ಕೀರ್ತನೆಗಳು 71 FHB Father's Heart Bible™

71 ¹ನನ್ನ ತಂದೆಯೇ, ನಿಮ್ಮಲ್ಲಿ ನಾನು ಆಶ್ರಯಪಡೆದಿದ್ದೇನೆ; ನಾನು ಎಂದಿಗೂ ನಾಚಿಕೆಗೆ ಈಡಾಗದಿರಲಿ. ²ನಿಮ್ಮ ನ್ಯಾಯನೀತಿಯಿಂದ ನನ್ನನ್ನು ಬಿಡಿಸಿ ರಕ್ಷಿಸಿರಿ; ನನ್ನ ಕಡೆಗೆ ಕಿವಿಗೊಟ್ಟು ನನ್ನನ್ನು ಕಾಪಾಡಿರಿ. ³ನಾನು ಯಾವಾಗಲೂ ಬರಬಹುದಾದ ನನ್ನ ಆಶ್ರಯಗಿರಿಯಾಗಿರಿ; ನನ್ನನ್ನು ರಕ್ಷಿಸಲು ನೀವು ಅಪ್ಪಣೆ ಕೊಟ್ಟಿದ್ದೀರಿ, ಏಕೆಂದರೆ ನೀವೇ ನನ್ನ ಬಂಡೆಯೂ ನನ್ನ ದುರ್ಗವೂ ಆಗಿದ್ದೀರಿ. ⁴ನನ್ನ ತಂದೆಯೇ, ದುಷ್ಟರ ಕೈಯಿಂದ, ಅನ್ಯಾಯಿಗಳ ಮತ್ತು ಕ್ರೂರರ ಹಿಡಿತದಿಂದ ನನ್ನನ್ನು ರಕ್ಷಿಸಿರಿ.

⁵ಸಾರ್ವಭೌಮ ತಂದೆಯೇ, ನೀವೇ ನನ್ನ ನಿರೀಕ್ಷೆ, ನನ್ನ ಯೌವನದಿಂದಲೂ ನನ್ನ ಭರವಸೆ ಆಗಿದ್ದೀರಿ. ⁶ಹುಟ್ಟಿನಿಂದಲೇ ನಾನು ನಿಮ್ಮ ಮೇಲೆ ಆತುಕೊಂಡಿದ್ದೇನೆ; ನನ್ನ ತಾಯಿಯ ಗರ್ಭದಿಂದ ನನ್ನನ್ನು ಹೊರತಂದವರು ನೀವೇ. ನಾನು ಯಾವಾಗಲೂ ನಿಮ್ಮನ್ನು ಸ್ತುತಿಸುತ್ತೇನೆ. ⁷ಅನೇಕರಿಗೆ ನಾನು ಆಶ್ಚರ್ಯವಾಗಿದ್ದೇನೆ, ಆದರೆ ನೀವೇ ನನ್ನ ಬಲವಾದ ಆಶ್ರಯ. ⁸ನನ್ನ ಬಾಯಿ ನಿಮ್ಮ ಸ್ತುತಿಯಿಂದಲೂ ದಿನವೆಲ್ಲಾ ನಿಮ್ಮ ಮಹಿಮೆಯಿಂದಲೂ ತುಂಬಿದೆ.

⁹ನನ್ನ ಮುಪ್ಪಿನ ಕಾಲದಲ್ಲಿ ನನ್ನನ್ನು ತಳ್ಳಿಬಿಡಬೇಡಿ; ನನ್ನ ಬಲ ಕುಂದಿಹೋದಾಗ ನನ್ನನ್ನು ಕೈಬಿಡಬೇಡಿ. ¹⁰ನನ್ನ ಶತ್ರುಗಳು ನನಗೆ ವಿರೋಧವಾಗಿ ಮಾತಾಡುತ್ತಾರೆ; ನನ್ನ ಪ್ರಾಣ ತೆಗೆಯಲು ಹೊಂಚುಹಾಕುವವರು ಒಟ್ಟಿಗೆ ಒಳಸಂಚು ಮಾಡುತ್ತಾರೆ. ¹¹ಅವರು, “ದೇವರು ಅವನನ್ನು ಕೈಬಿಟ್ಟಿದ್ದಾರೆ; ಅವನನ್ನು ಹಿಂಬಾಲಿಸಿ ಹಿಡಿಯಿರಿ, ಏಕೆಂದರೆ ಅವನನ್ನು ಬಿಡಿಸುವವರು ಯಾರೂ ಇಲ್ಲ,” ಎಂದು ಹೇಳುತ್ತಾರೆ.

¹²ನನ್ನ ತಂದೆಯೇ, ನನ್ನಿಂದ ದೂರವಾಗಿರಬೇಡಿ; ನನ್ನ ತಂದೆಯೇ, ನನ್ನ ಸಹಾಯಕ್ಕೆ ಬೇಗ ಬನ್ನಿ! ¹³ನನ್ನ ಮೇಲೆ ದೋಷಾರೋಪಣೆ ಮಾಡುವವರು ನಾಚಿಕೆಗೆ ಈಡಾಗಿ ನಾಶವಾಗಲಿ; ನನಗೆ ಕೇಡನ್ನು ಬಯಸುವವರು ನಿಂದೆಯಿಂದಲೂ ಅವಮಾನದಿಂದಲೂ ಮುಚ್ಚಲ್ಪಡಲಿ.

¹⁴ಆದರೆ ನಾನು ಎಡೆಬಿಡದೆ ನಿರೀಕ್ಷಿಸುತ್ತೇನೆ, ನಿಮ್ಮನ್ನು ಇನ್ನೂ ಹೆಚ್ಚುಹೆಚ್ಚಾಗಿ ಸ್ತುತಿಸುತ್ತೇನೆ. ¹⁵ನನ್ನ ಬಾಯಿ ನಿಮ್ಮ ನ್ಯಾಯನೀತಿಯನ್ನೂ ದಿನವೆಲ್ಲಾ ನಿಮ್ಮ ರಕ್ಷಣೆಯನ್ನೂ ವರ್ಣಿಸುತ್ತದೆ, ಅದರ ಪೂರ್ಣ ಪ್ರಮಾಣ ನನಗೆ ತಿಳಿಯದಿದ್ದರೂ. ¹⁶ಸಾರ್ವಭೌಮ ತಂದೆಯ ಪರಾಕ್ರಮಕಾರ್ಯಗಳನ್ನು ಸಾರುತ್ತಾ ನಾನು ಬರುತ್ತೇನೆ; ನಿಮ್ಮ ನ್ಯಾಯನೀತಿಯನ್ನೇ, ನಿಮ್ಮೊಬ್ಬರದನ್ನೇ ಪ್ರಕಟಿಸುತ್ತೇನೆ.

¹⁷ನನ್ನ ತಂದೆಯೇ, ನನ್ನ ಯೌವನದಿಂದ ನೀವು ನನಗೆ ಬೋಧಿಸಿದ್ದೀರಿ, ಈ ದಿನದವರೆಗೂ ನಾನು ನಿಮ್ಮ ಅದ್ಭುತಕಾರ್ಯಗಳನ್ನು ಸಾರುತ್ತೇನೆ. ¹⁸ಆದ್ದರಿಂದ ನಾನು ಮುದುಕನಾಗಿ ನರೆಕೂದಲಾದಾಗಲೂ, ನನ್ನ ತಂದೆಯೇ, ಬೇರೊಂದು ಸಂತತಿಗೆ ನಿಮ್ಮ ಭುಜಬಲವನ್ನೂ ಮುಂದೆ ಬರುವವರೆಲ್ಲರಿಗೆ ನಿಮ್ಮ ಸಾಮರ್ಥ್ಯವನ್ನೂ ಸಾರುವ ತನಕ ನನ್ನನ್ನು ಕೈಬಿಡಬೇಡಿ.

¹⁹ನನ್ನ ತಂದೆಯೇ, ನಿಮ್ಮ ನ್ಯಾಯನೀತಿ ಉನ್ನತ ಆಕಾಶದವರೆಗೂ ಮುಟ್ಟುತ್ತದೆ. ಮಹತ್ಕಾರ್ಯಗಳನ್ನು ಮಾಡಿದ ನನ್ನ ತಂದೆಯೇ, ನಿಮ್ಮ ಹಾಗೆ ಯಾರಿದ್ದಾರೆ? ²⁰ಅನೇಕ ಇಕ್ಕಟ್ಟುಗಳನ್ನೂ ವಿಪತ್ತುಗಳನ್ನೂ ನನಗೆ ತೋರಿಸಿದ ನೀವು ನನ್ನನ್ನು ಪುನಃ ಬದುಕಿಸುವಿರಿ; ಭೂಮಿಯ ಆಳದಿಂದ ನನ್ನನ್ನು ಪುನಃ ಮೇಲಕ್ಕೆ ತರುವಿರಿ. ²¹ನೀವು ನನ್ನ ಗೌರವವನ್ನು ಹೆಚ್ಚಿಸಿ ಇನ್ನೊಮ್ಮೆ ನನ್ನನ್ನು ಸಂತೈಸುವಿರಿ.

²²ನನ್ನ ತಂದೆಯೇ, ನಿಮ್ಮ ನಂಬಿಗಸ್ತಿಕೆಗಾಗಿ ನಾನು ಸ್ವರಮಂಡಲದಿಂದ ನಿಮ್ಮನ್ನು ಸ್ತುತಿಸುತ್ತೇನೆ; ಇಸ್ರಾಯೇಲಿನ ಪರಿಶುದ್ಧರೇ—ನನ್ನ ತಂದೆಯೇ, ಕಿನ್ನರಿಯಿಂದ ನಿಮ್ಮನ್ನು ಕೀರ್ತಿಸುತ್ತೇನೆ. ²³ನಾನು ನಿಮ್ಮನ್ನು ಕೀರ್ತಿಸುವಾಗ ನನ್ನ ತುಟಿಗಳು ಆನಂದದಿಂದ ಆರ್ಭಟಿಸುವವು, ನೀವು ವಿಮೋಚಿಸಿದ ನನ್ನ ಪ್ರಾಣವೂ ಆರ್ಭಟಿಸುವದು. ²⁴ನನ್ನ ನಾಲಿಗೆ ದಿನವೆಲ್ಲಾ ನಿಮ್ಮ ನ್ಯಾಯನೀತಿಯನ್ನು ವರ್ಣಿಸುತ್ತದೆ, ಏಕೆಂದರೆ ನನಗೆ ಕೇಡನ್ನು ಬಯಸಿದವರು ನಾಚಿಕೆಗೆ ಈಡಾಗಿ ಅವಮಾನಿತರಾಗಿದ್ದಾರೆ.