Israel om ring lang laa
Kaikhongnu laa.
Israel na, ating lailon chung bi kasei ka lou chatnu atiyeda ngam maknu munanu nun ding paoluga, riangre khak khouna ring zoknu mi danga rinne. Kou damnu kasianu ga lou to om danga gaye: bani ga in chung la ongnu lousam, mong thou aang makka baowei tanu danga ong ding ngo, atiga taram serwannu nunna bani khou rithoi pi lang kat thang mak dingnuwe.
129 1“Ei naosen badona banina ating taswang khak lang kachat pi thang rwe” diga Israel na atun rin ding ngo. 2“Ei naosen badona banina ating taswang khak lang kachat pi thang rwe, atiyeda banina ating ngam make. 3Lou chatnu nunna ating lailon chung bi lou chat rwe; banina bani om loukaamong ga seiga to rwe.” 4Ani Pa ga ririak senuwe; Maanna kasianu nun om senrui ding tanchat rwe.
5Zion ding batannu mi bing ga kazak khatle nung la kanei lat ding ngo. 6Bani ga in chung la ongnu, mong thou aang makka baowei tanu lousam dan ding ngo, 7Haga lou aatnu na bakut thangsip make, baza khomnu na le bapwam thangsip make, 8Taram serwannu nun na hadanga rin make, “Ani Pa om rithoi ga nani lu chung bi ong ding ngo! Ani Pa meng bi anina nani ding rithoi pi thang nge.”