Salmo 71

71 ¹Diha kanimo, akong Amahan, modangop ako; ayaw itugot nga maulawan ako. ²Tungod sa imong pagkamatarong palingkawasa ako ug haw-asa ako; patalinghogi ako ug luwasa ako. ³Mahimo kang bato nga akong dalangpanan, nga kanunay kong kaadtoan; nagmando ka sa pagluwas kanako, kay ikaw ang akong bato ug ang akong salipdanan. ⁴Akong Amahan, haw-asa ako gikan sa kamot sa mga daotan, gikan sa kumo sa dili makiangayon ug sa mabangis.

⁵Kay ikaw ang akong paglaom, Soberanong Amahan, ang akong gisaligan sukad sa akong pagkabatan-on. ⁶Nagsandig ako kanimo sukad sa akong pagkatawo; ikaw ang nagkuha kanako gikan sa tagoangkan sa akong inahan. Kanunay ako nga nagadayeg kanimo. ⁷Nahimo akong usa ka katingalahan sa daghan, apan ikaw ang akong lig-ong dalangpanan. ⁸Napuno ang akong baba sa pagdayeg kanimo, ug sa imong himaya sa tibuok adlaw.

⁹Ayaw ako isalikway sa akong pagkatigulang; kon mawad-an na ako sa kusog, ayaw ako biyai. ¹⁰Kay ang akong mga kaaway nagsulti batok kanako; kadtong nagbantay sa pagkuha sa akong kinabuhi nag-abin-abin. ¹¹Nag-ingon sila, “Gibiyaan siya sa Dios; gukda ug dakpa siya, kay walay makaluwas kaniya.”

¹²Akong Amahan, ayaw pagpahilayo kanako; akong Amahan, pagdali sa pagtabang kanako! ¹³Hinaut nga maulawan ug malaglag ang akong mga magsusumbong; hinaut nga matabonan sa pagbiaybiay ug kaulawan kadtong nagtinguha sa akong kadaotan.

¹⁴Apan ako magalaom sa kanunay ug magadayeg kanimo sa labi ug labi pa. ¹⁵Ang akong baba magasugilon sa imong pagkamatarong, sa imong kaluwasan sa tibuok adlaw, bisan tuod wala ako masayod sa tibuok sukod niini. ¹⁶Moduol ako nga nagmantala sa gamhanang mga buhat sa Soberanong Amahan; igapahayag ko ang imong pagkamatarong, ang imo lamang.

¹⁷Akong Amahan, gitudloan mo ako sukad sa akong pagkabatan-on, ug hangtod karong adlawa ginamantala ko ang imong katingalahang mga buhat. ¹⁸Busa bisan sa panahon nga ako tigulang na ug ubanon, akong Amahan, ayaw ako biyai, hangtod nga ikapahayag ko ang imong gahom ngadto sa laing kaliwatan, ang imong pagkagamhanan ngadto sa tanang moabot.

¹⁹Ang imong pagkamatarong, akong Amahan, nagaabot sa kahitas-an sa langit. Ikaw nga nagbuhat sa dagkong mga butang, akong Amahan, kinsa ba ang sama kanimo? ²⁰Ikaw nga nagpakita kanako sa daghang kalisdanan ug mga katalagman magabuhi kanako pag-usab; gikan sa kahiladman sa yuta ipataas mo ako pag-usab. ²¹Dugangan mo ang akong kadungganan ug lipayon mo ako pag-usab.

²²Dayegon ko usab ikaw pinaagi sa alpa tungod sa imong pagkamatinud-anon, akong Amahan; magaawit ako ug mga pagdayeg kanimo pinaagi sa lira, Balaan sa Israel—akong Amahan. ²³Ang akong mga ngabil magasinggit sa kalipay sa diha nga magaawit ako ug mga pagdayeg kanimo, ug ang akong kalag usab, nga imong gitubos. ²⁴Ug ang akong dila magasugilon sa imong pagkamatarong sa tibuok adlaw, kay kadtong nagtinguha sa akong kadaotan naulawan ug gipakaulawan.