സങ്കീർത്തനങ്ങൾ 129 FHB Father's Heart Bible™

129 ¹“എന്റെ യൗവനംമുതൽ അവർ എന്നെ അതിയായി പീഡിപ്പിച്ചിരിക്കുന്നു” എന്ന് ഇസ്രായേൽ ഇപ്പോൾ പറയട്ടെ. ²“എന്റെ യൗവനംമുതൽ അവർ എന്നെ അതിയായി പീഡിപ്പിച്ചിരിക്കുന്നു, എങ്കിലും എന്നെ ജയിച്ചടക്കിയിട്ടില്ല. ³ഉഴവുകാർ എന്റെ മുതുകിൽ ഉഴുതു; തങ്ങളുടെ ചാലുകൾ അവർ നീളത്തിൽ കീറി.” ⁴നമ്മുടെ പിതാവ് നീതിമാനാകുന്നു; ദുഷ്ടന്മാരുടെ കയറുകൾ അവിടുന്ന് അറുത്തുകളഞ്ഞിരിക്കുന്നു.

⁵സീയോനെ വെറുക്കുന്നവരെല്ലാം ലജ്ജിച്ച് പിന്തിരിഞ്ഞുപോകട്ടെ. ⁶വളരുംമുമ്പേ വാടിപ്പോകുന്ന പുരമേൽപുല്ലുപോലെ അവർ ആയിത്തീരട്ടെ, ⁷കൊയ്യുന്നവൻ അതുകൊണ്ട് തന്റെ കൈയും കറ്റ കെട്ടുന്നവൻ തന്റെ മാറിടവും നിറയ്ക്കുന്നില്ല, ⁸കടന്നുപോകുന്നവർ “നമ്മുടെ പിതാവിന്റെ അനുഗ്രഹം നിങ്ങളുടെമേൽ ഉണ്ടാകട്ടെ! നമ്മുടെ പിതാവിന്റെ നാമത്തിൽ ഞങ്ങൾ നിങ്ങളെ അനുഗ്രഹിക്കുന്നു” എന്ന് പറയുന്നതുമില്ല.