ښځه او اژدها
یوه امیندواره ښځه، او یو اژدها چې د هغې د ماشوم خوړلو ته انتظار باسي. ماشوم د زموږ پلار تخت ته وړل کېږي، ښځه دښتې ته تښتي، او میکائیل اژدها له آسمان څخه لرې غورځوي. ماتې خوړلی اژدها د هغې پر نورو اولادونو راګرځي، په غوسه دی ځکه چې وخت یې لنډ دی.
12 1په آسمان کښې يوه لويه نښه ښکاره شوه: يوه ښځه چې لمر يې اغوستے وو، سپوږمۍ د هغې د پښو لاندې وه، او د دولسو ستورو تاج يې په سر وو. 2هغه اُميدواره وه او د زيږون د دردونو نه يې چغې وهلې، د زيږولو په تکليف کښې وه.
3بيا په آسمان کښې بله نښه ښکاره شوه: يوه لويه د اور په شان سره اژدها چې اوۀ سرونه، لس ښکرونه، او د هغې په سرونو اوۀ تاجونه وُو. 4د هغې لکۍ د آسمان د ستورو دريمه حصه زمکې ته راکش کړه. اژدها د هغې ښځې مخکښې ودرېده چې د زيږولو نژدې وه، دې دپاره چې د هغې بچے چې کله هم وزيږيږى هماغه وخت يې وخورى. 5هغې يو زوئ وزيږولو، يو نارينه بچے — عيسىٰ — چې ټولو قومونو باندې به د اوسپنې په لښتې حکومت کوى. خو د هغې بچے زمونږ پلار او د هغۀ تخت ته پورته کړے شو. 6ښځه بيابان ته وتښتېده، هغه ځائ ته چې زمونږ پلار تيار کړے وو، دې دپاره چې هلته يې ۱۲۶۰ ورځې روزى ورکړے شى.
7په آسمان کښې جنګ شروع شو: ميکائيل او د هغۀ فرښتو د اژدها سره جنګ وکړو، او اژدها او د هغې فرښتو مقابله وکړه. 8خو هغه دومره زورور نۀ وو، او هغوئ په آسمان کښې خپل ځائ له لاسه ورکړو. 9هغه لويه اژدها — هغه زوړ مار چې اِبليس او شيطان ورته وئيلے کيږى، د ټولې دُنيا دوکه ورکوونکے — زمکې ته وغورزولے شو، او د هغۀ فرښتې هم د هغۀ سره.
10بيا ما په آسمان کښې يو زورور آواز واورېدو چې، ”اوس زمونږ د پلار خلاصون، قدرت او بادشاهى راغلل، او د هغۀ د مسيح اختيار هم. ځکه چې زمونږ د وروڼو او خويندو تورنوونکے، چې د زمونږ پلار مخکښې يې د هغوئ شپه او ورځ تورونه کول، وغورزولے شو.“ 11هغوئ د ګډوريانى د وينې په وسيله او د خپلې ګواهۍ د کلام په وسيله پرې غالب شول؛ هغوئ په خپل ژوند پورې نۀ وو نښتى، ان تر مرګه پورې. 12نو اے آسمانونو او تاسو چې په هغو کښې اوسئ، خوشحالى وکړئ! خو په زمکه او سمندر افسوس، ځکه چې اِبليس تاسو ته په لويه غصه سره راکوز شوے دے، ځکه چې هغه پوهيږى چې د هغۀ وخت لنډ دے.
13کله چې اژدها وليدل چې هغه زمکې ته وغورزولے شو، نو هغې د هغې ښځې تعاقب وکړو چې نارينه بچے يې زيږولے وو. 14هغې ښځې ته د لوى عقاب دوه وزرونه ورکړے شول، دې دپاره چې بيابان ته هغه ځائ ته والوزى چې د هغې دپاره تيار کړے شوے وو، چرته چې به د مار له لاسه لرې، د يوې زمانې، زمانو او نيمې زمانې دپاره روزى ورکړے کيده. 15مار د خپلې خولې نه د ښځې پسې د سيند په شان اوبۀ راوغورزولې، دې دپاره چې هغه په سېلاب کښې يوسى. 16زمکې د ښځې مدد وکړو، خپله خوله يې پرانستله او هغه سيند يې وتېر کړو چې اژدها د خپلې خولې نه راغورزولے وو. 17اژدها په ښځه غصه شوه، نو د هغې د پاتې اولاد سره يې جنګ ته لاړه — هغه کسان چې د زمونږ پلار حُکمونه ساتى او د عيسىٰ ګواهى ټينګوى.
