Psalms 129

129 ¹ "Dem don suffer me well well from wen I young" — make Israel talk am now — ² "Dem don suffer me well well from wen I young, but dem never win me." ³ Dem wey dey plow ground plow for my back; dem make di line wey dem dig long. ⁴ our Papa dey correct and holy; e don cut di rope of di wicked people.

⁵ Make everybody wey hate Zion get shame, make dem turn back. ⁶ Make dem be like grass wey dey grow for house roof, wey dey dry before e grow well, ⁷ wey person wey dey harvest no fit take fill him hand, wey person wey dey gather grain no fit take fill him arm, ⁸ while people wey dey pass no go talk say, "Make di blessing of our Papa dey on una! We bless una for di name of our Papa."