ଲେବୀୟ ପୁସ୍ତକ 4 FHB Father's Heart Bible™

4 ¹ଆମ୍ଭମାନଙ୍କ ପିତା ମୋଶାଙ୍କୁ କହିଲେ,

²“ଇସ୍ରାଏଲ ସନ୍ତାନମାନଙ୍କୁ କୁହ, ଯଦି କୌଣସି ଲୋକ ଆମ୍ଭମାନଙ୍କ ପିତାଙ୍କ କୌଣସି ଆଜ୍ଞା ବିରୁଦ୍ଧରେ ଅଜ୍ଞାନରେ ପାପ କରେ, ଅର୍ଥାତ୍‍ ଯାହା କରିବା ଉଚିତ ନୁହେଁ ତାହା କରି ସେଥିମଧ୍ୟରୁ ଗୋଟିକର ଲଙ୍ଘନ କରେ, ³ଯଦି ଅଭିଷିକ୍ତ ଯାଜକ ପାପ କରି ଲୋକମାନଙ୍କ ଉପରେ ଦୋଷ ବହନ କରାଏ, ତେବେ ସେ ଆପଣା କୃତ ପାପ ନିମନ୍ତେ ପାପାର୍ଥକ ବଳିରୂପେ ନିଖୁଣ ଏକ ଯୁବା ବୃଷ ଆମ୍ଭମାନଙ୍କ ପିତାଙ୍କ ଉଦ୍ଦେଶ୍ୟରେ ଆଣିବ। ^a a v3 ପାପାର୍ଥକ ବଳି ପାପକାରୀର ଦୋଷ ବହନ କରି ତାହାର ପରିବର୍ତ୍ତେ ବଧ କରାଯାଉଥିଲା। ଏହା ଯୀଶୁଙ୍କ ପ୍ରତି ଅଙ୍ଗୁଳି ନିର୍ଦ୍ଦେଶ କରୁଥିଲା, ଯେ ଆମ୍ଭମାନଙ୍କ ଦୋଷ ଆପଣା ଉପରେ ଏକାଥରକେ ସମସ୍ତଙ୍କ ନିମନ୍ତେ ବହନ କଲେ। ⁴ସେ ସେହି ବୃଷକୁ ସମାଗମ-ତମ୍ବୁ ଦ୍ଵାର ନିକଟକୁ ଆମ୍ଭମାନଙ୍କ ପିତାଙ୍କ ସମ୍ମୁଖକୁ ଆଣି, ତାହାର ମସ୍ତକ ଉପରେ ଆପଣା ହସ୍ତ ରଖି, ଆମ୍ଭମାନଙ୍କ ପିତାଙ୍କ ସମ୍ମୁଖରେ ତାହାକୁ ବଧ କରିବ। ⁵ଅଭିଷିକ୍ତ ଯାଜକ ସେହି ବୃଷର କିଛି ରକ୍ତ ନେଇ ସମାଗମ-ତମ୍ବୁ ଭିତରକୁ ଆଣିବ। ⁶ସେ ଆପଣା ଅଙ୍ଗୁଳି ସେହି ରକ୍ତରେ ବୁଡ଼ାଇ, ଧର୍ମଧାମର ବିଚ୍ଛେଦବସ୍ତ୍ର ସମ୍ମୁଖରେ ଆମ୍ଭମାନଙ୍କ ପିତାଙ୍କ ସାକ୍ଷାତରେ ସାତ ଥର ତାହା ଛିଞ୍ଚିବ। ⁷ପୁଣି ଯାଜକ ସମାଗମ-ତମ୍ବୁ ମଧ୍ୟରେ ଥିବା ଆମ୍ଭମାନଙ୍କ ପିତାଙ୍କ ସମ୍ମୁଖସ୍ଥ ସୁଗନ୍ଧି ଧୂପବେଦିର ଶୃଙ୍ଗ ଉପରେ ସେହି ରକ୍ତରୁ କିଛି ଦେବ, ଆଉ ବୃଷର ଅବଶିଷ୍ଟ ସମସ୍ତ ରକ୍ତ ସମାଗମ-ତମ୍ବୁ ଦ୍ଵାର ନିକଟସ୍ଥ ହୋମବେଦିର ମୂଳଦେଶରେ ଢାଳିବ। ⁸ସେ ସେହି ପାପାର୍ଥକ ବଳିର ବୃଷର ସମସ୍ତ ମେଦ ବାହାର କରିବ, ଅର୍ଥାତ୍‍ ଅନ୍ତ ଆଚ୍ଛାଦନକାରୀ ମେଦ ଓ ଅନ୍ତ ଉପରିସ୍ଥ ସମସ୍ତ ମେଦ, ⁹ଦୁଇ ବୃକ୍‍କ ଓ ସେଗୁଡ଼ିକ ଉପରିସ୍ଥ କଟିଦେଶ ନିକଟର ମେଦ, ପୁଣି ଯକୃତ ଉପରିସ୍ଥ ଅନ୍ତ୍ରପଟଳ, ଏହିସବୁ ସେ ବୃକ୍‍କ ସହିତ ବାହାର କରିବ, ¹⁰ଯେପରି ମଙ୍ଗଳାର୍ଥକ ବଳିର ବୃଷଠାରୁ ବାହାର କରାଯାଏ; ପୁଣି ଯାଜକ ସେଗୁଡ଼ିକ ହୋମବେଦି ଉପରେ ଦଗ୍ଧ କରିବ। ¹¹ମାତ୍ର ବୃଷର ଚର୍ମ, ତାହାର ସମସ୍ତ ମାଂସ, ମସ୍ତକ, ପାଦ, ଅନ୍ତ ଓ ମଳ, ¹²ଅର୍ଥାତ୍‍ ବୃଷର ଅବଶିଷ୍ଟ ସମସ୍ତ ଅଂଶ ସେ ଛାଉଣି ବାହାରକୁ, ଭସ୍ମ ଢଳା ଯାଉଥିବା ଏକ ଶୁଚି ସ୍ଥାନକୁ ବହିନେଇ, କାଠ ଅଗ୍ନିରେ ଦଗ୍ଧ କରିବ; ଭସ୍ମ ଢଳା ଯାଉଥିବା ସ୍ଥାନରେ ତାହା ଦଗ୍ଧ କରାଯିବ।

¹³“ଯଦି ଇସ୍ରାଏଲର ସମଗ୍ର ମଣ୍ଡଳୀ ଅଜ୍ଞାନରେ ପାପ କରେ ଓ ସେହି ବିଷୟ ସମାଜର ଦୃଷ୍ଟିରୁ ଗୁପ୍ତ ଥାଏ, ପୁଣି ଆମ୍ଭମାନଙ୍କ ପିତା ଯାହା କରିବାକୁ ବାରଣ କରିଅଛନ୍ତି, ସେମାନେ ସେହିସବୁ ମଧ୍ୟରୁ ଗୋଟିକ କରି ଦୋଷୀ ହୁଅନ୍ତି, ¹⁴ଯେତେବେଳେ ସେମାନଙ୍କ କୃତ ପାପ ପ୍ରକାଶ ପାଏ, ସେତେବେଳେ ସମାଜ ପାପାର୍ଥକ ବଳିରୂପେ ଏକ ଯୁବା ବୃଷ ଉତ୍ସର୍ଗ କରିବ ଓ ତାହାକୁ ସମାଗମ-ତମ୍ବୁ ସମ୍ମୁଖକୁ ଆଣିବ। ¹⁵ମଣ୍ଡଳୀର ପ୍ରାଚୀନବର୍ଗ ଆମ୍ଭମାନଙ୍କ ପିତାଙ୍କ ସମ୍ମୁଖରେ ସେହି ବୃଷର ମସ୍ତକ ଉପରେ ହସ୍ତ ରଖିବେ; ତେବେ ଆମ୍ଭମାନଙ୍କ ପିତାଙ୍କ ସମ୍ମୁଖରେ ତାହା ବଧ କରାଯିବ। ¹⁶ତହିଁ ଉତ୍ତାରୁ ଅଭିଷିକ୍ତ ଯାଜକ ସେହି ବୃଷର କିଛି ରକ୍ତ ସମାଗମ-ତମ୍ବୁ ଭିତରକୁ ଆଣିବ। ¹⁷ସେ ଆପଣା ଅଙ୍ଗୁଳି ସେହି ରକ୍ତରେ ବୁଡ଼ାଇ ବିଚ୍ଛେଦବସ୍ତ୍ର ସମ୍ମୁଖରେ ଆମ୍ଭମାନଙ୍କ ପିତାଙ୍କ ସାକ୍ଷାତରେ ସାତ ଥର ଛିଞ୍ଚିବ। ¹⁸ସେ ସମାଗମ-ତମ୍ବୁ ମଧ୍ୟରେ ଆମ୍ଭମାନଙ୍କ ପିତାଙ୍କ ସମ୍ମୁଖସ୍ଥ ବେଦିର ଶୃଙ୍ଗ ଉପରେ ସେହି ରକ୍ତରୁ କିଛି ଦେବ, ତହିଁ ଉତ୍ତାରୁ ସମାଗମ-ତମ୍ବୁ ଦ୍ଵାର ନିକଟସ୍ଥ ହୋମବେଦିର ମୂଳଦେଶରେ ଅବଶିଷ୍ଟ ସମସ୍ତ ରକ୍ତ ଢାଳିବ। ¹⁹ସେ ତାହାର ସମସ୍ତ ମେଦ ବାହାର କରି ବେଦି ଉପରେ ଦଗ୍ଧ କରିବ। ²⁰ପାପାର୍ଥକ ବଳିର ବୃଷ ପ୍ରତି ଯେରୂପ କରିଥିଲା, ଏହି ବୃଷ ପ୍ରତି ମଧ୍ୟ ସେରୂପ କରିବ। ଏହିରୂପେ ଯାଜକ ସେମାନଙ୍କ ନିମନ୍ତେ ପ୍ରାୟଶ୍ଚିତ୍ତ କରିବ, ପୁଣି ସେମାନେ କ୍ଷମାପ୍ରାପ୍ତ ହେବେ। ²¹ସେ ସେହି ବୃଷକୁ ଛାଉଣି ବାହାରକୁ ବହିନେଇ, ପ୍ରଥମ ବୃଷକୁ ଯେପରି ଦଗ୍ଧ କରିଥିଲା ସେପରି ତାହାକୁ ଦଗ୍ଧ କରିବ; ଏହା ସମାଜର ପାପାର୍ଥକ ବଳି ଅଟେ।

²²“ଯେତେବେଳେ କୌଣସି ଅଧ୍ୟକ୍ଷ ପାପ କରେ, ଅର୍ଥାତ୍‍ ଆମ୍ଭମାନଙ୍କ ପିତା ଯାହା କରିବାକୁ ବାରଣ କରିଅଛନ୍ତି, ତହିଁ ମଧ୍ୟରୁ କୌଣସି ବିଷୟ ଅଜ୍ଞାନରେ କରି ଦୋଷୀ ହୁଏ, ²³ଯଦି ସେ ଆପଣା କୃତ ପାପ ବିଷୟ ଜାଣିପାରେ, ତେବେ ସେ ଆପଣା ବଳିରୂପେ ନିଖୁଣ ଏକ ଅଜା ଛେଳି ଆଣିବ। ²⁴ସେ ସେହି ଛେଳିର ମସ୍ତକ ଉପରେ ଆପଣା ହସ୍ତ ରଖି, ଯେଉଁ ସ୍ଥାନରେ ହୋମବଳି ବଧ କରାଯାଏ, ସେହି ସ୍ଥାନରେ ଆମ୍ଭମାନଙ୍କ ପିତାଙ୍କ ସମ୍ମୁଖରେ ତାହାକୁ ବଧ କରିବ—ଏହା ପାପାର୍ଥକ ବଳି। ²⁵ଯାଜକ ଆପଣା ଅଙ୍ଗୁଳିରେ ପାପାର୍ଥକ ବଳିର କିଛି ରକ୍ତ ନେଇ ହୋମବେଦିର ଶୃଙ୍ଗ ଉପରେ ଦେବ, ତହିଁ ଉତ୍ତାରୁ ଅବଶିଷ୍ଟ ରକ୍ତ ତହିଁର ମୂଳଦେଶରେ ଢାଳିବ। ²⁶ମଙ୍ଗଳାର୍ଥକ ବଳିର ମେଦ ତୁଲ୍ୟ ସେ ତାହାର ସମସ୍ତ ମେଦ ବେଦି ଉପରେ ଦଗ୍ଧ କରିବ। ଏହିରୂପେ ଯାଜକ ତାହାର ପାପ ନିମନ୍ତେ ପ୍ରାୟଶ୍ଚିତ୍ତ କରିବ, ପୁଣି ସେ କ୍ଷମାପ୍ରାପ୍ତ ହେବ।

²⁷“ଯଦି ସାଧାରଣ ଲୋକମାନଙ୍କ ମଧ୍ୟରୁ କେହି ଅଜ୍ଞାନରେ ପାପ କରେ, ଅର୍ଥାତ୍‍ ଆମ୍ଭମାନଙ୍କ ପିତା ଯାହା କରିବାକୁ ବାରଣ କରିଅଛନ୍ତି, ତହିଁ ମଧ୍ୟରୁ କୌଣସି ଗୋଟିକ କରି ଦୋଷୀ ହୁଏ, ²⁸ଯେତେବେଳେ ସେ ଆପଣା ପାପ ବିଷୟ ଜ୍ଞାତ ହୁଏ, ସେତେବେଳେ ସେ ଆପଣା କୃତ ପାପ ନିମନ୍ତେ ଆପଣା ବଳିରୂପେ ନିଖୁଣ ଏକ ମାଈ ଛେଳି ଆଣିବ। ²⁹ସେ ସେହି ପାପାର୍ଥକ ବଳିର ମସ୍ତକ ଉପରେ ଆପଣା ହସ୍ତ ରଖି ହୋମବଳିର ସ୍ଥାନରେ ତାହାକୁ ବଧ କରିବ। ³⁰ଯାଜକ ଆପଣା ଅଙ୍ଗୁଳିରେ ତହିଁର କିଛି ରକ୍ତ ନେଇ ହୋମବେଦିର ଶୃଙ୍ଗ ଉପରେ ଦେବ, ତହିଁ ଉତ୍ତାରୁ ଅବଶିଷ୍ଟ ସମସ୍ତ ରକ୍ତ ତହିଁର ମୂଳଦେଶରେ ଢାଳିବ। ³¹ମଙ୍ଗଳାର୍ଥକ ବଳିରୁ ଯେପରି ମେଦ ବାହାର କରାଯାଏ, ସେପରି ସେ ତହିଁର ସମସ୍ତ ମେଦ ବାହାର କରିବ; ପୁଣି ଯାଜକ ଆମ୍ଭମାନଙ୍କ ପିତାଙ୍କ ଉଦ୍ଦେଶ୍ୟରେ ସୁବାସିତ ଆଘ୍ରାଣାର୍ଥେ ତାହା ବେଦି ଉପରେ ଦଗ୍ଧ କରିବ, ଆଉ ତାହା ନିମନ୍ତେ ପ୍ରାୟଶ୍ଚିତ୍ତ କରିବ, ପୁଣି ସେ କ୍ଷମାପ୍ରାପ୍ତ ହେବ।

³²“ଯଦି ସେ ଆପଣା ପାପାର୍ଥକ ବଳିରୂପେ ଏକ ମେଷଶାବକ ଆଣେ, ତେବେ ସେ ନିଖୁଣ ଏକ ମାଈ ଆଣିବ। ³³ସେ ସେହି ପାପାର୍ଥକ ବଳିର ମସ୍ତକ ଉପରେ ଆପଣା ହସ୍ତ ରଖି, ଯେଉଁ ସ୍ଥାନରେ ହୋମବଳି ବଧ କରାଯାଏ, ସେହି ସ୍ଥାନରେ ପାପାର୍ଥକ ବଳିରୂପେ ତାହାକୁ ବଧ କରିବ। ³⁴ଯାଜକ ଆପଣା ଅଙ୍ଗୁଳିରେ ପାପାର୍ଥକ ବଳିର କିଛି ରକ୍ତ ନେଇ, ଯେଉଁ ବେଦିରେ ହୋମବଳି କରାଯାଏ ତହିଁର ଶୃଙ୍ଗ ଉପରେ ଦେବ, ତହିଁ ଉତ୍ତାରୁ ଅବଶିଷ୍ଟ ସମସ୍ତ ରକ୍ତ ବେଦିର ମୂଳଦେଶରେ ଢାଳିବ। ³⁵ମଙ୍ଗଳାର୍ଥକ ବଳିରୁ ଯେପରି ମେଷଶାବକର ମେଦ ବାହାର କରାଯାଏ, ସେପରି ସେ ତହିଁର ସମସ୍ତ ମେଦ ବାହାର କରିବ; ପୁଣି ଯାଜକ ଆମ୍ଭମାନଙ୍କ ପିତାଙ୍କ ଉଦ୍ଦେଶ୍ୟରେ ଅଗ୍ନିକୃତ ଉପହାର ଉପରେ ବେଦିରେ ତାହା ଦଗ୍ଧ କରିବ। ଏହିରୂପେ ଯାଜକ ତାହାର କୃତ ପାପ ନିମନ୍ତେ ତାହା ପାଇଁ ପ୍ରାୟଶ୍ଚିତ୍ତ କରିବ, ପୁଣି ସେ କ୍ଷମାପ୍ରାପ୍ତ ହେବ।”