Bou Shabü Apla Lam
Mashikan shed shonbü kho ong thela thükkei, hoba naanglabü thükkaboua lembü khaibou kilabü: naangan kibü ungshedbou ayingsi Israel chung pendou shanga masu pongsu che, jaishou che shanga sanlon paang che, aoao che shanga sanlon saoen ayingsi sanlon shoushou che. Kheijinei ngüh ho ki: haoeibü shabü apbulabü.
4 1Seneibü Bouei Mosa to laukei:
2“Israelbü to lenashi, Müt cheei mashikan, seneibü Bou sakkubü ka chenei peisilei, akümlabü kho kümbo, shed shonalonga, hoba khübü ka chenei lulimlaje, 3ladang naangan kibü ungshedbouei shed shonlaje, kho mütshuong la shedbü sungbalabü, kheijinei haoei shed shonbü shanga, shabü lembü shanga nali athebü masu paangshou che seneibü Bou jungto jungan loujan. a a v3 Shabü lembü khoei shed shonbü müteibü shedbü onkei hoba haoen jeila haitikei. Ho Jisu to noksakei, aoei seneibü shedbü che ongnei hao thüka loukei. 4Haoei masu pongsu kho kamshang neichem koukhüna seneibü Bou thedanga leian loujan, hoba khoeibü khua haoeibü ikei shangetjan, hoba kho seneibü Bou thedanga haitijan. 5Naangan kibü ungshedbouei masu pongsueibü sii khüka sungan, kamshang neichem to jungan atlabü. 6Haoei haoeibü ikjishou sii khünei hamlabü, hoba saopobü thangtet nei thedanga seneibü Bou thedanga nyetnei lakkulabü. 7Hobaje ungshedbouei sii khüka, seneibü Bou thedanga, laobou kamshang neichema kibü ponlem jen juoklabü lemshang laang shuong to phokulabü, hoba masu pongsueibü joubü sii pendou kho kamshang neichem koukhüna kibü juokbü lembü lemshang youjunga jonbü. 8Haoei shabü lembü masu pongsueibü haabü pendou sungenlabü; senmaang yuklepbü haabü, hoba senmaanga kibü haabü pendou, 9hoba kelang penyi hoba khünei hapa kibü haabü hoba sen yukbü kho kelang yoan haoei sungenlabü, 10sangmai lembü masu pongsu ka sungenbü tegü; hoba ungshedbouei kho juokbü lembü lemshang thüka juoklabü. 11Lausikei masu pongsu khon, khoeibü phe pendou yoa, khu, you hoba senmaang, hoba shiang phet, 12haoei masu pongsueibü joubü pendou shaishang khong aeto, tap apshang saoposhang kaoen to sungbalabü, hoba kho bu wana jikan aplabü; tap apshang kaoena kho jikan aplabü.
13Ladang Israel shuong pendouei mashikan shed shonalonga, hoba kho ngüh shuong nyek ka huan kialonga, hoba seneibü Bouei akümlabü dogo sakkubü thinei ka chenei kümbo, shedbü kialonga, 14haoen shed shonbü kho ngean kialonga, shuongei shabü lembü shanga masu paangshou che lemjan, hoba kho kamshang neichem thedangto leian loujan. 15Shuong jaishou shuongei masu pongsu khua seneibü Bou thedanga haoeneibü ikei shangetlabü; kheijinei kho seneibü Bou thedanga haitilabü. 16Kheijinei naangan kibü ungshedbouei masu pongsueibü sii khüka kamshang neichem to jungan atlabü. 17Haoei haoeibü ikjishou sii khünei hamlabü, hoba thangtet nei thedanga seneibü Bou thedanga nyetnei lakkulabü. 18Hoba haoei sii khüka kamshang neichema seneibü Bou thedanga lemshang laang shuonga naangkulabü, hoba joubü pendou kho juokbü lembü lemshang youjunga, kamshang neichem koukhüna jonan aplabü. 19Hoba haoei khoeibü haabü pendou sungan lemshang thüka juoklabü. 20Ho masu pongsu to haoei shabü lembü masu pongsu to kümbü tegütham kümlabü. Kheijinei ungshedbouei haoen shanga saumei saülabü, hoba haoen la shedbü apbulabü. 21Hoba haoei masu pongsu kho kamshang khong aeto leian hauan, shaangla masu pongsu juokbü tegü juoklabü; ho eikshuongeibü shabü lembü ki.
22Leiyeibü cheei mashikan, seneibü Bouei akümjan dogo sakkubü pendoua chenei kümlaje, hoba shedbü kilaje, 23Ladang haoei shonbü shabü kho ngelaje, haoei haoeibü lembü shanga lon paang mo alebü che junglabü. 24Haoei loneibü khua haoeibü ikei shangetlabü, hoba lanei juokbü lembü seneibü Bou thedanga haitida khünei kho haitilabü; kho shabü lembü ki. 25Ungshedbouei shabü lembü sii khüka haoeibü ikjishouei sunglabü, hoba juokbü lembü lemshang laang shuonga naangkulabü, hoba joubü sii kho lemshang youjunga jonan aplabü. 26Haoei khoeibü haabü pendou sangmai lembü haabü tegü lemshang thüka juoklabü. Hoba ungshedbouei haoeibü shabü shanga saumei saülabü, hoba hao la shedbü apbulabü.
27Jembü müt cheei mashikan shabü shonalonga, seneibü Bouei akümjan dogo sakkubü yoa chenei kümlaje, hoba shedbü kilaje, 28Ladang haoei haoeibü shabü kho ngelaje, haoei shonbü shabü shanga haoeibü lembü, lon saoen mo alebü che junglabü. 29Haoei shabü lembü khua haoeibü ikei shangetlabü, hoba lanei juokbü lembü haitida khünei kho haitilabü. 30Ungshedbouei khoeibü sii khüka haoeibü ikjishouei juokbü lembü lemshang laang shuonga naangkulabü, hoba joubü sii pendou kho lemshang youjunga jonan aplabü. 31Sangmai lembü ka haabü sungan phobü tegü, haoei khoeibü haabü pendou sunglabü; hoba ungshedbouei seneibü Bou la ponlem maibü shanga lemshang thüka juoklabü, hoba hao shanga saumei saülabü, hoba hao la shedbü apbulabü.
32Haoei shabü lembü shanga sanlon shoushou junglaje, haoei pi mo alebü che junglabü. 33Haoei shabü lembü khua haoeibü ikei shangetlabü, hoba lanei juokbü lembü haitida khünei kho shabü lembü shanga haitilabü. 34Ungshedbouei shabü lembü sii khüka haoeibü ikjishouei sunglabü, hoba juokbü lembü lemshang laang shuonga naangkulabü, hoba joubü sii pendou kho lemshang youjunga jonan aplabü. 35Sangmai lembü ka sanlon haabü sungan apbü tegü, haoei khoeibü haabü pendou sungan aplabü; hoba ungshedbouei kho seneibü Bou to wanei lembü thüka lemshanga juoklabü. Kheijinei haoei shonbü shabü shanga ungshedbouei hao shanga saüsimaü hangan apla kümlabü, hoba haoeibü shedbü apbulabü.”
