Laa 71

71 ¹O iwui Avā, ina nali ngayinkhui; ili mamaishi ngasakmilakalu. ²Nawui khamashung khangarongli ili kanshokmilu kala huimilu; ili nganāmilu kala kanmilu. ³Ina atam kachida rāki kaji iwui ngayin khavai lunghār na kasāmilu; nana ili huimi khavai ningmihai, kaja na iwui lunghār kala iwui raipanna. ⁴O iwui Avā, makhayāwui pāngwui eina, shitkasang makhalei kala sāshilaka miwui pāngwui eina ili kanshokmilu.

⁵Kaja na iwui kachihānna, O Proho Avā, nganuilakhawui eina iwui shitkasangna. ⁶Naopamwui eina ina nali zunghaira; ishava̱wui naopamwui eina na ili khuishok khamena. Ina atam kachida nali masot chigatchinga. ⁷Kachungkhali ina matakhak kahai ngasāhaira, kha na iwui kapang ngayin khavaina. ⁸Ikhamor langpongda nawui masot kala nawui tekhamatei eina pemtinghai.

⁹Rarlak kahai atamli ili masamialu; iwui yāng kānhaowa tharan, ili mahormihaialu. ¹⁰Kaja iwui yangkashebingna ili tui hāngpama; imanglā khuikhavai ili kayonpambingna khokkha sāda khangarān sai. ¹¹Athumna hānga, "Varena ali malaihaira; ali kharomda tukkhuilu, kaja ali kanshok kaji mi khipākha maleimana."

¹²O iwui Avā, iwui eina matāthuimihaialu; O iwui Avā, ili thākta ngachonmilu! ¹³Iwui kaphenabing khayak ngasakta shimānranu; ili chotkhavai phākazatbingli mana̱shi kala maikashina farorranu.

¹⁴Kha ina thangkachida chihānra, kala nawui masot mangmangda chikatra. ¹⁵Chiwui asān-aret ina matheilala, ikhamorna nawui khamashung khangarong, nawui huikhami langpongda chitheira. ¹⁶Ina rāda Proho Avāwui reikhamatai otbing chitheira; nawui khamashung khangarong, namāng chi, ina vaomalānra.

¹⁷O iwui Avā, nganuilakhawui eina nana ili tamchithei, kala aja rāshungda nawui matakhak kahai otbing ina chitheira. ¹⁸Chiwui vang eina I sarhaida kuila ngapokhaira thālala, O iwui Avā, ina thot khangateili nawui pangshap, rāki kaje saikorali nawui yāng phongshokranglakha eina tangda, ili mahormihaialu.

¹⁹O iwui Avā, nawui khamashung khangarong kazingram atungshong kāzoka. Nana hakkhamahā ot sāhaira, O iwui Avā, na kathā khipā lei? ²⁰Nana ili kakhanang kala kalākashi kachungkha sāchithei, ili mathukluishit ngasakra; okathuiwui kathuka eina ili thānshokluishitra. ²¹Nana iwui khayā mataisang ngasakra kala ili ringphā ngasakluishitra.

²²O iwui Avā, nawui ningkatong chiwui vang ina zangda tingteilā eina nali masotlaa sāra; lyre eina nali laa sāra, O Israelwui Kathara—iwui Avā. ²³Nali masotlaa kasā tharan, imorchaina khamathānna vaora, kala nana ngatangmi kahai imanglāla vaora. ²⁴Kala imalena nawui khamashung khangarong pongli langpongda hāngra, kaja ili makaphā khangarān kahaibing maishida pa̱ngapāmihaira.