Joel 3

3 ¹"Kaja yanglu, chi zimikshobingli kala chi atamli, ina Judah eina Jerusalemwui lan hanmiluishit tharan, ²Ina yur saikorali kazipkhuira, kala athumli Jehoshaphatwui tampākli khuitāra. Chili athumna yur ngachaili raithā ngasakkahai iwui mibing, iwui shimlui Israelwui vang, ina athumli bichar sāra; kaja athumna iwui ngalei ngayarkhaida, ^a a v2 Jehoshaphat da kaji hina "Avāna bichar sāra" da kahāngna — tampāk chiwui ming chi khalatta chili shokkahai bichar chi phongshoka. ³kala athumna iwui mibingwui vang kalā yanga. Athumna khayorva̱ eina naoshinao akha ngatha̱ya, kala mangkhavai drakhāra̱ eina sha̱nao akha yorhaowa.

⁴"Ara, Tyre eina Sidon, kala Philistinewui ngalei saikora, nathumna iwuitungli khi ningkachai lei? Nathumna ina sākahai khikhawui athut ili samikharān sāli? Nathumna ili athut miakha, ina thaklāk eina, masikhon eina, nathumna sākahai chi nathum khalattawui kuili athut samiluira. ⁵Kaja nathumna iwui lupā eina iwui sinā khuiya, kala iwui lan mathāmeikapbing nathumwui khorumshimli khuizanghaowa. ⁶Nathumna Judah eina Jerusalemwui mibingli, athum khalattawui ngaleiwui eina katāva̱li chihovā khavai, Greeknaobingli yorhaowa.

⁷"Kha yanglu, nathumna athumli yorkasang apam chiwui eina ina athumli ngakarthuira, kala nathumna sākahai chi nathum khalattawui kuili athut samiluira. ⁸Ina nathumwui naomayarabing eina naongalāva̱bingli Judahwui mibingli yorra, kala athumna Sabeanaobingli, katāva̱li khalei yur akhali yorra; kaja ithumwui Avāna hānghaira."

⁹Hi yurbingwui ngachaili phongshoklu: Rai khavai ngarānlu! Raikapingbingli ngakarthuilu! Raimi saikora rānganaida kairanu. ¹⁰Nathumwui kārphāngbing chi raighai sākhuilu, kala nathumwui khainaobing chi kazei sākhuilu; kapang makhaleiabing china, "I raikapinga akhana" da hāngranu. ¹¹Kathakta rālu, nathum kuimareidawui yurbing saikora, kala chili nathum khalatta rākazipserlu. O ithumwui Avā, nawui raikapingbingli khuikatāmilu.

¹²"Yur khalatta ngakarthuida Jehoshaphatwui tampākli kairanu; kaja chili ina kuimareidawui yur saikorali bichar sākhavai pamra. ¹³Chāngkui khayitlu, kaja mahā minhaira. Rālu, naikazamlu, kaja drakhāra̱surpam pemhaira, kala vaichumbing pemtha̱-pemtai ngasakra—kaja athumwui makaphā-makhayā mahakmahāna."

¹⁴Tuikupwui tampākli mi kachungkha, mi kachungkha lei! Kaja tuikupwui tampākli ithumwui Avāwui zimiksho nganaihaira. ¹⁵Zimik eina kachāng tangmangtinghaira, kala sirābingna athumwui kahor khāmkhuihaira. ¹⁶Zionwui eina ithumwui Avāna khanganga; awui akhon chi Jerusalemwui eina vaowa; kazingram eina okathui nganuka. Kha ithumwui Avā awui mibingwui ngayin khavaina, Israelnaobingwui raipanna.

Avāna Awui Mibingli Hanmiluishitmi

¹⁷"Chithākha iwui kathara kaphung Zionli pamda khalei I nathumwui Avāna da nathumna theira. Jerusalem kathara sāra, kala yur kateibingna latluida chiwui alungli makāluimara.

¹⁸"Kala chithanghon kaphungbingna kashima drakhāra̱ ngayira, phungrābingna seina̱na longra, kala Judahwui kong saikora tara̱na longra. Iwui shimwui eina ura̱ akha shokra kala acaciathing tampākli tara̱ chaikhamira. ¹⁹Egypt ramcho ngasāhaora kala Edom ngachakyang kahai lamhāng ngasāhaora, Judahwui mibingli khangashaowui vang, athumwui ngaleili khayon makhalei ashee tākhangasakwui vang. ²⁰Kha Judahli mashimānda mi panluira, kala Jerusalemli thot kachida okthuichingra. ²¹Athumwuitungli tākahai ashee khayonkhamāng ina tharmira—ina matharmirangsai chi—kaja ithumwui Avā Zionli pama." ^b b v21 Bible khangateibingna "athumwui ashee athut khuira" da hāng apamli, ithumwui Avāna awui naobingli, athumwui ashee tākahaibingwui eina nganingkham kahaina—khamashung khuirāda, malung maleila athut kakhui masāna.