Macen da Dodon Ruwa

Mace mai ciki, da dodon ruwa yana jira ya cinye ɗanta. An fizge ɗan zuwa kursiyin Ubanmu, macen ta gudu zuwa jeji, Mika'ilu kuma ya jefar da dodon ruwan daga Sama. Da aka ci shi, ya juya kan sauran 'ya'yanta — a husace domin lokacinsa kaɗan ne.

Babi na 12.

Sai wata babbar alama ta bayyana a Sama: wata mace saye da rana, wata yana ƙarƙashin ƙafafunta, da kambi na taurari goma sha biyu a kanta. Tana da ciki, tana kuka saboda naƙuda, cikin azabar haihuwa.

Sai wata alama ta bayyana a Sama: wani babban dodon ruwa ja wur kamar wuta, mai kawuna bakwai da ƙahoni goma, da kambuna bakwai a kawunansa. Wutsiyarsa ta share kashi ɗaya bisa uku na taurarin Sama, ta jefar da su ƙasa. Dodon ruwan ya tsaya a gaban macen da take gab da haihuwa, a shirye yă haɗiye ɗanta da zarar an haife shi. Ta haifi ɗa, ɗa namiji — Yesu — wanda zai yi mulkin dukan al'ummai da sandar ƙarfe. Amma aka ɗauki ɗanta zuwa wurin Ubanmu da kuma kursiyinsa. Macen ta gudu zuwa jeji, zuwa wani wuri da Ubanmu ya shirya mata, domin a ciyar da ita a can kwana dubu da ɗari biyu da sittin.

Sai yaƙi ya ɓarke a Sama: Mika'ilu da mala'ikunsa suka yi yaƙi da dodon ruwan, dodon ruwan kuma da mala'ikunsa suka yi ta ƙarawa. Amma ƙarfinsa bai isa ba, suka kuma rasa wurinsu a Sama. Aka jefar da babban dodon ruwan ƙasa — macijin nan na dā wanda ake kira Iblis da Shaiɗan, mai ruɗar da dukan duniya — shi da mala'ikunsa aka jefar da su tare.

Sai na ji wata murya mai ƙarfi a Sama tana cewa, “Yanzu ceto da iko da Mulkin Ubanmu sun zo, da kuma ikon Almasihunsa. Gama an jefar da mai ƙararar 'yan'uwanmu, wanda yake ƙararsu a gaban Ubanmu dare da rana.” Suka rinjaye shi ta wurin jinin Ɗan Rago da kuma ta wurin maganar shaidarsu; ba su nuna ƙaunar ransu ba, har ma ga mutuwa. Saboda haka, ku yi murna, ya ku sammai, ku kuma da kuke zaune a cikinsu! Amma kaiton ƙasa da teku, domin Iblis ya sauko muku da fushi mai ƙarfi, yana sane cewa lokacinsa ya yi kaɗan.

Da dodon ruwan ya ga an jefar da shi ƙasa, sai ya bi macen da ta haifi ɗa namijin. Aka ba macen fikafikai biyu na babban gaggafa, domin tă tashi zuwa wurin da aka shirya mata a jeji, inda za a ciyar da ita har lokaci guda, da lokuta biyu, da rabin lokaci, a nesa inda macijin ba zai kai gare ta ba. Macijin ya tofa ruwa kamar kogi daga bakinsa bayan macen, domin ambaliyar tă kwashe ta. Amma ƙasa ta taimaki macen, ta buɗe bakinta ta haɗiye kogin da dodon ruwan ya tofa daga bakinsa. Sai dodon ruwan ya husata da macen, ya tafi yă yi yaƙi da sauran zuriyarta — waɗanda suke kiyaye dokokin Ubanmu, suke kuma riƙe da shaidar Yesu.