Uba Yana Shari'ar Al'ummai
Al'ummai da suka sayar da 'ya'yan Yahuda, suka kwashe dukiyar haikali, ana kiransu su gangara zuwa Kwarin Yehoshafat domin shari'a. Ubanmu yana ruri daga Sihiyona, duk da haka shi mafaka ne ga mutanensa; tuddai suna malalar ruwan inabi, shi kuma yana zaune a Sihiyona.
3 1“Gama ga shi, a kwanakin nan da kuma a wannan lokaci, sa'ad da na maido da zaman lafiyar Yahuda da Urushalima, 2zan tara dukan al'ummai in kuma kawo su kwarin Yehoshafat. A can zan yi musu shari'a saboda mutanena, gādona Isra'ila, waɗanda suka warwatsa a cikin al'ummai; gama sun raba ƙasata, a a v2 Yehoshafat yana nufin “Uba yana shari'a” — sunan kwarin yana shelar shari'ar da take faruwa a can. 3sun kuma jefa ƙuri'a a kan mutanena. Sun ba da yaro a musayar karuwa, suka kuma sayar da yarinya domin ruwan inabin da za su sha.
4“Yanzu fa, me kuke da shi a kaina, ya Taya da Sidon, da dukan yankunan Filistiya? Kuna rama mini wani abin da na yi ne? In kuna rama mini, da sauri da kuma hanzari zan maido da abin da kuka yi a kan kawunanku. 5Gama kun ɗauki azurfata da zinariyata kuka kuma kai kyawawan dukiyoyina cikin haikalanku. 6Kun sayar da mutanen Yahuda da Urushalima ga Hellenawa, domin ku kai su nesa daga ƙasarsu.
7“Amma ga shi, ina tā da su daga wurin da kuka sayar da su, zan kuma maido da abin da kuka yi a kan kawunanku. 8Zan sayar da 'ya'yanku maza da mata ga mutanen Yahuda, su kuma za su sayar da su ga Sabeyawa, ga al'ummar da take da nisa— gama Ubanmu ya yi magana.”
9Ku yi shelar wannan a cikin al'ummai: Ku shirya don yaƙi! Ku tā da jarumai! Bari dukan mayaƙa su matso su kuma hauro. 10Ku ƙera garemunanku su zama takuba ku kuma mai da laujunanku māsu; bari rarauna ya ce, “Ni jarumi ne.” 11Ku yi hanzari ku zo, dukanku al'umman da suke kewaye, ku kuma tattara kanku a can. Ka saukar da jarumanka, ya Ubanmu.
12“Bari al'ummai su tā da kansu su kuma hauro kwarin Yehoshafat; gama a can zan zauna domin in yi wa dukan al'umman da suke kewaye shari'a. 13Ku sa lauje, gama girbi ya nuna. Ku zo, ku tattake, gama wurin matsin inabi ya cika, randuna kuma suna ta zubowa— gama muguntarsu tana da yawa.”
14Taron mutane, taron mutane a kwarin yanke hukunci! Gama ranar Ubanmu ta yi kusa a kwarin yanke hukunci. 15Rana da wata za su yi duhu, taurari kuma za su hana haskensu. 16Ubanmu yana ruri daga Sihiyona yana kuma tā da muryarsa daga Urushalima; sammai da ƙasa suna rawar jiki. Amma Ubanmu mafaka ce ga mutanensa, kagara ce ga 'ya'yan Isra'ila.
Uba Ya Maido da Mutanensa
17“Sa'an nan za ku sani cewa ni ne Ubanku, wanda yake zaune a Sihiyona, dutsena mai tsarki. Urushalima za ta zama mai tsarki, baƙi kuma ba za su ƙara ratsa ta ba.
18“A wannan rana kuwa duwatsu za su ɗiga da sabon ruwan inabi, tuddai kuma za su gudana da madara, dukan koramun Yahuda kuma za su gudana da ruwa. Maɓulɓula kuma za ta ɓulɓulo daga gidana ta kuma ban ruwa ga kwarin itatuwan ƙaya. 19Masar za ta zama kango, Edom kuma za ta zama hamada mai zaman kufai, saboda ta'addancin da aka yi wa mutanen Yahuda, a ƙasarsu kuwa suka zubar da jini marar laifi. 20Amma Yahuda za ta kasance da mazauna har abada, Urushalima kuma har dukan tsararraki. 21Zan tsarkake laifin jini da aka zubar a kansu—wanda har yanzu ban tsarkake ba—gama Ubanmu yana zaune a Sihiyona.” b b v21 Inda sauran Littattafai Masu Tsarki suka ce “a rama jininsu,” Ubanmu yana kāre 'ya'yansa daga waɗanda suka zubar da jininsu — yana kawo baratarwa, ba ramuwar gayya marar tausayi ba.