୍ମାଣ କରିବାକୁ ଲୋକମାନଙ୍କୁ ନେତୃତ୍ୱ ଦିଅନ୍ତି। ଏହାର କେନ୍ଦ୍ରରେ ଏକ ମହାନ ପ୍ରାର୍ଥନା, ଯାହା ଏପରି ଜଣେ ପିତାଙ୍କୁ ସ୍ମରଣ କରେ ଯିଏ ପ୍ରତ୍ୟେକ ପ୍ରାନ୍ତରରେ ନିଜ ଲୋକମାନଙ୍କୁ ପ୍ରତିପାଳନ କଲେ।

ଅଧ୍ୟାୟ 1।

ହଖଲୀୟଙ୍କ ପୁତ୍ର ନିହିମୀୟାଙ୍କ ବାକ୍ୟ। କୋଡ଼ିଏ ବର୍ଷର କିସ୍ଲେବ ମାସରେ ମୁଁ ଶୂଶନ୍ ରାଜଗଡ଼ରେ ଥିଲି, ^a

ମୋହର ଜଣେ ଭାଇ ହନାନି ଯିହୂଦାରୁ କେତେକ ଲୋକଙ୍କ ସହିତ ଆସିଲା। ଯେଉଁ ଯିହୂଦୀୟମାନେ ବନ୍ଦୀତ୍ଵରୁ ରକ୍ଷା ପାଇ ଅବଶିଷ୍ଟ ରହିଥିଲେ, ସେମାନଙ୍କ ବିଷୟରେ ଓ ଯିରୂଶାଲମ ବିଷୟରେ ମୁଁ ସେମାନଙ୍କୁ ପଚାରିଲି। ସେମାନେ ମୋତେ କହିଲେ, “ଯେଉଁମାନେ ବନ୍ଦୀତ୍ଵରୁ ରକ୍ଷା ପାଇ ଅବଶିଷ୍ଟ ରହିଅଛନ୍ତି, ସେମାନେ ସେହି ପ୍ରଦେଶରେ ମହା କ୍ଲେଶ ଓ ଅପମାନରେ ଅଛନ୍ତି। ଯିରୂଶାଲମର ପ୍ରାଚୀର ଭଗ୍ନ ହୋଇଅଛି ଓ ତହିଁର ଦ୍ଵାରସବୁ ଅଗ୍ନିରେ ଦଗ୍ଧ ହୋଇଅଛି।”

ଏହି ବାକ୍ୟ ଶୁଣି ମୁଁ ବସି ରୋଦନ କଲି, ଅନେକ ଦିନ ପର୍ଯ୍ୟନ୍ତ ଶୋକ କରି ଉପବାସ କଲି, ପୁଣି ସ୍ଵର୍ଗସ୍ଥ ଆମ୍ଭମାନଙ୍କ ପିତାଙ୍କ ଛାମୁରେ ପ୍ରାର୍ଥନା କଲି। ମୁଁ କହିଲି, ହେ ମୋହର ସ୍ଵର୍ଗସ୍ଥ ପିତା, ହେ ମହାନ ଓ ଭୟଙ୍କର ଈଶ୍ଵର, ଯେଉଁମାନେ ତୁମ୍ଭକୁ ପ୍ରେମ କରନ୍ତି ଓ ତୁମ୍ଭ ଆଜ୍ଞା ପାଳନ କରନ୍ତି, ସେମାନଙ୍କ ପ୍ରତି ତୁମ୍ଭେ ନିୟମ ଓ ବିଶ୍ଵସ୍ତ ପ୍ରେମ ରକ୍ଷା କରିଥାଅ, ନିବେଦନ କରୁଅଛି, ତୁମ୍ଭ ଦାସ ଯେ ମୁଁ, ତୁମ୍ଭ ଦାସ ଇସ୍ରାଏଲ-ସନ୍ତାନମାନଙ୍କ ନିମନ୍ତେ ଦିବାରାତ୍ର ଏବେ ତୁମ୍ଭ ଛାମୁରେ ଯେଉଁ ପ୍ରାର୍ଥନା କରୁଅଛି, ତାହା ଶୁଣିବା ନିମନ୍ତେ ତୁମ୍ଭ କର୍ଣ୍ଣ ଅବହିତ ଓ ତୁମ୍ଭ ଚକ୍ଷୁ ଉନ୍ମୁକ୍ତ ହେଉ। ଆମ୍ଭେ ଇସ୍ରାଏଲ-ସନ୍ତାନମାନେ ତୁମ୍ଭ ବିରୁଦ୍ଧରେ ଯେଉଁ ପାପ କରିଅଛୁ, ତାହା ମୁଁ ସ୍ଵୀକାର କରୁଅଛି। ମୁଁ ଓ ମୋହର ପିତୃବଂଶ ପାପ କରିଅଛୁ। ଆମ୍ଭେମାନେ ତୁମ୍ଭ ବିରୁଦ୍ଧରେ ଅତିଶୟ କୁବ୍ୟବହାର କରିଅଛୁ, ପୁଣି ତୁମ୍ଭେ ଆପଣା ଦାସ ମୋଶାଙ୍କୁ ଯେଉଁ ଆଜ୍ଞା, ବିଧି ଓ ଶାସନ ଆଦେଶ କରିଥିଲ, ତାହାସବୁ ପାଳନ କରି ନାହୁଁ।

ତୁମ୍ଭେ ଆପଣା ଦାସ ମୋଶାଙ୍କୁ ଯେଉଁ ଉପଦେଶ ଦେଇଥିଲ, ତାହା ସ୍ମରଣ କର, ବିନତି କରୁଅଛି, “ଯଦି ତୁମ୍ଭେମାନେ ବିଶ୍ଵାସଘାତକତା କରିବ, ତେବେ ଆମ୍ଭେ ତୁମ୍ଭମାନଙ୍କୁ ଗୋଷ୍ଠୀସମୂହ ମଧ୍ୟରେ ଛିନ୍ନଭିନ୍ନ କରିବା, ମାତ୍ର ଯଦି ତୁମ୍ଭେମାନେ ଆମ୍ଭ ନିକଟକୁ ଫେରିଆସି ଆମ୍ଭର ଆଜ୍ଞା ପାଳନ କରିବ ଓ ତାହା ପାଳନ କରିବ, ତେବେ ତୁମ୍ଭମାନଙ୍କର ନିର୍ବାସିତ ଲୋକମାନେ ଆକାଶମଣ୍ଡଳର ଶେଷ ସୀମାରେ ଥିଲେ ହେଁ, ଆମ୍ଭେ ସେମାନଙ୍କୁ ସେଠାରୁ ସଂଗ୍ରହ କରିବା, ପୁଣି ଆପଣା ନାମ ବାସ କରାଇବା ନିମନ୍ତେ ଯେଉଁ ସ୍ଥାନ ମନୋନୀତ କରିଅଛୁ, ସେଠାକୁ ସେମାନଙ୍କୁ ଆଣିବା।”

ଏମାନେ ତୁମ୍ଭର ଦାସ ଓ ତୁମ୍ଭର ଲୋକ, ଯେଉଁମାନଙ୍କୁ ତୁମ୍ଭେ ଆପଣା ମହା ପରାକ୍ରମ ଓ ବଳବନ୍ତ ହସ୍ତ ଦ୍ଵାରା ମୁକ୍ତ କରିଅଛ। ହେ ମୋହର ପ୍ରଭୁ ପିତା, ବିନତି କରୁଅଛି, ତୁମ୍ଭ ଦାସର ପ୍ରାର୍ଥନା ପ୍ରତି ଓ ଯେଉଁ ଦାସମାନେ ତୁମ୍ଭ ନାମକୁ ଭୟ କରିବାରେ ଆନନ୍ଦ କରନ୍ତି, ସେମାନଙ୍କ ପ୍ରାର୍ଥନା ପ୍ରତି ତୁମ୍ଭ କର୍ଣ୍ଣ ଅବହିତ ହେଉ। ଆଜି ତୁମ୍ଭ ଦାସକୁ କୃତକାର୍ଯ୍ୟ କର ଓ ଏହି ମନୁଷ୍ୟ ଛାମୁରେ ତାହାଙ୍କୁ କୃପାପ୍ରାପ୍ତ କରାଅ। ସେହି ସମୟରେ ମୁଁ ରାଜାଙ୍କ ପାନପାତ୍ରବାହକ ଥିଲି।