AMahubo 71

71 ¹Kuwe, Baba wami, ngiphephela; mangingajabhiswa naphakade. ²Ngokulunga kwakho ngikhulule ungophule; ungilalele ungisindise. ³Yiba yidwala lami lesiphephelo, engingeza kulo njalonjalo; ukhiphe umyalo wokungisindisa, ngokuba uyidwala lami nenqaba yami. ⁴Baba wami, ngophule esandleni somubi, ekubanjweni kongalungile nonesihluku.

⁵Ngokuba uyithemba lami, Baba oBusayo, ukwethemba kwami kusukela ebusheni bami. ⁶Ngeyeme kuwe selokhu ngazalwa; nguwe owangikhipha esiswini sikamame. Ngikudumisa njalonjalo. ⁷Ngibe yisimangaliso kwabaningi, kodwa wena uyisiphephelo sami esiqinile. ⁸Umlomo wami ugcwele indumiso yakho, nenkazimulo yakho usuku lonke.

⁹Ungangilahli ebudaleni bami; lapho amandla ami ephela, ungangishiyi. ¹⁰Ngokuba izitha zami zikhuluma zimelene nami; labo abalinde ukuthatha ukuphila kwami benza itulo ndawonye. ¹¹Bathi: “UNkulunkulu umshiyile; mxoshe umbambe, ngokuba akekho ongamophula.”

¹²Baba wami, ungabi kude nami; Baba wami, shesha ungisize! ¹³Mabajabhiswe babhujiswe abangimangalelayo; mabembeswe ukudelelwa nehlazo labo abafuna ukungilimaza.

¹⁴Kodwa mina ngiyakuthemba njalonjalo, ngikudumise nakakhulu. ¹⁵Umlomo wami uyakulandisa ngokulunga kwakho, ngosindiso lwakho usuku lonke, nakuba ngingasazi isilinganiso saso esipheleleyo. ¹⁶Ngiyakuza ngimemezela imisebenzi enamandla kaBaba oBusayo; ngiyakumemezela ukulunga kwakho, okwakho wedwa.

¹⁷Baba wami, ungifundisile kusukela ebusheni bami, kuze kube namuhla ngimemezela imisebenzi yakho emangalisayo. ¹⁸Ngakho noma sengimdala sengimpunga, Baba wami, ungangishiyi, ngize ngimemezele amandla akho kwesinye isizukulwane, ingalo yakho enamandla kubo bonke abayakuza.

¹⁹Ukulunga kwakho, Baba wami, kufinyelela emazulwini aphakeme. Wena owenze izinto ezinkulu, Baba wami, ngubani onjengawe? ²⁰Wena ongibonise izinhlupheko eziningi nezinhlekelele uyakuphinda ungivuselele; uyakuphinda ungikhuphule ekujuleni komhlaba. ²¹Uyakwandisa udumo lwami, uphinde ungiduduze futhi.

²²Nami ngiyakukudumisa ngehabhu ngenxa yokuthembeka kwakho, Baba wami; ngiyakukuhlabelela ngogubhu lwezintambo, wena oNgcwele ka-Israyeli—Baba wami. ²³Izindebe zami ziyakumemeza ngenjabulo lapho ngikuhlabelela, kanye nomphefumulo wami, owuhlengile. ²⁴Nolimi lwami luyakulandisa ngokulunga kwakho usuku lonke, ngokuba labo ababefuna ukungilimaza bajabhisiwe bahlazisiwe.