Littafin Firistoci 6 FHB Father's Heart Bible™

6 ¹Ubanmu ya yi magana da Musa, ya ce,

²“Idan wani ya yi zunubi, ya yi rashin aminci ga Ubanku, ta wurin ruɗar maƙwabcinsa game da abin da aka ba shi ajiya, ko jingina, ko abin da aka sace, ko kuwa ya zalunce shi, ³ko kuma ya sami abin da wani ya rasa ya yi ƙarya a kansa, yana rantsuwar ƙarya—duk wani irin aikin da mutum yakan yi ya yi zunubi da shi. ⁴Sa'ad da ya yi zunubi ya kuma zama mai laifi, dole ne yă mayar da abin da ya sace, ko abin da ya kwace, ko ajiyar da aka danƙa masa, ko abin da ya ɓace da ya samu, ⁵ko duk abin da ya yi rantsuwar ƙarya a kansa, dole ne yă biya shi cikakke, yă ƙara humushi a kansa, yă ba mai shi a ranar da ya shaida laifinsa. ⁶Dole ne yă kawo hadayar laifinsa ga Ubanku: rago marar lahani daga garke, bisa ga ƙiyasinka, a matsayin hadayar laifi, ga firist. ⁷Firist zai yi kafara dominsa a gaban Ubanku, za a kuwa gafarta masa duk abin da ya yi da ya sa shi laifi.”

Hadaya ta Ƙonawa

⁸Sa'an nan Ubanmu ya yi magana da Musa, ya ce,

⁹“Ka umarci Haruna da 'ya'yansa, ka ce, Wannan ce dokar hadaya ta ƙonawa. Za tă kasance a kan murhun bagade dukan dare har safiya, wutar bagade kuma sai ta ci gaba da ci a kansa. ¹⁰Firist zai sa rigarsa ta lilin, da kuma tufafin ciki na lilin a jikinsa, sa'an nan yă ɗauki tokar da ta ragu bayan wuta ta cinye hadaya ta ƙonawa a kan bagade, yă ajiye ta gefen bagade. ¹¹Sa'an nan yă tuɓe tufafinsa, yă sa waɗansu, yă ɗauki tokar zuwa bayan sansani, zuwa wani wuri mai tsabta. ¹²Wutar bagade kuwa sai ta ci gaba da ci; kada ta mutu. Kowace safiya firist zai ƙara itace a kanta, yă shirya hadaya ta ƙonawa a kanta, yă ƙona kitsen hadayun salama a kanta. ¹³Dole ne a riƙa sa wutar tana ci a kan bagade kullum; kada ta mutu.

Hadaya ta Gari

¹⁴“Wannan ce dokar hadaya ta gari. 'Ya'yan Haruna za su kawo ta a gaban Ubanku, a gaban bagade. ¹⁵Firist zai ɗebi tafin hannu na gari mai laushi da mai na hadaya ta gari, tare da dukan turarenta, yă ƙona wannan rabo na tunawa a kan bagade, ƙamshi mai daɗi ga Ubanku. ¹⁶Haruna da 'ya'yansa za su ci abin da ya ragu; sai a ci shi marar yisti a wuri mai tsarki, a ci shi a filin tentin sujada. ¹⁷Kada a toya shi da yisti. Na ba da shi a matsayin rabonsu daga hadayuna na abinci, kamar hadayar zunubi da hadayar laifi; abu ne mai tsarki ƙwarai. ¹⁸Kowane namiji daga zuriyar Haruna zai iya cin shi—rabo na dindindin cikin tsararrakinku daga hadayun abinci na Ubanku. Duk abin da ya taɓa su zai zama mai tsarki.”

¹⁹Ubanmu ya ce wa Musa,

²⁰“Wannan ita ce hadayar Haruna da 'ya'yansa ga Ubanku a ranar da aka shafe shi: wajen lita biyu na gari mai laushi a matsayin hadaya ta gari ta kullum, rabi da safe, rabi da yamma. ²¹A shirya shi da mai a kan kaskon tanda, a kawo shi da kyau an cuɗa, a miƙa hadaya ta gari gutsu-gutsu—ƙamshi mai daɗi ga Ubanku. ²²Firist shafaffe wanda zai gāje shi daga cikin 'ya'yansa, dole ne yă shirya shi—ƙa'ida ta dindindin a gaban Ubanku: dole ne a ƙone shi gaba ɗaya. ²³Kowace hadaya ta gari ta firist, za a ƙone ta gaba ɗaya; kada a ci ta.”

Hadayar Zunubi

²⁴Har wa yau Ubanmu ya yi magana da Musa, ya ce,

²⁵“Ka faɗa wa Haruna da 'ya'yansa, Wannan ce dokar hadayar zunubi: a yanka ta a gaban Ubanku, inda ake yanka hadaya ta ƙonawa; abu ne mai tsarki ƙwarai. ²⁶Firist wanda ya miƙa ta saboda zunubi, dole ne yă ci ta; sai a ci ta a wuri mai tsarki, a filin tentin sujada. ²⁷Duk abin da ya taɓa namanta zai zama mai tsarki. In jininta ya fantsama a kan riga, sai a wanke wurin da ya fantsama a wuri mai tsarki. ²⁸Tukunyar yumɓu da aka dafa ta a ciki, dole ne a farfashe ta; in kuwa a tukunyar tagulla aka dafa, dole ne a goge ta a kuma kurkura da ruwa. ²⁹Kowane namiji a cikin firistoci zai iya cin ta; abu ne mai tsarki ƙwarai. ³⁰Ba za a ci wata hadayar zunubi wadda aka kawo jininta cikin tentin sujada don a yi kafara a Wuri Mai Tsarki ba; sai a ƙone ta da wuta.”