Alawii 6 FHB Father's Heart Bible™

6 ¹Naake Ithe witũ akĩarĩria Musa, akĩmwĩra atĩrĩ:

²“Mũndũ o wothe angĩkeehia, aage kwĩhokeka harĩ Ithe wanyu, na ũndũ wa kũheenia mũndũ wa gwake ũhoroinĩ wa kĩndũ kĩrĩa aigĩĩrwo, kana kĩrĩa aarĩĩkanĩire, kana indo iria ciaiyitwo, kana nĩ ũndũ wa kũmũheenia, ³kana angĩona kĩndũ kĩrĩa kĩorĩte agĩkaaria maheeni ũhoroinĩ wakĩo, akĩĩhĩta na maheeni—ũndũ o wothe ta ũcio ũrĩa mũndũ angĩĩhia naguo. ⁴Rĩrĩa angĩĩhia na atuĩke nĩ mũhĩtia, no mũhaka acookie kĩrĩa aaiyire, kana kĩrĩa aahinyĩrĩirie, kana kĩndũ kĩrĩa aaigĩĩrwo, kana kĩndũ kĩrĩa kĩorĩte kĩrĩa oonire, ⁵kana kĩndũ o gĩothe kĩrĩa eehĩtĩire na maheeni, no mũhaka akĩrĩhe gĩothe, ongerere gĩcunjĩ gĩa ĩtaano, acooke akĩhee mwene kĩo mũthenya ũrĩa ageetĩkĩra mahĩtia make. ⁶No mũhaka arehere Ithe wanyu igongona rĩake rĩa mahĩtia: ndũrũme ĩtarĩ na kaũũgũ kuuma rũũrũinĩ, kũringana na ũrĩa ũgaatua thogora wayo, ĩtuĩke igongona rĩa mahĩtia, amĩrehere mũthĩnjĩri Ngai. ⁷Naake mũthĩnjĩri Ngai nĩakamũhoroheria mbere ya Ithe wanyu, nake nĩakarekerwo ũndũ o wothe ũrĩa eekire ũrĩa watũmire atuĩke mũhĩtia.”

Igongona rĩa Njino

⁸Naake Ithe witũ akĩarĩria Musa rĩngĩ, akĩmwĩra atĩrĩ:

⁹“Atha Harũni na aariũ ake, ũmeere atĩrĩ: Ũyũ nĩguo watho wa igongona rĩa njino. Igongona rĩu rĩikaraga igũrũ rĩa riiko rĩa kĩgongona ũtukũ wothe nginya rũũciinĩ, naguo mwaki wa kĩgongona no mũhaka ũikare ũgĩakana igũrũ rĩarĩo. ¹⁰Mũthĩnjĩri Ngai nĩehumbe nguo yake ya gatani, na thuruarĩ cia gatani thĩinĩ hakuhĩ na mwĩrĩ wake, acooke arute mũhu ũrĩa ũtigaire thuutha wa mwaki kũniina igongona rĩa njino igũrũ rĩa kĩgongona, aũige hakuhĩ na kĩgongona. ¹¹Acooke arute nguo ciake, ehumbe ingĩ, oombũrũkie mũhu ũcio nja ya kambĩ, aũtware handũ hatheru. ¹²Naguo mwaki wa kĩgongona no mũhaka ũikare ũgĩakana; ndũkahorwo. Rũũciinĩ o rũũciinĩ mũthĩnjĩri Ngai nĩongagĩrĩra ngũ igũrũ rĩaguo, akaara igongona rĩa njino igũrũ rĩaguo, na agacinĩra maguta ma magongona ma thaayũ igũrũ rĩaguo. ¹³Mwaki no mũhaka ũtũũre ũgĩakana igũrũ rĩa kĩgongona hĩndĩ ciothe; ndũkahorwo.

Igongona rĩa Mũtu

¹⁴“Ũyũ nĩguo watho wa igongona rĩa mũtu: Aariũ a Harũni no mũhaka marĩrehe mbere ya Ithe wanyu, mbere ya kĩgongona. ¹⁵Mũthĩnjĩri Ngai nĩakoya ngundi ya mũtu ũrĩa mũhinyu wa igongona rĩa mũtu na maguta, hamwe na ũbaani wayo wothe, acine gĩcunjĩ gĩkĩ gĩa kĩririkano igũrũ rĩa kĩgongona kĩrĩ mũtararĩko mwega harĩ Ithe wanyu. ¹⁶Harũni na aariũ ake marĩĩage kĩrĩa gĩgaatigara; no mũhaka kĩrĩĩo gĩtarĩ na ndawa ya kũimbia handũ hatheru, kĩrĩĩĩrwo nja ya hema ya gũtũnganwo. ¹⁷Mũtigagĩruge na ndawa ya kũimbia. Nĩndakĩheana kĩrĩ rwĩga rwao kuuma magongonainĩ makwa ma irio, o ta igongona rĩa mehia na rĩa mahĩtia; nĩ kĩndũ gĩtheru mũno. ¹⁸Mũndũ mũrũme o wothe wa rũciaro rwa Harũni no arĩe kĩndũ kĩu—rwĩga rwa gũtũũra njiarwainĩ cianyu ciothe kuuma magongonainĩ ma irio ma Ithe wanyu. Kĩndũ o gĩothe kĩngĩmahutia gĩgaatuĩka gĩtheru.”

¹⁹Naake Ithe witũ akĩĩra Musa atĩrĩ:

²⁰“Rĩĩrĩ nĩrĩo igongona rĩa Harũni na aariũ ake harĩ Ithe wanyu mũthenya ũrĩa akaaitĩrĩrio maguta: ta ratiri igĩrĩ cia mũtu mũhinyu rĩtuĩke igongona rĩa mũtu rĩa hĩndĩ ciothe, nuthu rũũciinĩ, na nuthu hwaĩinĩ. ²¹Rĩthondeke na maguta igũrũ rĩa rũbaũ rwa gũcinĩra, ũrĩrehe rĩkandĩkĩte wega, ũrute igongona rĩa mũtu rĩunangĩtwo tũcunjĩ—mũtararĩko mwega harĩ Ithe wanyu. ²²Mũthĩnjĩri Ngai ũrĩa mũitĩrĩrie maguta ũrĩa ũkaamũrũmĩrĩra kuuma kũrĩ aariũ ake nĩwe ũkaarĩthondeka—nĩ watho wa gũtũũra mbere ya Ithe wanyu: no mũhaka rĩcinwo biũ. ²³Igongona o rĩothe rĩa mũtu rĩa mũthĩnjĩri Ngai no mũhaka rĩcinwo biũ; rĩtikarĩĩo.”

Igongona rĩa Mehia

²⁴Naake Ithe witũ akĩarĩria Musa rĩngĩ, akĩmwĩra atĩrĩ:

²⁵“Ĩra Harũni na aariũ ake atĩrĩ: ũyũ nĩguo watho wa igongona rĩa mehia: rĩthĩnjĩrwo mbere ya Ithe wanyu, harĩa igongona rĩa njino rĩthĩnjagĩrwo; nĩ kĩndũ gĩtheru mũno. ²⁶Mũthĩnjĩri Ngai ũrĩa ũkaarĩruta nĩ ũndũ wa mehia nĩwe ũkaarĩrĩa; no mũhaka rĩrĩĩĩrwo handũ hatheru, nja ya hema ya gũtũnganwo. ²⁷Kĩndũ o gĩothe kĩngĩhutia nyama ciarĩo gĩgaatuĩka gĩtheru. Thakame yarĩo ĩngĩminjũkĩra nguo, thaamba handũ harĩa haminjũkĩirwo handũ hatheru. ²⁸Nyũngũ ya rĩũmba ĩrĩa rĩrugĩirwo thĩinĩ wayo no mũhaka yũragwo; rĩngĩrugĩrwo nyũngũ ya gĩcango, no mũhaka ĩthambio na ĩkĩĩo na maaĩ. ²⁹Mũndũ mũrũme o wothe thĩinĩ wa athĩnjĩri Ngai no arĩe kĩndũ kĩu; nĩ kĩndũ gĩtheru mũno. ³⁰Gũtirĩ igongona rĩa mehia rĩrĩa thakame yarĩo ĩtwaragwo thĩinĩ wa hema ya gũtũnganwo nĩguo kũhoroheria Handũ-harĩa-Hatheru rĩngĩrĩĩo; no mũhaka rĩcinwo na mwaki.”