ራእይ 12

12 ¹ታላቅ ምልክት በሰማይ ታየ፤ ፀሐይን የተጎናጸፈች፣ ጨረቃ ከእግሮቿ በታች ያለች፣ በራስዋም ላይ የዐሥራ ሁለት ከዋክብት አክሊል የደፋች ሴት ነበረች። ²እርጉዝም ነበረች፤ በምጥ ጣር ተይዛ ለመውለድ እየተቃጠለች ትጮኽ ነበር።

³ከዚያም ሌላ ምልክት በሰማይ ታየ፤ ሰባት ራሶች፣ ዐሥር ቀንዶችና በራሶቹ ላይ ሰባት አክሊሎች ያሉት ግዙፍ፣ የእሳት ቀይ ዘንዶ ነበር። ⁴ጅራቱም ከሰማይ ከዋክብት ሲሶውን ጎትቶ ወደ ምድር ጣላቸው። ዘንዶውም ልጅዋን በተወለደ ጊዜ ወዲያውኑ ለመብላት ተዘጋጅቶ፣ ልትወልድ ባለች ሴት ፊት ቆመ። ⁵ወንድ ልጅ፣ አሕዛብን ሁሉ በብረት በትር የሚገዛ ወንድ ልጅ፣ ኢየሱስን ወለደች። ልጅዋ ግን ወደ አባታችንና ወደ ዙፋኑ ተነጠቀ። ⁶ሴቲቱም በዚያ ሺህ ሁለት መቶ ስድሳ ቀን እንድትመገብ አባታችን ወዳዘጋጀላት ስፍራ፣ ወደ ምድረ በዳ ሸሸች።

⁷በሰማይም ጦርነት ተነሣ፤ ሚካኤልና መላእክቱ ከዘንዶው ጋራ ተዋጉ፤ ዘንዶውና መላእክቱም መልሰው ተዋጉ። ⁸ነገር ግን አቅም አጣ፤ በሰማይም ስፍራቸውን አጡ። ⁹ታላቁም ዘንዶ፣ ዓለሙን ሁሉ የሚያስተው ዲያብሎስና ሰይጣን የተባለው የቀደመው እባብ፣ ወደ ምድር ተጣለ፤ መላእክቱም ከእርሱ ጋራ ተጣሉ።

¹⁰ከዚያም በሰማይ ታላቅ ድምፅ ሰማሁ፤ “አሁን የአባታችን ድነት፣ ኀይልና መንግሥት፣ የክርስቶሱም ሥልጣን መጥቷል፤ ወንድሞቻችንንና እኅቶቻችንን ሌሊትና ቀን በአባታችን ፊት የሚከሳቸው ከሳሽ ተጥሏልና።” ¹¹በበጉ ደምና በምስክርነታቸው ቃል እርሱን ድል ነሡት፤ ሕይወታቸውንም እስከ ሞት ድረስ አልሳሱም። ¹²ስለዚህ እናንተ ሰማያት፣ በእነርሱም የምትኖሩ ሆይ፣ ደስ ይበላችሁ! ነገር ግን ዲያብሎስ ጊዜው ጥቂት እንደ ሆነ ዐውቆ በታላቅ ቍጣ ወደ እናንተ ወርዷልና ለምድርና ለባሕር ወዮላቸው።

¹³ዘንዶውም ወደ ምድር እንደ ተጣለ ባየ ጊዜ፣ ወንዱን ልጅ የወለደችውን ሴት አሳደደ። ¹⁴ሴቲቱም ከእባቡ ፊት ርቃ በምድረ በዳ ወደ ተዘጋጀላት ስፍራ ትበር ዘንድ፣ በዚያም ለአንድ ዘመን፣ ለዘመናትና ለዘመን እኩሌታ ትመገብ ዘንድ፣ የታላቁ ንስር ሁለት ክንፎች ተሰጧት። ¹⁵እባቡም ሴቲቱን በጎርፍ ጠርጎ ሊወስዳት ከአፉ እንደ ወንዝ ያለ ውሃ በስተ ኋላዋ አፈሰሰ። ¹⁶ምድርም ሴቲቱን ረዳቻት፤ አፏን ከፍታም ዘንዶው ከአፉ ያፈሰሰውን ወንዝ ዋጠች። ¹⁷ዘንዶውም በሴቲቱ ተቈጥቶ የቀሩትን ዘሮቿን ለመውጋት ሄደ፤ እነርሱም የአባታችንን ትእዛዛት የሚጠብቁ፣ የኢየሱስንም ምስክርነት የሚይዙ ናቸው።