ዘሌዋውያን 4

4 ¹አባታችን ሙሴን እንዲህ ብሎ ተናገረው፤

²“ለእስራኤላውያን እንዲህ ብለህ ንገራቸው፤ ማንም ሰው ከአባታችን ትእዛዛት በአንዱ ላይ ባለማወቅ ኀጢአት ቢሠራ፣ መደረግ የሌለበትን አድርጎ ከእነርሱ አንዱን ቢተላለፍ፣ ³የተቀባው ካህን ኀጢአት ሠርቶ በሕዝቡ ላይ በደል ቢያመጣ፣ ስለ ሠራው ኀጢአት ነውር የሌለበትን ጥጃ ለአባታችን የኀጢአት መሥዋዕት አድርጎ ያቅርብ። ^a a v3 የኀጢአት መሥዋዕቱ ኀጢአት የሠራውን ሰው በደል ተሸክሞ በእርሱ ፋንታ ይገደል ነበር። ይህም በደላችንን በራሱ ላይ አንዴ ለሁሉ ጊዜ ወደ ወሰደው ወደ ኢየሱስ ይጠቁም ነበር። ⁴ጥጃውን በአባታችን ፊት ወደ መገናኛው ድንኳን መግቢያ አምጥቶ እጁን በራሱ ላይ ይጫን፤ በአባታችንም ፊት ይረደው። ⁵የተቀባውም ካህን ከጥጃው ደም ወስዶ ወደ መገናኛው ድንኳን ያስገባዋል። ⁶ጣቱን በደሙ ውስጥ ነክሮ በመቅደሱ መጋረጃ ፊት ለፊት በአባታችን ፊት ሰባት ጊዜ ይረጨዋል። ⁷ካህኑም በመገናኛው ድንኳን ውስጥ ባለው በአባታችን ፊት ባለው የመዐዛ ዕጣን መሠዊያ ቀንዶች ላይ ከደሙ ይቀባል፤ የቀረውንም የጥጃውን ደም ሁሉ በመገናኛው ድንኳን መግቢያ ባለው የሚቃጠል መሥዋዕት መሠዊያ ግርጌ ያፈስሳል። ⁸ከኀጢአት መሥዋዕቱ ጥጃ ሥብ ሁሉ ማለት አንጀቱን የሚሸፍነውን ሥብ፣ በአንጀቱም ላይ ያለውን ሥብ ሁሉ ያወጣል፤ ⁹ሁለቱን ኵላሊቶች፣ በእነርሱ ላይ በወገቡ አጠገብ ያለውን ሥብ፣ የጉበቱንም ጐን ከኵላሊቶቹ ጋራ ያወጣል፤ ¹⁰ይህም ከደኅንነት መሥዋዕት በሬ እንደሚወጣ ነው፤ ካህኑም በሚቃጠል መሥዋዕት መሠዊያ ላይ ያቃጥላቸዋል። ¹¹የጥጃው ቈዳ ግን፣ ሥጋው ሁሉ፣ ራሱ፣ እግሮቹ፣ አንጀቱና ፋንድያው፣ ¹²የቀረውን የጥጃውን ሁሉ አመድ ወደሚደፋበት ንጹሕ ቦታ ከሰፈሩ ውጭ ይዞ አውጥቶ በእንጨት እሳት ላይ ያቃጥለው፤ አመድ በሚደፋበት ቦታ ይቃጠል።

¹³“የእስራኤል ጉባኤ ሁሉ ባለማወቅ ኀጢአት ቢሠራ፣ ነገሩም ከማኅበሩ ዐይኖች ተሰውሮ፣ አባታችን እንዳይደረግ ካዘዘው ነገር አንዱን አድርገው በደለኞች ቢሆኑ፣ ¹⁴የሠሩት ኀጢአት ሲታወቅ፣ ማኅበሩ ጥጃ የኀጢአት መሥዋዕት አድርጎ ያቅርብ፤ ወደ መገናኛውም ድንኳን ፊት ያምጣው። ¹⁵የማኅበሩም ሽማግሌዎች በአባታችን ፊት እጆቻቸውን በጥጃው ራስ ላይ ይጫኑ፤ ከዚያም በአባታችን ፊት ይረደዋል። ¹⁶ከዚያም የተቀባው ካህን ከጥጃው ደም ወደ መገናኛው ድንኳን ያስገባል። ¹⁷ጣቱን በደሙ ውስጥ ነክሮ በመጋረጃው ፊት ለፊት በአባታችን ፊት ሰባት ጊዜ ይረጫል። ¹⁸በመገናኛው ድንኳን ውስጥ በአባታችን ፊት ባለው የመሠዊያው ቀንዶች ላይ ከደሙ ይቀባል፤ የቀረውንም ሁሉ በመገናኛው ድንኳን መግቢያ ባለው የሚቃጠል መሥዋዕት መሠዊያ ግርጌ ያፈስሳል። ¹⁹ሥቡንም ሁሉ አውጥቶ በመሠዊያው ላይ ያቃጥለዋል። ²⁰በዚህ ጥጃ ላይ ልክ በኀጢአት መሥዋዕቱ ጥጃ ላይ እንዳደረገው ያድርግ። ስለዚህ ካህኑ ያስተሰርይላቸዋል፤ ይቅርም ይባላሉ። ²¹ጥጃውን ከሰፈሩ ውጭ ይዞ አውጥቶ የመጀመሪያውን ጥጃ እንዳቃጠለ ያቃጥለው፤ ይህ የማኅበሩ የኀጢአት መሥዋዕት ነው።

²²“አንድ አለቃ አባታችን እንዳይደረግ ካዘዘው ነገር አንዱን ባለማወቅ አድርጎ ኀጢአት ሠርቶ በደለኛ ቢሆን፣ ²³የሠራውን ኀጢአት ቢያውቅ፣ ነውር የሌለበትን ተባት ፍየል መሥዋዕቱ አድርጎ ያምጣ። ²⁴እጁን በፍየሉ ራስ ላይ ይጫን፤ በአባታችንም ፊት የሚቃጠል መሥዋዕት በሚታረድበት ቦታ ይረደው፤ ይህ የኀጢአት መሥዋዕት ነው። ²⁵ካህኑም በጣቱ ከኀጢአት መሥዋዕቱ ደም ወስዶ የሚቃጠል መሥዋዕት መሠዊያ ቀንዶች ላይ ይቀባል፤ የቀረውንም በግርጌው ያፈስሳል። ²⁶ሥቡንም ሁሉ እንደ ደኅንነት መሥዋዕት ሥብ በመሠዊያው ላይ ያቃጥለዋል። ካህኑም ስለ ኀጢአቱ ያስተሰርይለታል፤ ይቅርም ይባላል።

²⁷“ከተራው ሕዝብ አንዱ አባታችን እንዳይደረግ ካዘዘው ነገር አንዱን አድርጎ ባለማወቅ ኀጢአት ሠርቶ በደለኛ ቢሆን፣ ²⁸ኀጢአቱን ሲያውቅ፣ ስለ ሠራው ኀጢአት ነውር የሌለባትን እንስት ፍየል መሥዋዕቱ አድርጎ ያምጣ። ²⁹እጁን በኀጢአት መሥዋዕቱ ራስ ላይ ይጫን፤ በሚቃጠል መሥዋዕት ቦታም ይረደው። ³⁰ካህኑም በጣቱ ከደሙ በሚቃጠል መሥዋዕት መሠዊያ ቀንዶች ላይ ይቀባል፤ የቀረውንም ሁሉ በግርጌው ያፈስሳል። ³¹ሥብ ከደኅንነት መሥዋዕት እንደሚወጣ ሥቡን ሁሉ ያወጣል፤ ካህኑም ለአባታችን ደስ የሚያሰኝ መዐዛ አድርጎ በመሠዊያው ላይ ያቃጥለዋል፤ ያስተሰርይለታልም፤ ይቅርም ይባላል።

³²“በግ የኀጢአት መሥዋዕቱ አድርጎ ቢያመጣ፣ ነውር የሌለባትን እንስት ያምጣ። ³³እጁን በኀጢአት መሥዋዕቱ ራስ ላይ ይጫን፤ የሚቃጠል መሥዋዕት በሚታረድበት ቦታ የኀጢአት መሥዋዕት አድርጎ ይረደው። ³⁴ካህኑም በጣቱ ከኀጢአት መሥዋዕቱ ደም ወስዶ የሚቃጠል መሥዋዕት በሚቀርብበት መሠዊያ ቀንዶች ላይ ይቀባል፤ የቀረውንም ደም ሁሉ በመሠዊያው ግርጌ ያፈስሳል። ³⁵የበጉ ሥብ ከደኅንነት መሥዋዕት እንደሚወጣ ሥቡን ሁሉ ያወጣል፤ ካህኑም ለአባታችን በሚቀርበው በእሳት መሥዋዕት ላይ በመሠዊያው ላይ ያቃጥለዋል። ስለዚህ ካህኑ ስለ ሠራው ኀጢአት ያስተሰርይለታል፤ ይቅርም ይባላል።”