Saamu 71

71 ¹Ní ọ̀dọ̀ rẹ, Baba mi, ni mo ti sádi; má ṣe jẹ́ kí ojú kí ó tì mí láéláé. ²Nínú òdodo rẹ, gbà mí sílẹ̀ kí o sì yọ mí; dẹtí rẹ sí mi kí o sì gbà mí là. ³Jẹ́ àpáta ìsádi mi, èyí tí mo lè máa wá sí nígbà gbogbo; ìwọ ti pàṣẹ láti gbà mí là, nítorí ìwọ ni àpáta mi àti odi mi. ⁴Baba mi, gbà mí lọ́wọ́ àwọn ènìyàn búburú, lọ́wọ́ àwọn aláìṣòdodo àti àwọn ìkà.

⁵Nítorí ìwọ ni ìrètí mi, Baba Olódùmarè, ìgbẹ́kẹ̀lé mi láti ìgbà èwe mi. ⁶Ìwọ ni mo ti gbé ara mi lé láti ìgbà ìbí mi; ìwọ ni ẹni tí ó mú mi jáde kúrò nínú inú ìyá mi. Èmi ń yìn ọ́ nígbà gbogbo. ⁷Mo ti dà bí ohun ìyanu lójú ọ̀pọ̀lọpọ̀, ṣùgbọ́n ìwọ ni ibi ìsádi mi tí ó lágbára. ⁸Ẹnu mi kún fún ìyìn rẹ, àti fún ògo rẹ ní gbogbo ọjọ́.

⁹Má ṣe gbé mi sọnù ní àsìkò ogbó mi; nígbà tí agbára mi bá tán, má ṣe kọ̀ mí sílẹ̀. ¹⁰Nítorí àwọn ọ̀tá mi ń sọ̀rọ̀ lòdì sí mi; àwọn tí ń ṣọ́ mi láti gba ẹ̀mí mi jọ gbìmọ̀ pọ̀. ¹¹Wọ́n wí pé, “Ọlọ́run ti kọ̀ ọ́ sílẹ̀; lépa rẹ̀ kí ẹ sì mú un, nítorí kò sí ẹni tí yóò gbà á.”

¹²Baba mi, má ṣe jìnnà sí mi; Baba mi, yára wá ràn mí lọ́wọ́! ¹³Kí ojú kí ó ti àwọn tí ń fi mí sùn, kí a sì run wọ́n; àwọn tí ń wá ìpalára mi, kí ẹ̀gàn àti ìtìjú kí ó bò wọ́n.

¹⁴Ṣùgbọ́n èmi yóò máa ní ìrètí nígbà gbogbo, èmi yóò sì máa yìn ọ́ síwájú àti síwájú sí i. ¹⁵Ẹnu mi yóò máa sọ̀rọ̀ òdodo rẹ, àti ìgbàlà rẹ ní gbogbo ọjọ́, bí ó tilẹ̀ jẹ́ pé n kò mọ iye rẹ̀ ní kíkún. ¹⁶Èmi yóò wá, èmi yóò sì kéde àwọn iṣẹ́ agbára Baba Olódùmarè; èmi yóò pòkìkí òdodo rẹ, ti ìwọ nìkan ṣoṣo.

¹⁷Baba mi, ìwọ ti kọ́ mi láti ìgbà èwe mi, àti títí di òní olónìí èmi ń kéde àwọn iṣẹ́ ìyanu rẹ. ¹⁸Nítorí náà, àní nígbà tí mo bá dàgbà tí mo sì d'arúgbó ewú, Baba mi, má ṣe kọ̀ mí sílẹ̀, títí èmi ó fi kéde agbára rẹ fún ìran mìíràn, agbára ńlá rẹ fún gbogbo àwọn tí ń bọ̀.

¹⁹Òdodo rẹ, Baba mi, ga dé ọ̀run òkè. Ìwọ tí o ti ṣe ohun ńláńlá, Baba mi, ta ni ó dàbí rẹ? ²⁰Ìwọ tí o ti fi ọ̀pọ̀lọpọ̀ ìpọ́njú àti ìdààmú hàn mí yóò sọ mí di ààyè padà; láti ibú ilẹ̀ ìwọ yóò gbé mi sókè padà. ²¹Ìwọ yóò sọ ọlá mi di púpọ̀, ìwọ yóò sì tù mí nínú lẹ́ẹ̀kan sí i.

²²Èmi pẹ̀lú yóò fi haapu yìn ọ́ nítorí òtítọ́ rẹ, Baba mi; èmi yóò fi dùùrù kọ orin ìyìn sí ọ, Ẹni Mímọ́ Israẹli—Baba mi. ²³Ètè mi yóò hó fún ayọ̀ nígbà tí mo bá kọ orin ìyìn sí ọ, àti ọkàn mi pẹ̀lú, tí ìwọ ti rà padà. ²⁴Ahọ́n mi yóò sì máa sọ̀rọ̀ òdodo rẹ ní gbogbo ọjọ́, nítorí àwọn tí ń wá ìpalára mi, ojú ti wọ́n, a sì dójú tì wọ́n.