Utiziro Hwoupenyu Hwose

Munyengetero wechembere. Akazendama pana Baba vake kubvira pakuberekwa, uye zvino anotya kuraswa simba rake parinopera vavengi vachiti akasiiwa. Chaanokumbira inguva — kuti arambe achiudza chizvarwa chinotevera zvaanoziva.

Chitsauko 71.

Mamuri, Baba vangu, ndinovanda; ndirege kutongonyadziswa. Mukururama kwenyu ndinunurei mundirwire; nditeererei mundiponese. Ivai dombo rangu routiziro, randingaramba ndichiuya kwariri; makarayira kuti ndiponeswe, nokuti ndimi dombo rangu nenhare yangu. Baba vangu, ndirwirei muruoko rwowakaipa, mukubata kwowasina kururama nowane utsinye.

Nokuti ndimi tariro yangu, imi Baba Changamire, chivimbo changu kubvira paujaya hwangu. Ndakazendamira pamuri kubvira pakuberekwa; ndimi makanditora mudumbu ramai vangu. Ndinoramba ndichikurumbidzai. Ndava chishamiso kuvazhinji, asi imi muri utiziro hwangu hwakasimba. Muromo wangu uzere nokurumbidzwa kwenyu, uye nokubwinya kwenyu zuva rose.

Musandirasa pakukwegura kwangu; simba rangu parinopera, musandisiya. Nokuti vavengi vangu vanotaura vachindipikisa; vaya vakarindira kutora upenyu hwangu vanorangana pamwe chete. Vanoti, “Mwari amusiya; mutevere mumubate, nokuti hakuna angamurwira.”

Baba vangu, regai kuva kure neni; Baba vangu, kurumidzai kundibatsira! Vanondipomera ngavanyadziswe vaparadzwe; vaya vanotsvaka kundikuvadza ngavafukidzwe nokuzvidzwa nokunyadziswa.

Asi ini ndichava netariro nguva dzose, uye ndicharamba ndichiwedzera kukurumbidzai. Muromo wangu uchareva kururama kwenyu, noruponeso rwenyu zuva rose, kunyange ndisingazivi muyero wazvo wose. Ndichauya ndichiparidza mabasa esimba aBaba Changamire; ndichazivisa kururama kwenyu, kwenyu imi moga.

Baba vangu, makandidzidzisa kubvira paujaya hwangu, uye kusvikira nhasi ndinoparidza mabasa enyu anoshamisa. Saka kunyange pandinenge ndakwegura ndachena bvudzi, Baba vangu, musandisiya, kusvikira ndaparidza simba renyu kuchimwe chizvarwa, nesimba renyu kune vose vachauya.

Kururama kwenyu, Baba vangu, kunosvika kumatenga ari kumusoro. Imi makaita zvinhu zvikuru, Baba vangu, ndiani akafanana nemi? Imi makandiratidza matambudziko mazhinji nenjodzi, muchandiraramisazve; muchandibudisazve kubva pakadzika penyika. Muchawedzera kukudzwa kwangu, uye muchandinyaradzazve.

Neniwo ndichakurumbidzai nembira nokuda kwokutendeka kwenyu, Baba vangu; ndichakuimbirai nziyo norudimbwa, imi Mutsvene waIsraeri—Baba vangu. Miromo yangu ichapururudza nomufaro pandinokuimbirai, nomweya wanguwo, iwo wamakadzikinura. Uye rurimi rwangu rucharondedzera kururama kwenyu zuva rose, nokuti vaya vakanga vachitsvaka kundikuvadza vakanyadziswa vakazvidzwa.