ዘሌዋውያን 3 FHB Father's Heart Bible™

3 ¹መስዋእቲ ሓደ ሰብ ካብ ከፍቲ ዝኾነ መስዋእቲ ምስጋና እንተ ኾይኑ፥ ተባዕታይ ኮነ ኣንስተይቲ፥ ጐደሎ ዘይብሉ ኣብ ቅድመይ የቕርቦ። ^a a v1 መስዋእቲ ምስጋና እቲ ከም ምግቢ ዝማቐል ሓደ መስዋእቲ ነበረ — እቲ ዘምልኽ፥ እቶም ካህናትን ኣቦናን ኣብ ሓደ ጣውላ። ምስኡ ዝህሉ ሕብረትን ፍፁምነትን ዘብዕል ነበረ። ²ኢዱ ኣብ ልዕሊ ርእሲ መስዋእቱ ኣንቢሩ፥ ኣብ ኣፍ ደገ እቲ መራኸቢ ድንኳን ይሕረዶ፤ እቶም ካህናት ደቂ ኣሮን ከዓ ነቲ ደም ኣብቲ መሰውኢ ብዅሉ ወገኑ ይንፀግዎ። ³ካብቲ መስዋእቲ ምስጋና ድማ ብሓዊ ተቓፂሉ ዝቐርብ መስዋእቲ ናባይ የቕርብ፦ እቲ ንናይ ውሽጢ ኣካላት ዝጕልብብ ስብሕን ኵሉ እቲ ኣብ ልዕሊኡ ዘሎ ስብሕን፥ ⁴ክልቲአን ዅላሊትን ኣብ ዙርያአን ኣብ ጥቓ ሽምጢ ዘሎ ስብሕን፥ ነቲ ቃንጡጥ ከብዲ ኸዓ ምስ ዅላሊት የልዕሎ። ⁵ደቂ ኣሮን ከዓ ኣብ መሰውኢ፥ ኣብ ልዕሊ እቲ ኣብ ዕንፀይቲ ኣብ ልዕሊ ሓዊ ዘሎ ዝቃፀል መስዋእቲ የቃፅልዎ፤ እዝ ብሓዊ ዝቃፀል መስዋእቲ፥ ንኣይ ደስ ዘብል ጥዑም ጨና እዩ።

⁶ንኣይ ዘቕርቦ መስዋእቲ ምስጋና ካብ ጤለ በጊዕ እንተ ኾይኑ፥ ተባዕታይ ኮነ ኣንስተይቲ፥ ጐደሎ ዘይብሉ የቕርቦ። ⁷ንመስዋእቱ ክኸውን ጡበት በጊዕ እንተ ኣምፀአ፥ ኣብ ቅድመይ የቕርቦ፤ ⁸ኢዱ ኣብ ልዕሊ ርእሲ መስዋእቱ ኣንቢሩ፥ ኣብ ቅድሚ እቲ መራኸቢ ድንኳን ይሕረዶ፤ ደቂ ኣሮን ከዓ ነቲ ደሙ ኣብቲ መሰውኢ ብዅሉ ወገኑ ይንፀግዎ። ⁹ካብቲ መስዋእቲ ምስጋና ድማ ብሓዊ ዝቃፀል መስዋእቲ ናባይ የቕርብ፦ ስብሑ፥ ኣብ ጥቓ ዓንዲ ሕቘ ተቐሪፁ ዝውሰድ ብዘሑ ሕልሕል፥ እቲ ንናይ ውሽጢ ኣካላት ዝጕልብብ ስብሕን ኵሉ እቲ ኣብ ልዕሊኡ ዘሎ ስብሕን፥ ¹⁰ክልቲአን ዅላሊትን ኣብ ጥቓ ሽምጢ ዘሎ ስብሕን፥ ነቲ ቃንጡጥ ከብዲ ኸዓ ምስ ዅላሊት የልዕሎ። ¹¹እቲ ኻህን ከዓ ኣብ መሰውኢ ኸም ምግቢ የቃፅሎ፤ እዝ ናባይ ብሓዊ ዝቐርብ መስዋእቲ እዩ።

¹²መስዋእቱ ጤል እንተ ኾይኑ፥ ኣብ ቅድመይ የቕርቦ፤ ¹³ኢዱ ኣብ ልዕሊ ርእሱ ኣንቢሩ፥ ኣብ ቅድሚ እቲ መራኸቢ ድንኳን ይሕረዶ፤ ደቂ ኣሮን ከዓ ነቲ ደሙ ኣብቲ መሰውኢ ብዅሉ ወገኑ ይንፀግዎ። ¹⁴ካብኡ ድማ ብሓዊ ዝቃፀል መስዋእቲ ናባይ የቕርብ፦ እቲ ንናይ ውሽጢ ኣካላት ዝጕልብብ ስብሕን ኵሉ እቲ ኣብ ልዕሊኡ ዘሎ ስብሕን፥ ¹⁵ክልቲአን ዅላሊትን ኣብ ጥቓ ሽምጢ ዘሎ ስብሐንን፥ ነቲ ቃንጡጥ ከብዲ ኸዓ ምስ ዅላሊት የልዕሎ። ¹⁶እቲ ኻህን ከዓ ኣብ መሰውኢ ኸም ምግቢ የቃፅሎም፤ እዝ ብሓዊ ዝቐርብ መስዋእቲ፥ ደስ ዘብል ጥዑም ጨና እዩ። ኵሉ ስብሒ ናተይ እዩ።

¹⁷እዙይ ኣብ ኵሉ እትነብሩሉ፥ ንውሉድ ወለዶኹም ናይ ዘለኣለም ሕጊ እዩ፦ ዝኾነ ስብሒ ኮነ ዝኾነ ደም ከቶ ኣይትብልዑ።