ዘሌዋውያን 4 FHB Father's Heart Bible™

4 ¹ኣቦና ንሙሴ ከምዙይ ኢሉ ተዛረቦ፦

²ንደቂ እስራኤል ከምዙይ በሎም፦ ሓደ ሰብ እንተይፈለጠ፥ ካብ ትእዛዛት ኣቦና ኣብ ዝኾነ እንተ በደለ፥ ዘይግባእ ነገር እናገበረ፥ ንሓደ ኻባታቶም እንተ ጠሓሰ፥ ³እቲ ዝተቐብአ ካህን ኣብ ልዕሊ ህዝቢ በደል እናኣምፅአ ሓጢኣት እንተ ገበረ፥ ነቲ ዝገበሮ ሓጢኣት ምእንቲ ሓጢኣት ዝስዋእ፥ ጐደሎ ዘይብሉ ንእሽቶ ዝራብዕ ናብ ኣቦና የቕርብ። ^a a v3 እቲ ምእንቲ ሓጢኣት ዝቐርብ መስዋእቲ፥ ነቲ በደል ናይቲ ዝሓጥአ ሰብ ተሰኪሙ፥ ኣብ ክንዳኡ ተቐትለ። ናብቲ ንበደልና ሓንሳብ ንሓዋሩ ኣብ ርእሱ ዝፀወረ ኢየሱስ ድማ የመልክት ነበረ። ⁴ነቲ ዝራብዕ ናብ ኣፍ ደገ መራኸቢ ድንኳን ኣብ ቅድሚ ኣቦና የምፅእ፤ ኢዱ ኣብ ርእሱ የንብር፤ ኣብ ቅድሚ ኣቦና ድማ ይሕረዶ። ⁵እቲ ዝተቐብአ ካህን ካብ ደም እቲ ዝራብዕ ወሲዱ ናብ መራኸቢ ድንኳን የእትዎ። ⁶ኣፃብዕቱ ኣብቲ ደም ይጥማዕ፥ ኣብ ቅድሚ ኣቦና ኣብ ቅድሚ መጋረጃ መቕደስ ድማ ሸውዓተ ሻዕ ይንፀጎ። ⁷እቲ ካህን ካብቲ ደም ወሲዱ፥ ኣብ ቅድሚ ኣቦና ኣብ መራኸቢ ድንኳን ኣብ ዘሎ ኣብ ኣቕርንቲ መሰውኢ ምዑዝ ዕጣን ይገብሮ፤ ነቲ ዝተረፈ ኵሉ ደም እቲ ዝራብዕ ከዓ ኣብ ኣፍ ደገ መራኸቢ ድንኳን ኣብ ዘሎ እግሪ መሰውኢ ዝቃፀል መስዋእቲ የፍስሶ። ⁸ኵሉ ስብሒ ናይቲ ምእንቲ ሓጢኣት ዝስዋእ ዝራብዕ የውፅእ፤ እቲ ንውሽጣዊ ኣካላት ዝጕልብብ ስብሕን ኵሉ እቲ ኣብ ውሽጣዊ ኣካላት ዘሎ ስብሕን። ⁹ክልቲኡ ዅላሊት፥ እቲ ኣብ ጥቓ ሽምጢ ኣብ ልዕሊኡ ዘሎ ስብሕን፥ ቃንጡጥ ከብድን፥ ምስ ዅላሊት ፈልዩ የውፅእ፤ ¹⁰ከምቲ ካብ ዝራብዕ መስዋእቲ ምስጋና ዝውፃእ፤ እቲ ካህን ድማ ኣብ መሰውኢ ዝቃፀል መስዋእቲ የቃፅሎ። ¹¹ናይቲ ዝራብዕ ቈርበትን፥ ኵሉ ስጋኡን፥ ርእሱን፥ ኣእጋሩን፥ ኣምዑቱን፥ ፈርሱን ግና፥ ¹²ነቲ ዝተረፈ ኵሉ ዝራብዕ ናብ ወፃኢ ሰፈር፥ ሓሙዅሽቲ ናብ ዝድፋእ ንፁህ ቦታ የውፅእ፤ ኣብ ልዕሊ ዕንፀይቲ ብሓዊ ከዓ የቃፅሎ፤ ሓሙዅሽቲ ኣብ ዝድፋእ ቦታ ይቃፀል።

¹³ኵሉ ማሕበር እስራኤል እንተይፈለጠ ሓጢኣት እንተ ገበረ፥ እቲ ነገር ድማ ካብ ዓይኒ እቲ ጉባኤ ተሰዊሩ፥ ካብቲ ኣቦና ከይግበር ዝኣዘዞ ንሓደ እንተ ገበሩ፥ በደለኛታት እንተ ኾኑ፥ ¹⁴እቲ ዝገበርዎ ሓጢኣት ምስ ተፈለጦም፥ እቲ ጉባኤ ምእንቲ ሓጢኣት ዝስዋእ ንእሽቶ ዝራብዕ የቕርብ፤ ናብ ቅድሚ መራኸቢ ድንኳን ከዓ የምፅእ። ¹⁵ዓበይቲ እቲ ማሕበር ኣብ ቅድሚ ኣቦና ኣእዳዎም ኣብ ርእሲ እቲ ዝራብዕ የንብሩ፤ ኣብ ቅድሚ ኣቦና ድማ ይሕረድ። ¹⁶እቲ ዝተቐብአ ካህን ድማ ካብ ደም እቲ ዝራብዕ ናብ መራኸቢ ድንኳን የእትዎ። ¹⁷ኣፃብዕቱ ኣብቲ ደም ይጥማዕ፥ ኣብ ቅድሚ ኣቦና ኣብ ቅድሚ መጋረጃ ድማ ሸውዓተ ሻዕ ይንፀግ። ¹⁸ካብቲ ደም ወሲዱ ኣብ ቅድሚ ኣቦና ኣብ መራኸቢ ድንኳን ኣብ ዘሎ ኣብ ኣቕርንቲ መሰውኢ ይገብሮ፤ ነቲ ዝተረፈ ኵሉ ከዓ ኣብ ኣፍ ደገ መራኸቢ ድንኳን ኣብ ዘሎ እግሪ መሰውኢ ዝቃፀል መስዋእቲ የፍስሶ። ¹⁹ኵሉ ስብሑ የውፅእ፤ ኣብ መሰውኢ ድማ የቃፅሎ። ²⁰በዝ ዝራብዕ እዙይ ከምቲ ብዝራብዕ መስዋእቲ ሓጢኣት ዝገበሮ ይገብር። እቲ ካህን ከዓ የስተስርየሎም፤ ይቕረ ኸዓ ኽበሃለሎም እዩ። ²¹ነቲ ዝራብዕ ናብ ወፃኢ ሰፈር የውፅእ፤ ከምቲ ነቲ ቐዳማይ ዝራብዕ ዘቃፀሎ ኸዓ የቃፅሎ፤ ናይቲ ጉባኤ ምእንቲ ሓጢኣት ዝቐርብ መስዋእቲ እዩ።

²²ሓደ ሹም እንተይፈለጠ ካብቲ ኣቦና ከይግበር ዝኣዘዞ ዝኾነ ነገር እናገበረ ሓጢኣት እንተ ገበረ፥ በደለኛ እንተ ኾነ፥ ²³ነቲ ዝገበሮ ሓጢኣት ምስ ፈለጠ፥ ጐደሎ ዘይብሉ ተባዕታይ ጤል ንመስዋእቱ የምፅእ። ²⁴ኢዱ ኣብ ርእሲ እቲ ጤል የንብር፤ ኣብ ቅድሚ ኣቦና ኣብቲ ዝቃፀል መስዋእቲ ዝሕረደሉ ቦታ ድማ ይሕረዶ፤ ንሱ ምእንቲ ሓጢኣት ዝስዋእ መስዋእቲ እዩ። ²⁵እቲ ካህን ካብ ደም ናይቲ ምእንቲ ሓጢኣት ዝስዋእ በፃብዕቱ ወሲዱ፥ ኣብ ኣቕርንቲ መሰውኢ ዝቃፀል መስዋእቲ ይገብሮ፤ ነቲ ዝተረፈ ከዓ ኣብ እግሩ የፍስሶ። ²⁶ኵሉ ስብሑ ኸም ስብሒ መስዋእቲ ምስጋና ኣብ መሰውኢ የቃፅሎ። እቲ ካህን በቲ ሓጢኣቱ የስተስርየሉ፤ ይቕረ ኸዓ ኽበሃለሉ እዩ።

²⁷ካብ ተራ ህዝቢ ሓደ ሰብ እንተይፈለጠ ካብቲ ኣቦና ከይግበር ዝኣዘዞ ንሓደ እናገበረ ሓጢኣት እንተ ገበረ፥ በደል እንተ ኣምፅአ፥ ²⁸ሓጢኣቱ ምስ ፈለጠ፥ ነቲ ዝገበሮ ሓጢኣት ጐደሎ ዘይብላ ኣንስተይቲ ጤል ንመስዋእቱ የምፅእ። ²⁹ኢዱ ኣብ ርእሲ እቲ ምእንቲ ሓጢኣት ዝስዋእ የንብር፤ ኣብቲ ዝቃፀል መስዋእቲ ዝሕረደሉ ቦታ ድማ ይሕረዶ። ³⁰እቲ ካህን ካብ ደሙ በፃብዕቱ ወሲዱ ኣብ ኣቕርንቲ መሰውኢ ዝቃፀል መስዋእቲ ይገብሮ፤ ነቲ ዝተረፈ ኵሉ ከዓ ኣብ እግሩ የፍስሶ። ³¹ኵሉ ስብሑ፥ ከምቲ ካብ መስዋእቲ ምስጋና ዝውፃእ ስብሒ የውፅእ፤ እቲ ካህን ከዓ ኣብ መሰውኢ የቃፅሎ፤ ንኣቦና ጥዑም ጨና እዩ፤ የስተስርየሉ ድማ፤ ይቕረ ኸዓ ኽበሃለሉ እዩ።

³²ንመስዋእቲ ሓጢኣቱ ዝኸውን ጡበት በጊዕ እንተ ኣምፅአ፥ ጐደሎ ዘይብላ ኣንስተይቲ የምፅእ። ³³ኢዱ ኣብ ርእሲ እቲ ምእንቲ ሓጢኣት ዝስዋእ የንብር፤ ኣብቲ ዝቃፀል መስዋእቲ ዝሕረደሉ ቦታ ድማ ምእንቲ ሓጢኣት ዝስዋእ ገይሩ ይሕረዶ። ³⁴እቲ ካህን ካብ ደም ናይቲ ምእንቲ ሓጢኣት ዝስዋእ በፃብዕቱ ወሲዱ፥ ኣብ ኣቕርንቲ እቲ ዝቃፀል መስዋእቲ ዝስዋኣሉ መሰውኢ ይገብሮ፤ ነቲ ዝተረፈ ኵሉ ደም ከዓ ኣብ እግሪ መሰውኢ የፍስሶ። ³⁵ኵሉ ስብሑ፥ ከምቲ ስብሒ ጡበት በጊዕ ካብ መስዋእቲ ምስጋና ዝውፃእ የውፅእ፤ እቲ ካህን ከዓ ኣብ መሰውኢ፥ ኣብ ልዕሊ እቲ ንኣቦና ብሓዊ ዝቐርብ መስዋእቲ የቃፅሎ። እቲ ካህን ድማ በቲ ዝገበሮ ሓጢኣት የስተስርየሉ፤ ይቕረ ኸዓ ኽበሃለሉ እዩ።