Kamaisa khatle Dragon
Pum rit ngaaknu kamaisa khat, khatle basa ding sa sat lang ngaaknu dragon khat. Basa ding ani Pa khatle Batakung riak khou kai thou thang rwe, kamaisa ga ramhaang la pak thou drwe, khatle Michael na dragon ding tambaan lana zwan thou latne. Ngam za makka, maan gana mannu om sa katei rwan khou han thou drwe—baom chakrin titcha briakpina balung pwanga.
12 1Tambaan la kaliannu badan khat hung tan rwe: kamaisa khat lumik pwan sinluga, baket nung bi tha amme, khatle balu bi insi som khatle ni om luthop amme. 2Maan pum rit ngaake, khatle nao lung lang nainu kaan bi riangrenu briakpina, nao amnu riangre khaangga paoga ongme.
3Atiga tambaan la badan katei khat hung tan rwe: kaliannu mei danga kasennu dragon khat, lu siari khatle bataki som amme, khatle balu bing bi luthop siari amme. 4Bakamei na tambaan la insi bing om inthum om khat ding talei bi kai sat rwe. Dragon ga nao am ding kamaisa meithaan bi han ong ngaake, khatle nao pon swaknu dat pi Basa ding sa sat lang daan ong ngaake. 5Maan sa kapaisa khat, kapaisa naosen—Jisu—pon thang rwe; Maan gana chaat nun bing ding thin sungrwanna sianlune. Atiyeda Basa ding ga ani Pa khatle Batakung riak khou kai thou thang rwe. 6Kamaisa ga ramhaang la pak thou drwe, haga ani Pa na daan thangnu rammwan khou, habei ga ni raching khat raza ni somruk babaang imba to thanglune.
7Tambaan la kraan hou thou rwe: Michael le baom tambaan chonglang rwan na dragon le diga katwak ngaake, khatle dragon le baom tambaan chonglang rwan na le katak katwak rwe. 8Atiyeda maan gana ngam mak ngaake, khatle tambaan la bani ongnu rammwan ga braan rwe. 9Kaliannu dragon—Diabol le Seitaan diga kounu, talei ram prip ding minamnu, kama meithaan om barun—talei bi bazwan thang rwe, khatle baom tambaan chonglang rwan le maan le diga bazwan thang rwe.
10Atiga tambaan la basaangnu khwan khat eina ngaisu rwe, “Atun ani Pa om ringriak, ngam khatle krwang talei hung tang rwe, khatle Baom Christa om ngam le. Balangbe ani unao rwan ding ani Pa meithaan bi zing le lumik koi impu thangnu ga, talei bi bazwan thang rwe.” 11Banina Zao saza om thi paan bina khatle bani om indaonu chong paan bina maan ding kraan ngam rwe; banina thi tanu tangga le bani om ringnu ding kriang mak ngaake. 12Atibriakpina, nani tambaan rwan khatle habei ongnu nani le karowo! Atiyeda talei le tuipui lang aih sia yeda, balangbe Diabol gana baom bakaan toi rwe dinu theiga, kaliannu balung pwanna nani khou basaam ta hung rwe.
13Dragon gana maan ding talei bi bazwan thang rwe dinu munu kaan bi, kapaisa naosen pon thangnu kamaisa ding zong rwe. 14Kamaisa na, ramhaang bi maan lang daan thangnu rammwan khou bak thou lang, kaliannu mureng om batha kani lousu rwe. Habei ga barun na lou thang mak lang, kaan khat, kaan nun khatle kaan baang khat imba to thanglune. 15Barun na, tui lian na kamaisa ding phun thou lang, babao bina kamaisa ding tuiqwa danga tui lwang swak rwe. 16Talei na, bamun lat swakluga, dragon na babao bina lwang swaknu tuiqwa ding dwan satluga, kamaisa ding paang thang rwe. 17Kamaisa ding dragon balung pwan takka, ani Pa om zathang bing zeinu khatle Jisu om indaonu chong ding bangnu, maan om kik taat katei rwan le diga kraan katwak lang se rwe.