ዘሌዋውያን 6 FHB Father's Heart Bible™

6 ¹ኣቦና ንሙሴ ከምዙይ በሎ፦

²“ሓደ ሰብ ብዛዕባ ዝተሓዝኦ ሕድሪ ወይ ትሕጃ ወይ ዝተሰርቀት ኣቕሓ ንጐረቤቱ ብምትላል ወይ ብምጥፍፋእ፥ ኣብ ኣቦኻ እንተ ጠለመ፥ ሓጢኣት ድማ እንተ ገበረ፥ ³ወይ ዝጠፍአ ነገር ረኺቡ ብዛዕባኡ ሓሰት እንተ ተዛረበ፥ ብሓሰት እንተ መሓለ፥ ሰብ በዝ ኵሉ ነገር ሓጢኣት ይገብር። ⁴ከምዙይ ሓጢኣት ገይሩ በደለኛ ምስ ኮነ፥ ነቲ ዝሰረቖ ወይ ብሓይሊ ዝወሰዶ ወይ እቲ ኣብኡ ዝተሓድረ ሕድሪ ወይ እቲ ዝረኸቦ ዝጠፍአ ነገር ይመልስ፤ ⁵ወይ ብዛዕባ ዝኾነ ብሓሰት ዝመሓለሉ፥ ብምሉኡ ይክሓስ፤ ኣብ ልዕሊኡ ኸዓ ሓምሻይ ኢድ ይውስኽ፤ በታ በደሉ ዘረጋገፀላ መዓልቲ ድማ ነቲ ዋናኡ ይሃቦ። ⁶ነቲ ክንዲ በደል ዝቐርብ መስዋእቱ ድማ ናብ ኣቦኻ የምፅእ፦ ከም ኣገማምታኻ ካብ መጓሰ ነውሪ ዘይብሉ ድቤላ፥ ክንዲ በደል ዝቐርብ መስዋእቲ ኾይኑ ናብቲ ኻህን የምፅኣዮ። ⁷እቲ ኻህን ድማ ኣብ ቅድሚ ኣቦኻ የስተስርየሉ፤ በቲ በደለኛ ዝገበሮ ዅሉ ነገር ድማ ይቕረ ኽበሃለሉ እዩ።”

ዝቃፀል መስዋእቲ

⁸ኣቦና ድማ ንሙሴ ከምዙይ በሎ፦

⁹“ንኣሮንን ንደቁን ከምዙይ ኢልካ እዘዞም፦ ሕጊ እቲ ዝቃፀል መስዋእቲ እዙይ እዩ፦ እቲ ዝቃፀል መስዋእቲ ምሉእ ለይቲ ኽሳዕ ጊሓት ኣብ ልዕሊ ፍሕሚ እቲ መሰውኢ ይፀንሕ፤ ሓዊ መሰውኢ ኸዓ ኣብ ልዕሊኡ ክነድድ ኣለዎ። ¹⁰እቲ ኻህን ናይ ሃሪ ኽዳኑ ይልበስ፤ ናይ ሃሪ ስረ ኸዓ ኣብ ልዕሊ ሰብነቱ ይዕጠቕ፤ ነቲ ሓዊ ኣብ መሰውኢ ነቲ ዝቃፀል መስዋእቲ ምስ በልዖ ዝተረፈ ሓሙዅሽቲ የልዕል፤ ኣብ ጐድኒ መሰውኢ ድማ የንብሮ። ¹¹ድሕሪኡ ኽዳኑ ኣውፂኡ ኻልእ ይኽደን፤ ነቲ ሓሙዅሽቲ ኸዓ ናብ ወፃኢ ሰፈር ናብ ንፁህ ቦታ የውፅእ። ¹²ሓዊ መሰውኢ ኽነድድ ኣለዎ፤ ኣይጥፋእ። እቲ ኻህን በብጊሓቱ ኣብ ልዕሊኡ ዕፀይቲ ይውስኽ፤ ነቲ ዝቃፀል መስዋእቲ ኣብ ልዕሊኡ የዳሉ፤ ስብሒ እቲ መስዋእቲ ምስጋና ኸዓ ኣብ ልዕሊኡ የቃፅል። ¹³እቲ ሓዊ ኣብ መሰውኢ ኵልሻዕ ክነድድ ኣለዎ፤ ኣይጥፋእ።

መስዋእቲ እኽሊ

¹⁴“ሕጊ እቲ መስዋእቲ እኽሊ እዙይ እዩ፦ ደቂ ኣሮን ኣብ ቅድሚ ኣቦኻ ኣብ ቅድሚ መሰውኢ የቕርብዎ። ¹⁵እቲ ኻህን ድማ ካብ ልሑም ሕሩጭን ዘይትን ናይቲ መስዋእቲ እኽሊ ምስ ኵሉ ዕጣን ምሉእ ሕፍኒ ወሲዱ፥ ነዝ ንመዘከርታ ዝኸውን ድማ ኣብ መሰውኢ ንኣቦኻ ጥዑም ጨና ኾይኑ የቃፅሎ። ¹⁶ኣሮንን ደቁን ነቲ ዝተረፈ ይብልዕዎ፤ ኣብ ቅዱስ ቦታ ድማ ብዘይ ብሑቕ ይብላዕ፤ ኣብ ኣፀድ እቲ መራኸቢ ድንኳን ይብልዕዎ። ¹⁷ብብሑቅ ኣይስንከት። ካብቲ ብሓዊ ዝቐርብ መስዋእተይ ግደኦም ኾይኑ ሂበዮም ኣለኹ፤ ከምቲ ምእንቲ ሓጢኣትን ክንዲ በደልን ዝቐርብ መስዋእቲ፥ ንሱ ቅዱሰ ቅዱሳን እዩ። ¹⁸ካብ ዘርኢ ኣሮን ተባዕታይ ዝኾነ ዅሉ ይብልዓዮ፤ እዙይ ካብቲ ብሓዊ ዝቐርብ መስዋእቲ ኣቦኻ ንውሉድ ወለዶኹም ናይ ዘለኣለም ግደ እዩ። ዝነኽኦም ዅሉ ቅዱስ ይኸውን።”

¹⁹ኣቦና ንሙሴ ከምዙይ በሎ፦

²⁰“እቲ ኣሮንን ደቁን በታ ዝቕብኡላ መዓልቲ ንኣቦኻ ዘቕርብዎ ቍርባን እዙይ እዩ፦ ናይ ኵልሻዕ መስዋእቲ እኽሊ ኽኸውን፥ ኣስታት ክልተ መስፈሪ ልሑም ሕሩጭ፥ ፍርቁ ንጊሓት ፍርቁ ንምሸቱ። ²¹ብዘይቲ ኣብ መቝሎ ይዳሎ፤ ኣፀቢቕካ ለዊስካ ኣምፅኣዮ፤ ነቲ መስዋእቲ እኽሊ ድማ ቘሪስካ ኣቕርቦ፤ ንኣቦኻ ጥዑም ጨና እዩ። ²²ካብ ደቁ እቲ ተኪኡ ዝቕባእ ካህን ድማ የዳልዎ፤ እዙይ ኣብ ቅድሚ ኣቦኻ ናይ ዘለኣለም ሕጊ እዩ፦ ብምሉኡ ይቃፀል። ²³ናይ ካህን መስዋእቲ እኽሊ ዅሉ ብምሉኡ ይቃፀል፤ ኣይብላዕ።”

ምእንቲ ሓጢኣት ዝቐርብ መስዋእቲ

²⁴ኣቦና ድማ ንሙሴ ከምዙይ በሎ፦

²⁵“ንኣሮንን ደቁን ከምዙይ ኢልካ ንገሮም፦ ሕጊ ናይቲ ምእንቲ ሓጢኣት ዝቐርብ መስዋእቲ እዙይ እዩ፦ እቲ መስዋእቲ ኣብ ቅድሚ ኣቦኻ፥ ኣብታ ዝቃፀል መስዋእቲ ዝሕረደላ ስፍራ ይሕረድ፤ ንሱ ቅዱሰ ቅዱሳን እዩ። ²⁶እቲ ምእንቲ ሓጢኣት ዘቕርቦ ካህን ይብልዓዮ፤ ኣብ ቅዱስ ቦታ፥ ኣብ ኣፀድ እቲ መራኸቢ ድንኳን ይብላዕ። ²⁷ነቲ ስግኡ ዝነኽኦ ዅሉ ቅዱስ ይኸውን። ካብ ደሙ ኣብ ክዳን እንተ ነፀገ ድማ፥ ነቲ ዝተነፅገ ቦታ ኣብ ቅዱስ ቦታ ሕፀቦ። ²⁸እቲ ዝበሰለሉ ኣቕሓ መሬት ይሰበር፤ ኣብ ኣቕሓ ነሃስ እንተ በሲሉ ግና፥ ይደረዝ ብማይ ድማ ይተሓፀብ። ²⁹ካብ ካህናት ተባዕታይ ዝኾነ ዅሉ ይብልዓዮ፤ ንሱ ቅዱሰ ቅዱሳን እዩ። ³⁰ደሙ ኣብ መቕደስ ንምስትስራይ ናብ መራኸቢ ድንኳን ዝኣቱ ምእንቲ ሓጢኣት ዝቐርብ መስዋእቲ ዅሉ ኣይብላዕ፤ ብሓዊ ይቃፀል።”