Mosa hatbü
Mosaei jongaikei: haoenei kü to amaialemlabü, ngo maiko lenla athükda, lu müt che sendeiashi. Hao to ju, kaoa pinyu la yeibü, hoba ik, meibü hoba sakteibü la yeibü, hoba ngaola Aron haoeibü sembung la kukei. Israel seneibü Bou nashou shaangbü ki, hoba Faraoei hao hautiashi dogo laukei.
4 1Mosaei jongaikei, “Lausikei haoenei kü to maialemlabü ayingsi kü ngüh aditlabü, aishanga haoenei laulabü, ‘Seneibü Bou ka jungto alongkei.’”
2Seneibü Bouei hao to laukei, “Kaibü ika ho ai ki?” Haoei laukei, “Ju che.”
3Haoei laukei, “Kho kaoa attiashi.” Haoei kho kaoa attikei, hoba kho pinyu che la yeikei, hoba Mosa kho jungka laangjung satkei.
4Lausikei seneibü Bouei Mosa to laukei, “Kaibü ik shingan kho meia lapshi”—haoei ik shingan, kho lapbei, hoba kho haoeibü ika ju la yeikei. 5“Khei kaibü Bou, haoeneibü bousi shuongeibü Mühghaü, Abraham, Isak hoba Jakobeibü Mühghaü, ka jungto longkei dogo haoenei mailemlabü.”
6Hobaje seneibü Bouei hao to lenkei, “Kaibü ik kaibü neisimeia jungashi.” Hibü haoei kümbei, hoba ladang haoei kho yaüankei, haoeibü ik to im longkei, ninthu tegü thupaitham kikei.
7Haoei laukei, “Kaibü ik kaibü neisimeia nyibou jungashi.” Haoei kümbei, hoba ladang haoei kho yaüankei, kho haoeibü phe joubü tegü maian apbei.
8“Khei haoenei ka to maialemlonga ayingsi shaangbü tetsida ngüh aditlonga, haoenei nyiboubü tetsida mailemlabü. 9Khei haoenei ho tetsida nyi kathe maialemlonga ayingsi kaibü ngüh aditlonga, nyi shumang ka dei sungan kao ulangbüa jonashi; hoba shumang ka sungbü dei kho kao ulangbüa sii la yeilabü.”
10Lausikei Mosaei seneibü Bou to laukei, “Sanoudambo, kü Abou, ngo ladangkei ngühangbou akitei, shaang yingsikei nyi kaibü khangenbou to joyokei phai yingsikei; aishanga ngo ngühang sekbü hoba lishang sekbü ki.”
11Hobaje seneibü Bouei hao to laukei, “Aoei müt la sembung kukei? Aoei hao to ngoubü ayingsi obangbü, chühbü ayingsi nyekthubü kümda? Kho ngo, kaibü Bou, aying lo? 12Tou hauashi, hoba ngo kaibü sembung yoa kilabü, hoba ngei ka to ai laulaje lenlabü.”
13Lausikei haoei laukei, “Sanoudambo, kü Abou, lubü müt che hautiashi.”
14Hobaje seneibü Bou Mosa khulimbo khauangkei. Haoei laukei, “Levibü Aron kaibü na aki lo? Haoei maiko joyoda dogo ngei ngeakei. Chühashi, tou haoei ka to haüyola longko kida, hoba haoei ka hapjinei haoeibü maangpona olinyolabü. 15Nyi hao to joyoashi; hoba ngüh haoeibü sembunga phoashi. Ngo kaibü sembung hoba haoeibü sembung yoa kilabü, hoba kasi ai kümlaje ngei lenlabü. 16Haoei ka shanga mütshuong to joyolabü, hoba haoei kaibü sembung kilabü, hoba nyi hao to Mühghaü tegü kilabü. 17Hoba ho ju kaibü ika jungashi, hoba tetsida kümla shanga kho jungeiashi.”
Mosa Jethro jungka ngaibü
18Mosa hao kounyangbou Jethro jungto ngaikei hoba laukei, “Haoen tou lang kia lo dogo chühla shanga, ngo Ijepa kü jaisi shuong jungto sepeinyu haukho.” Hobaje Jethroei laukei, “Sangmaia hauashi.”
19Hobaje seneibü Bouei Midiana Mosa to laukei, “Ijep to sepeinyu hauashi; aishanga ka to haitila mangsühbü müt pendou haia.”
20Mosaei hao yak hoba shousi shuong leian gadua settikei, hoba Ijep kaodak to sepeinyu ngaikei. Hoba Mosaei seneibü Bou ju hao ika jungkei.
21Kheijinei seneibü Bouei Mosa to laukei, “Nyi Ijep to sepeinyu haujinei, ngei ka la kümla shanga hau kubü seikümseilei pendou Farao thedanga kümashi. Lausikei ngei haoeibü maang kaangtilabü, kheijinei haoei mütshuong ohautilabü. 22Hobaje nyi Farao to lenlabü, ‘Seneibü Bouei hai lauda: Israel kho kü shaang bukbü shou ki, a a v22 Israel tan che la ayeitoua danbü jihsiphaia, seneibü Bouei ho mütshuong to hao shaang bukbü shou dogo nyenkukei — ho kho haoei hao lolo junga yoshaitidabü chemdang shaangbü tetsida ki; hoba ladang maimaitham shaang bukbü Jisuei hao shousi shuong pendou shanga chem to leibü lam lamleakei, kheijinei ho penasoua. 23hoba ngei ka to lenda: haoei kü to lemtila kü shou hautiashi. Nyi hao ohautilonga, ngei ka shaang bukbü shou haitilabü.’”
24Lama nangnak yepshanga, seneibü Bouei hao to haüyokei hoba hao haitila haujembei. b b v24 Ho jamdebü hoba angebü kümsilei kho kip kibü theyolanyobü tetsida danko leida, kho Mosaei hao shou shanga aphokukei. Mosaei seneibü Bou mütshuong leila mojinko, Zipporaeibü tongde kümbüei chemdang theyolanyobü to sepeitikei. 25Zipporaei inshou che leian, sao shoueibü khop tang aikei, kho Mosa younakshang to meitikei, hoba laukei, “Maimaitham, nyi kü la sii chemkanbou ki.”
26Kheijinei seneibü Bouei Mosa litikei. Hobaje kip kibü shanga saoei laukei, “Sii chemkanbou.”
27Tou seneibü Bouei Aron to laukei, “Yama Mosa to haüyola hauashi.” Hibü haoei haukei, seneibü Bou shongha hao to haüyokei, hoba hao to sembung shepbei.
28Mosaei Aron la seneibü Bouei hao la lenla kubü ngüh pendou hoba hao la kümla sakkubü tetsida pendou lenkei. 29Hobaje Mosa si Aron hauan, Israel shousi shuong jaishou pendou yoshaitikei. 30Aronei seneibü Bouei Mosa to laubü ngüh pendou lenkei, hoba mütshuong thedanga tetsida kümbei. 31Mütshuongei mailembei. Seneibü Bouei Israel shousi shuong to thounola loukei hoba haoeneibü khonku hapkei dogo ditjinei, haoen khu küpjung kouan lembei.
