Khyama pabole Pitri laga rasta
Najani kene kora pap ke bhi thik kori bole lage, aru jimmadari jiman bisi, daam bhi oman bisi: abhishek kora purohit nohoile pura sobha nimite ekta mota goru, ekjon neta nimite ekta mota chagol, aru baki manuh nimite ekta chagol nohoile bhera bacha. Tar pichete etu kotha: tai ke maaf kori dibo.
4 1Amar Pitri pora Moses ke koise,
2“Israel manuh khan ke kobi: Jodi kunba manuh najani kene amar Pitri laga hukum khan majote kiba ekta bhirodh te paap kore, kora nalage kaam kori kene, aru eitu khan majote ekta bhangai dile, 3jodi abhishek kora purohit pora paap kore, manuh khan uporte dosh anile, tai pora kora paap nimite paap laga boli hisab te amar Pitri usorte eku golti nathaka ekta jawan bail anibo lage. a a v3 Paap laga boli tu paap kora manuh laga dosh bukhi loise aru tarkhan laga bodli te morai disele. Eitu Jisu phale dikhai disele, Kun pora amar dosh Tar uporte ekbar nimite loise. 4Tai bail tu amar Pitri usorte milon tambu laga dorja usorte anibo, tar matha uporte tar hath rakhibo, aru amar Pitri usorte eitu ke morabo. 5Abhishek kora purohit pora bail laga olop khoon loi kene milon tambu bhitorte anibo. 6Tai khoon te tar anguli dubai kene, pobitro jagah laga porda usorte amar Pitri usorte sat bar chitikai dibo. 7Purohit pora milon tambu bhitorte thaka amar Pitri usorte sugandh dhup laga bedi laga seng khan uporte olop khoon lagabo, aru bail laga baki thaka sob khoon milon tambu laga dorja usorte thaka jolai diya boli laga bedi laga tol te hali dibo. 8Tai paap laga boli bail laga sob charbi ulai lobo: bhitor laga saman dhaki thaka charbi, aru bhitor laga saman uporte thaka sob charbi. 9Duita gurda, kuhai usorte tar uporte thaka charbi, aru kolija laga ek bhag—tai gurda khan logote ulai lobo, 10milap laga boli laga goru pora ulai luwa nisina; purohit pora eitu khan jolai diya boli laga bedi uporte julai dibo. 11Kintu bail laga chamra, tar sob mangso, matha, theng khan, bhitor laga antoli, aru mol. 12Tai bail laga baki thaka sob tambu basti laga bahar te chani phela jaga, ekta sapha jagah te loi jabo, aru khuri laga jui te julai dibo; chani phela jaga te eitu ke julai dibo lage.
13“Jodi Israel laga pura mondoli najani kene paap kore, aru hei kotha tu sabha laga suku pora lukai thakise, aru amar Pitri pora kora nalage koi diya kaam khan majote ekta kore, aru doshi hoi jai, 14Jitia tarkhan pora kora paap tu jana hoi jai, sabha pora paap laga boli hisab te ekta jawan bail dibo aru eitu milon tambu usorte anibo. 15Mondoli laga bura manuh khan pora amar Pitri usorte bail laga matha uporte hath rakhibo; titia amar Pitri usorte eitu ke morabo. 16Titia abhishek kora purohit pora bail laga olop khoon milon tambu bhitorte anibo. 17Tai khoon te tar anguli dubai kene porda usorte amar Pitri usorte sat bar chitikai dibo. 18Tai milon tambu bhitorte amar Pitri usorte bedi laga seng khan uporte olop khoon lagabo, titia baki thaka sob khoon milon tambu laga dorja usorte, jolai diya boli laga bedi laga tol te hali dibo. 19Tai tar sob charbi ulai loi kene bedi uporte julai dibo. 20Tai paap laga boli laga bail logote kora nisina eitu bail logote bhi eneka he koribo. Eneka kori kene purohit pora tarkhan nimite prayaschit koribo, aru tarkhan ke khyama kori dibo. 21Tai bail tu tambu basti laga bahar te loi jai kene poila bail ke julai diya nisina eitu ke bhi julai dibo; eitu sabha laga paap laga boli ase.
22“Jitia ekjon cholawta pora paap kore, najani kene amar Pitri pora kora nalage koi diya kiba kaam kori kene, aru doshi hoi jai, 23jodi tai pora kora paap tu janibo pai, tai tar boli hisab te eku golti nathaka ekta mota chagol anibo lage. 24Tai chagol laga matha uporte tar hath rakhibo aru amar Pitri usorte jolai diya boli morai diya jagah te eitu ke morabo—eitu paap laga boli ase. 25Purohit pora tar anguli pora paap laga boli laga olop khoon loi kene jolai diya boli laga bedi laga seng khan uporte lagabo, titia baki thaka tol te hali dibo. 26Tai milap laga boli laga charbi nisina tar sob charbi bedi uporte julai dibo. Purohit pora tar paap nimite prayaschit koribo, aru tai ke khyama kori dibo.
27“Jodi sadharon manuh khan majote kunba najani kene paap kore, amar Pitri pora kora nalage koi diya kaam khan majote kiba ekta kori kene, aru doshi hoi jai, 28jitia tai tar paap janibo pai, tai pora kora paap nimite tar boli hisab te eku golti nathaka ekta maiki chagol anibo lage. 29Tai paap laga boli laga matha uporte tar hath rakhibo aru jolai diya boli laga jagah te eitu ke morabo. 30Purohit pora tar anguli pora tar olop khoon jolai diya boli laga bedi laga seng khan uporte lagabo, titia baki thaka sob tol te hali dibo. 31Tai milap laga boli pora charbi ulai luwa nisina tar sob charbi ulai lobo; purohit pora eitu ke bedi uporte julai dibo—amar Pitri nimite ekta mitha gundh—aru tar nimite prayaschit koribo, aru tai ke khyama kori dibo.
32“Jodi tai tar paap laga boli hisab te ekta mer bacha ane, tai eku golti nathaka ekta maiki anibo lage. 33Tai paap laga boli laga matha uporte tar hath rakhibo aru jolai diya boli morai diya jagah te paap laga boli hisab te eitu ke morabo. 34Purohit pora tar anguli pora paap laga boli laga olop khoon loi kene jolai diya boli kora jagah laga bedi laga seng khan uporte lagabo, titia baki thaka sob khoon bedi laga tol te hali dibo. 35Tai milap laga boli pora mer bacha laga charbi ulai luwa nisina tar sob charbi ulai lobo; purohit pora amar Pitri nimite jui laga boli khan uporte bedi te eitu ke julai dibo. Eneka kori kene purohit pora tai laga kora paap nimite tar nimite prayaschit koribo, aru tai ke khyama kori dibo.”