ዘሌዋውያን 3

3 ¹“ማንም የሚያቀርበው መሥዋዕት ከከብቶች መንጋ የሰላም መሥዋዕት ከሆነ፣ ተባት ቢሆን እንስት፣ ነውር የሌለበትን በፊቴ ያቅርብ። ^a a v1 የሰላም መሥዋዕት እንደ ማእድ ተካፍሎ የሚበላ ብቸኛው መሥዋዕት ነበር — አምላኪው፣ ካህናቱና አባታችን በአንድ ማእድ። ከእርሱ ጋር ያለውን ኅብረትና ፍጹምነት ያከብር ነበር። ²እጁን በመሥዋዕቱ ራስ ላይ ጭኖ በመገናኛው ድንኳን መግቢያ ዘንድ ያርደው፤ የአሮን ልጆች ካህናቱም ደሙን በመሠዊያው ዙሪያ ሁሉ ይርጩት። ³ከሰላም መሥዋዕቱም በእሳት የሚቀርብ የእሳት መሥዋዕት ለእኔ ያቅርብ፤ የውስጥ አካላትን የሚሸፍነውን ስብ፣ በእነርሱም ላይ ያለውን ስብ ሁሉ፣ ⁴ሁለቱን ኵላሊቶች ከጐናቸው አጠገብ ባለው ስባቸው፣ ከኵላሊቶቹም ጋራ የሚያወጣውን ረጅሙን የጒበት ትርፍ ጒረድ ያቅርብ። ⁵የአሮን ልጆችም በመሠዊያው ላይ፣ በእሳቱ ላይ ባለው ዕንጨት በሚቃጠለው የሚቃጠል መሥዋዕት ላይ ያቃጥሉት — የእሳት መሥዋዕት፣ ለእኔ ደስ የሚያሰኝ መዓዛ ነው።

⁶“ለእኔ የሚያቀርበው የሰላም መሥዋዕት ከበጎች መንጋ ከሆነ፣ ተባት ቢሆን እንስት፣ ነውር የሌለበትን ያቅርብ። ⁷ጠቦት ለመሥዋዕቱ የሚያቀርብ ከሆነ፣ በፊቴ ያቅርበው፤ ⁸እጁን በመሥዋዕቱ ራስ ላይ ጭኖ በመገናኛው ድንኳን ፊት ያርደው፤ የአሮን ልጆችም ደሙን በመሠዊያው ዙሪያ ሁሉ ይርጩት። ⁹ከሰላም መሥዋዕቱም በእሳት የሚቀርብ የእሳት መሥዋዕት ለእኔ ያቅርብ፤ ስቡን፣ ከጀርባው አጥንት አጠገብ ተቈርጦ የወጣውን ሙሉ የስብ ጭራ፣ የውስጥ አካላትን የሚሸፍነውን ስብ፣ በእነርሱም ላይ ያለውን ስብ ሁሉ፣ ¹⁰ሁለቱን ኵላሊቶች ከወገብ አጠገብ ባለው ስባቸው፣ ከኵላሊቶቹም ጋራ የሚያወጣውን ረጅሙን የጒበት ትርፍ ጒረድ ያቅርብ። ¹¹ካህኑም በመሠዊያው ላይ እንደ ምግብ፣ ለእኔ በእሳት የሚቀርብ መሥዋዕት አድርጎ ያቃጥለው።

¹²“መሥዋዕቱ ፍየል ከሆነ፣ በፊቴ ያቅርበው፤ ¹³እጁን በራሱ ላይ ጭኖ በመገናኛው ድንኳን ፊት ያርደው፤ የአሮን ልጆችም ደሙን በመሠዊያው ዙሪያ ሁሉ ይርጩት። ¹⁴ከእርሱም በእሳት የሚቀርብ የእሳት መሥዋዕት ለእኔ ያቅርብ፤ የውስጥ አካላትን የሚሸፍነውን ስብ፣ በእነርሱም ላይ ያለውን ስብ ሁሉ፣ ¹⁵ሁለቱን ኵላሊቶች ከወገብ አጠገብ ባለው ስባቸው፣ ከኵላሊቶቹም ጋራ የሚያወጣውን ረጅሙን የጒበት ትርፍ ጒረድ ያቅርብ። ¹⁶ካህኑም በመሠዊያው ላይ እንደ ምግብ፣ በእሳት የሚቀርብ መሥዋዕት፣ ደስ የሚያሰኝ መዓዛ አድርጎ ያቃጥላቸው። ስብ ሁሉ የእኔ ነው።

¹⁷“ይህ በምትኖሩበት ስፍራ ሁሉ ለልጅ ልጆቻችሁ ዘላቂ ሥርዐት ነው፤ ስብም ሆነ ደም ከቶ አትብሉ።”