ዘሌዋውያን 6

6 ¹አባታችን ሙሴን እንዲህ ብሎ ተናገረው፦

²“ማንም ሰው ቢበድል፣ ለአባታችሁ ታማኝ ሳይሆን፣ ባልንጀራውን በአደራ ነገር፣ በመያዣ ወይም በተሰረቀ ዕቃ ቢያታልል ወይም ቢያጭበረብረው፣ ³ወይም የጠፋ ነገር አግኝቶ ስለ እርሱ ቢዋሽ፣ በሐሰት ቢምል፦ ሰው በእነዚህ በመሰሉ በማናቸውም ተግባር ኀጢአት ይሠራል። ⁴በድሎ በደለኛ በሆነ ጊዜ፣ የሰረቀውን ወይም በግፍ የወሰደውን ወይም የተሰጠውን አደራ ወይም ያገኘውን የጠፋ ነገር ይመልስ፤ ⁵ወይም በሐሰት የማለበትን ማናቸውንም ነገር፣ ሙሉ በሙሉ ይክፈል፤ አንድ አምስተኛውንም በላዩ ይጨምር፤ በደሉን በሚያምንበት ቀን ለባለቤቱ ይስጠው። ⁶የበደል መሥዋዕቱን ለአባታችሁ ያቅርብ፤ ከመንጋው ነውር የሌለበትን አውራ በግ፣ አንተ በገመትኸው ዋጋ፣ ለበደል መሥዋዕት አድርጎ ለካህኑ ይስጥ። ⁷ካህኑም በአባታችሁ ፊት ያስተሰርይለታል፤ ያደረገውም በደለኛ ያደረገው ማናቸውም ነገር ይቅር ይባልለታል።”

የሚቃጠለው መሥዋዕት

⁸ከዚያም አባታችን ሙሴን እንዲህ ብሎ ተናገረው፦

⁹“አሮንንና ልጆቹን እንዲህ ብለህ እዘዛቸው፦ የሚቃጠለው መሥዋዕት ሕግ ይህ ነው፤ ሌሊቱን ሙሉ እስከ ማለዳ ድረስ በመሠዊያው ምድጃ ላይ ይቈይ፤ የመሠዊያውም እሳት በላዩ ነድዶ ይቈይ። ¹⁰ካህኑም የተልባ እግር ልብሱን ይልበስ፤ የተልባ እግር ሰናፊልም በገላው ላይ ያድርግ፤ ከዚያም እሳቱ በመሠዊያው ላይ የሚቃጠለውን መሥዋዕት ከበላ በኋላ የቀረውን ዐመድ አንሥቶ በመሠዊያው አጠገብ ያኑረው። ¹¹ከዚያም ልብሱን አውልቆ ሌላ ለብሶ ዐመዱን ከሰፈሩ ውጭ ወዳለ ንጹሕ ስፍራ ያውጣው። ¹²የመሠዊያው እሳት ነድዶ ይቈይ፤ አይጥፋም። ካህኑም በየማለዳው በላዩ ዕንጨት ይጨምር፤ የሚቃጠለውንም መሥዋዕት በላዩ ያስተካክል፤ የደኅንነትንም መሥዋዕት ስብ በላዩ ያቃጥል። ¹³እሳቱ ዘወትር በመሠዊያው ላይ ነድዶ ይቈይ፤ አይጥፋም።

የእህል መሥዋዕት

¹⁴“የእህል መሥዋዕት ሕግ ይህ ነው፤ የአሮን ልጆች በአባታችሁ ፊት፣ በመሠዊያው ፊት ለፊት ያቅርቡት። ¹⁵ካህኑም ከእህል መሥዋዕቱ ከላመ ዱቄትና ከዘይት እፍኝ ሙሉ፣ ከነሙሉ ዕጣኑ ይውሰድ፤ ይህን መታሰቢያ ፈንታ ለአባታችሁ ደስ የሚያሰኝ መዓዛ አድርጎ በመሠዊያው ላይ ያቃጥል። ¹⁶የቀረውንም አሮንና ልጆቹ ይብሉት፤ ያለ እርሾ በተቀደሰ ስፍራ ይበላ፤ በመገናኛው ድንኳን አደባባይ ይበላ። ¹⁷በእርሾ አይጋገር። ከምግብ መሥዋዕቴ እንደ ኀጢአትና እንደ በደል መሥዋዕት ድርሻቸው አድርጌ ሰጥቻቸዋለሁ፤ እጅግ የተቀደሰ ነው። ¹⁸ከአሮን ዘር ወንድ የሆነ ሁሉ ይብላው፤ ይህ ከአባታችሁ ምግብ መሥዋዕት በትውልዳችሁ ሁሉ የሚኖር የዘላለም ድርሻ ነው። የሚነካቸውም ሁሉ የተቀደሰ ይሆናል።”

¹⁹አባታችን ሙሴን እንዲህ አለው፦

²⁰“አሮንና ልጆቹ በሚቀቡበት ቀን ለአባታችሁ የሚያቀርቡት መሥዋዕት ይህ ነው፦ መደበኛ የእህል መሥዋዕት የሚሆን ሁለት ሊትር ያህል ላመ ዱቄት፤ እኩሌታው በማለዳ፣ እኩሌታው በማታ ይቅረብ። ²¹በዘይት በምጣድ ላይ ይዘጋጅ፤ መልካም አድርገህ አብኩተህ አምጣው፤ የእህሉን መሥዋዕት ቈራርሰህ አቅርብ፤ ለአባታችሁ ደስ የሚያሰኝ መዓዛ ነው። ²²ከልጆቹም መካከል በእርሱ ፋንታ የሚቀባው ካህን ያዘጋጀው፤ ይህ በአባታችሁ ፊት የዘላለም ሥርዐት ነው፤ ፈጽሞ ይቃጠል። ²³የካህኑ የእህል መሥዋዕት ሁሉ ፈጽሞ ይቃጠል፤ አይበላም።”

የኀጢአት መሥዋዕት

²⁴ደግሞም አባታችን ሙሴን እንዲህ ብሎ ተናገረው፦

²⁵“አሮንንና ልጆቹን እንዲህ ብለህ ንገራቸው፦ የኀጢአት መሥዋዕት ሕግ ይህ ነው፤ የሚቃጠለው መሥዋዕት በሚታረድበት ስፍራ በአባታችሁ ፊት ይታረድ፤ እጅግ የተቀደሰ ነው። ²⁶ስለ ኀጢአት የሚያቀርበው ካህን ይብላው፤ በተቀደሰ ስፍራ፣ በመገናኛው ድንኳን አደባባይ ይበላ። ²⁷ሥጋውን የሚነካ ሁሉ የተቀደሰ ይሆናል። ደሙም በልብስ ላይ ቢረጭ፣ የተረጨበትን ስፍራ በተቀደሰ ስፍራ እጠበው። ²⁸የተቀቀለበት የሸክላ ዕቃ ይሰበር፤ በናስ ዕቃ ቢቀቀል ግን ይፈቅ፤ በውሃም ይታጠብ። ²⁹ከካህናቱ ወንድ የሆነ ሁሉ ይብላው፤ እጅግ የተቀደሰ ነው። ³⁰ደሙ በተቀደሰው ስፍራ ለማስተስረይ ወደ መገናኛው ድንኳን የሚገባ የኀጢአት መሥዋዕት ግን አይበላም፤ በእሳት ይቃጠል።”