Sha̱nao kala Dragon
Nao kazang sha̱nao akha, kala awui nao shaikhavai ngarānda nganing dragon akha. Nao chi ithumwui Avāwui wungpamkhongli khāngkhuivāhaowa, sha̱nao lamhāngli yāmhaowa, kala Michaelna dragonli kazingramwui eina horthuihaowa. Yuikahai china awui ara̱-azā sangleibingli rai sāda — awui atam mānga da theida malungkhavāt.
12 1Kazingramli machut reikhamatai akha shoka: sha̱nao akha zimik ngavaida, kachāng awui pheizingli, kala akuili sirā tharāda khaniwui kuihon akha ngahona. 2Ana nao vaida, naosakwui kachotkachāng lungli naokhara̱ eina panglāk eina vaokai.
3Chiwui thili kazingramli machut khangatei akha shoka: dragon reikhamatai ahunga akha; ana akui shini, angaji tharā kai, kala akuibingli kuihon shini ngahona. 4Akhamei china kazingramwui sirā kathumshi akha ngaleili suikhui. Dragon china awui nao pharāleoda tukshai khavai ngarānda, nao pharāt khavai sha̱nao chiwui mangāli nganinga. 5Ana naomayara akha, mayarnao akha pharai; chi Jishuna, kala ana mari lijei eina yur saikorali mungra. Kha awui nao chi ithumwui Avā kala awui wungpamkhongli khāngkhuivāhaowa. 6Ithumwui Avāna awui vang ngarān kahai apam akhali, chili thang 1,260 phaui ngasak khavai, sha̱nao chi lamhāngli yāmhaowa.
7Kazingramli rai shokkahaina: Michael kala awui kazingraobingna dragon chili rai rātai, kala dragon kala awui kazingraobingna rai ngarara. 8Kha dragon china matangkhuimana, kala kazingramli athumwui apam khipākha matheithuwa. 9Kasara phara̱, Chipee kala Satan da hokahai, okathui saikorali kanguikahai dragon reikhamatai chi ngaleili horsanghaowa; awui kazingraobingla ali ngasoda horsanghaowa.
10Chiwui thili kazingramli akhon panglāk akha ina shai: 'Ara ithumwui Avāwui huikhami, pangshap, wungram, kala awui Khristawui pangshap rāhaira. Kaja ithumwui vānaobingli ithumwui Avāwui mangāli ngashun ngayā khayon mikahai chi horsanghaowa.' 11Athumna yaonaowui ashee eina, kala athumwui shākhi tui eina ali khayuina; kathi eina tangda athumna khalattawui manglā mirinli mashurmana. 12Chiwui vang eina, kazingram nathum kala chilungli leiping nathum ringphāchinglu! Kha kakhanang okathui kala shamadruwui ngasāranu, kaja awui atam mānga da theida, Chipee chi malungkhavāt reikhamatai eina nathumli rātāhaira.
13Dragon china a ngaleili horsanghaira kaji theitharan, mayarnao pharākakhui sha̱nao chili kharomkhui. 14Lamhāngli awui vang ngarān kahai apam chili yongvai khavai, kala chili phara̱wui eina thuida atam akha, atambing, kala atam tangkhai phaui ngasak khavai, sha̱nao chi khalāng reikhamataiwui angachāng khani samphanga. 15Tara̱ kaphong eina ali khuithuihai khavai, phara̱ china akhamor eina sha̱nao chiwui tharishong kongrā thāda tara̱ shokthata. 16Ngaleina sha̱nao chili ngachonmi, akhamor shohaida dragon china akhamor eina shokthata kongrā chi yuisanghaowa. 17Sha̱nao chili malungvāthaida, dragon china awui ara̱-azā sangleibing, ithumwui Avāwui ningkhami mayonda Jishuwui shākhi singtitbing chili, rai sākhavai vai.
