Salang Sünga Satenshang
Baushilabü müt cheeibü welau. Haoei bukjineithama haoeibü Bou to satenan kikei, hoba tou haoeibü hau semthetlaje, dangbou shuongei hao inletkei dogo laujinei, teüpyobü to hatda. Haoei ditbü kho chalou ki—phaibü meten to haoei ngebü shuong lenan paila shanga.
71 1Kü Bou, no to ngo satenda; ngo ladangkei himouko tephokuma. 2Kaibü saopobüa ngo senetashi hoba ngo khümenshima; ngeibü ngüh dittiashi hoba ngo khümenashi. 3Ngeibü satenshang laang yingshi, ao to ngo ponpendou loulabü; nyi ngo khümenla sakkukei, aishanga nyi ngeibü laang hoba ngeibü lapheishon ki. 4Kü Bou, amaibü shuong ik ka, asaopobü hoba kaangbü shuong ikmang ka ngo khümenashi.
5Aishanga, Bunyubou Bou, nyi ngeibü maanglemshang ki, kü nashoudang ka thama ngeibü mailemshang kia. 6Ngo bukjineithama no to satenan kia; nyi kü nyueibü nyusem ka ngo langbou kia. Ngo ponpendou ka nyen sangda. 7Ngo müt juong to maangpanglabü che yeia, lausikei nyi ngeibü kaangbüsekbü lapheishon ki. 8Ngeibü sembung kaibü nyensang yoa shenan kia, hoba chalou pendou kaibü soneikangbüei shenan kia.
9Kü baushilama ngo teüpyoma; ngeibü hau semthetlaje, ngo tenangletma. 10Aishanga ngeibü dangbou shuongei ngo khulimbo joyoda; ngeibü langkei lela haiyeibü shuongei liko huonda. 11Haoenei lauda, “Mühghaüei hao inletkei; hao shijung hauan lapashi, aishanga hao khümenbou aoei aki.”
12Kü Bou, kü jungka lounyu teki; Kü Bou, hali kü to thuikaima! 13Ngo to ühakbü shuong himouko apan mautiashi; ngo to amaibü kula lambü shuong nyikubü hoba himouei naanglepkushima.
14Lausikei ngo athakko maanglemlabü, hoba ka to aei aei nyen sanglabü. 15Ngeibü sembungei kaibü saopobü, chalou pendou kaibü khümenbü shanga phinthonlabü, ngei khübü takbü pendou angeasikei. 16Ngo louan Bunyubou Boueibü yaangbü kümsilei shuong phinthonlabü; kaibü saopobü, no alongbü kho, ngei phinthonlabü.
17Kü Bou, nyi kü nashoudangka thama ngo lenkei, hoba tat chalou sühko ngei kaibü maangpanglabü kümsilei shuong phinthonda. 18Khoei ngo baushi hoba khuthu phambü kiasikei, O kü Bou, lubü meten to ngei kaibü seisihau, hoba loulabü pendou to kaibü hau phinthonda shongko, ngo tenangletma.
19Kaibü saopobü, O kü Bou, thükkabü müh thüka nongan. No kümsilei yaangbü kümbou, O kü Bou, no tegü ao ki? 20No kü la amaibü hoba khonsak juong ngetikubou, nyi ngo tongde sisiktilabü; hoba kaodakbü yungnyu haübü ka nyi ngo tongde yaülabü. 21Nyi kü nyenhang juongtilabü hoba ngo tongde solotilabü.
22Tokei ngei kaibü maanglemenbü shanga kongkin ka la nyensang kulabü, O kü Bou; kongkin ka la nyensang chia laulabü, O Israelbü Saopobou—kü Bou. 23Ngei ka la nyensang chia laujinei ngeibü sembungei olinbü ka ngeklabü, hoba nyi püetbü ngeibü soushou tokei ngeklabü. 24Hoba ngeibü lishangei chalou pendoua kaibü saopobü shanga joyolabü, aishanga kü la amaibü lambou shuong himouko hoba the alenenko kikei.
