Levitiko 6 FHB Father's Heart Bible™

6 ¹Baba wathu alonga kuna Mose:

²“Munthu angadawa, mbakhonda kukhulupirika kuna Baba wanu, mukunyengeza ndzace thangwi ya cinthu cidakoyeswa kuna iye, peno cikole, peno pinthu pyakubiwa, peno mukump'phonyera, ³peno angagumana cinthu cidatayika mbalonga uthambi thangwi ya cinthu ceneci, mbadumbira mwauthambi — ndi macitiro onsene anadawisa munthu. ⁴Angadawa mbakhala na mulandu, asafunika kubwezera pidaba iye, peno pidakwata iye mwakukakamiza, peno cinthu cidakoyeswa kuna iye, peno cinthu cidatayika cidagumana iye, ⁵peno cinthu consene cidadumbira iye mwauthambi, asafunika kucibwezera consene, mbathimizira khundu yacixanu, mbaipereka kuna mwanaciro pa ntsiku inabvuma iye mulandu wace. ⁶Iye asafunika kubweresa ntsembe yace ya mulandu kuna Baba wanu: bira yamphongo yakukhonda kukhala na cilema ya n'thumba, mwakulinganira kwanu, ninga ntsembe ya mulandu, kuna nyantsembe. ⁷Nyantsembe anamphimbira madawo ace pamaso pa Baba wanu, iye anadzalekererwa pya pyonsene pidacita iye pidan'dawisa.”

Ntsembe Yakupisa

⁸Na tenepo Baba wathu alonga kuna Mose:

⁹“Panga Aroni na ana ace: Uyu ndi mwambo wa ntsembe yakupisa. Isakhala pa mbuto ya moto ya guwa masiku onsene mpaka namacibese, na moto wa guwa usafunika kupitiriza kugaka pa iyo. ¹⁰Nyantsembe asafunika kubvala nguwo yace ya laineni, pabodzi na nguwo za m'kati za laineni pa manungo ace, buluka penepo akwate dota idasala pakumala kupisa kwa moto ntsembe yakupisa pa guwa, mbaiikha pakhundu pa guwa. ¹¹Penepo iye asabvula nguwo zace, mbabvala zinango, mbakwata dota mbaiendesa kunja kwa nkambo ku mbuto yakucena. ¹²Moto wa guwa usafunika kupitiriza kugaka; nkhabe kufunika kuthima. Macibese onsene nyantsembe asathimizira nkhuni pa iwo, mbasasanya ntsembe yakupisa pa iwo, mbapisa mafuta a ntsembe za ntendere pa iwo. ¹³Moto usafunika kupitiriza kugaka pa guwa ndzidzi onsene; nkhabe kufunika kuthima.

Ntsembe ya Tirigu

¹⁴“Uyu ndi mwambo wa ntsembe ya tirigu: Ana a Aroni asafunika kuibweresa pamaso pa Baba wanu, patsogolo pa guwa. ¹⁵Nyantsembe asakwata manja madzadze a ufa wakusalira na mafuta a ntsembe ya tirigu, pabodzi na ubani wace onsene, mbapisa khundu iyi ya cikumbuso pa guwa ninga kununkhira kwakukomeresa kuna Baba wanu. ¹⁶Aroni na ana ace asadya pidasala; pisafunika kudyiwa pakukhonda kukhala na cakutupisa pa mbuto yakucena, pidyiwe m'bwalo mwa tenti yakugumanyikana. ¹⁷Lekani kuyokera na cakutupisa. Ine ndaipereka ninga khundu yawo ya ntsembe zanga za cakudya, ninga ntsembe za madawo na za mulandu; ndi yakucena kakamwe. ¹⁸Mamuna onsene wa dzindza ya Aroni anakwanisa kuidya — khundu yakukhonda kumala m'mibadwo yanu inabuluka mu ntsembe za cakudya za Baba wanu. Cinthu consene cinakhuya pyenepi cisakhala cakucena.”

¹⁹Baba wathu alonga kuna Mose:

²⁰“Iyi ndi ntsembe ya Aroni na ana ace kuna Baba wanu pa ntsiku inadzodzwa iye: ufa wakusalira wakukwana pafupi na malita mawiri ninga ntsembe ya tirigu ya ndzidzi onsene, khundu ibodzi namacibese, khundu inango namaulo. ²¹Isasanyike na mafuta pa cirongo, mbaibwerese yakukandidwa mwadidi, mbapereka ntsembe ya tirigu yakugwandika pang'ono-pang'ono — kununkhira kwakukomeresa kuna Baba wanu. ²²Nyantsembe wakudzodzwa anadzatowezera pa mbuto yace, wa pakati pa ana ace, asafunika kuisasanya — ndi mwambo wakukhonda kumala pamaso pa Baba wanu: isafunika kupiswa yonsene. ²³Ntsembe ya tirigu iri-yonsene ya nyantsembe isafunika kupiswa yonsene; nkhabe kufunika kudyiwa.”

Ntsembe ya Madawo

²⁴Pontho Baba wathu alonga kuna Mose:

²⁵“Panga Aroni na ana ace: Uyu ndi mwambo wa ntsembe ya madawo: Iphiwe pamaso pa Baba wanu, pa mbuto inaphiwa ntsembe yakupisa; ndi yakucena kakamwe. ²⁶Nyantsembe anaipereka thangwi ya madawo asafunika kuidya; isafunika kudyiwa pa mbuto yakucena, m'bwalo mwa tenti yakugumanyikana. ²⁷Cinthu consene cinakhuya nyama yace cisakhala cakucena. Ciropa cace cingaphatika pa nguwo, tsuka pakhundu padaphatika ciropa pa mbuto yakucena. ²⁸Nyungu ya dongo inaphikwa nyama imweyo isafunika kuswiwa; ingaphikwa mu nyungu ya utale, isafunika kukwukwudzwa mbatsukwa na madzi. ²⁹Mamuna onsene wa pakati pa anyantsembe anakwanisa kuidya; ndi yakucena kakamwe. ³⁰Ntsembe iri-yonsene ya madawo yakuti ciropa cace cisapitiswa n'kati mwa tenti yakugumanyikana toera kuphimbira madawo pa Mbuto Yakucena, nkhabe kudyiwa; isafunika kupiswa na moto.”