Nzila ya Tata ya ndoluka ya masumu
Disumu disadiku konda kuzaya difweti kululwa phi, amana kabu kisi tombuka bwosu mutu kenina wa lukumu: mwana ngombi kikuma kya nganga Nzambi wasolwa holo kikuma kya kibuka kyosu, khombu wa yakala kikuma kya pfumu, khombu holo mwana mukoku kikuma kya mutu wosu wakwawu. Kunima mambu mama: kalólokwa.
Tata wetu kisi zonza mu mavese 2–35
4 1Tata wetu wázimbula kwena Moyize:
2«Zimbula kwena bisi Kiseledi: Yuka ni mutu kasadi disumu konda kuzaya ha mosi mwa mitsiku mya Tata wetu, mu kuhanga mana mafwaniku kuhangama, amana kakúlula mosi mwa myawu, 3Yuka ni nganga Nzambi wuna básiti masi kasadi disumu, amana kanata ndola ha batu, kafweti nata kwena Tata wetu mwana ngombi konda lebakani hanga kimenga kya disumu, kikuma kya disumu dina kasadi. a a v3 Kimenga kya disumu kyázita ndola ya mutu wuna wásadila disumu amana báhonda kyawu mu kifulu kyandi. Kyásongila ku Yesu, wuna wábonga ndola yetu hana thandu yandi mu mbala yimosi kikuma kya boosu. 4Kafweti nata ngombi ku mwelu wa sombolu ya lukutakanu ku thwala ya Tata wetu, katula koku dyandi ha mutwa wawu, amana kakudika wawu ku thwala ya Tata wetu. 5Nganga Nzambi wuna básiti masi kafweti bonga ndambu ya menga ma ngombi amana kanata mawu muna sombolu ya lukutakanu. 6Kafweti vundika mulembu wandi muna menga, amana kasophula mawu mbala nsambwadi ku thwala ya Tata wetu, ku thwala ya kibwiku kya kizika. 7Nganga Nzambi kafweti tula ndambu ya menga ha mphoka za mesa ma kuyokila pfwabidi ku thwala ya Tata wetu, mana menina muna sombolu ya lukutakanu, amana kalubula menga moosu mahika ma ngombi ha tsi ya mesa ma kimenga kya kuyoka, ku mwelu wa sombolu ya lukutakanu. 8Kafweti katula madisa moosu ma ngombi ya kimenga kya disumu: disa dina difidinga munda, yi madisa moosu mana menina ha munda. 9Mafyu modi, madisa mana menina ha mawu ha ndambu ya luketu, yi ndambu ya kibundi—kafweti katula mawu kumosi yi mafyu. 10Bwosu bisi katula mawu mu ngombi ya kimenga kya ngemba; nganga Nzambi kafweti yoka mawu ha mesa ma kimenga kya kuyoka. 11Kaasi nkanda wa ngombi, misuni myawu myosu, mutwa, malu, munda, yi tufi. 12Kafweti nata ngombi yosu yahika ku phenza ya mbanza, ku kifulu kyatoma kuna bisi losa mbombi, amana kayoka yawu ha mbawu ya miti; yifweti yokwa kuna bisi losa mbombi.
13«Yuka ni kibuka kyosu kya Kiseledi kasadi disumu konda kuzaya, amana dyambu dyasweka ku mesu ma kibuka, amana basadi mosi mwa mana Tata wetu kázimbwala ni mafwaniku kuhangama, amana bakituka ba ndola. 14Muna tangwa dina disumu dina basadi diazayakana, kibuka kafweti tambika mwana ngombi hanga kimenga kya disumu, amana kanata wawu ku thwala ya sombolu ya lukutakanu. 15Bambuta ba kibuka batula moku mawu ha mutwa wa ngombi ku thwala ya Tata wetu; amana bakudika wawu ku thwala ya Tata wetu. 16Amana nganga Nzambi wuna básiti masi kafweti nata ndambu ya menga ma ngombi muna sombolu ya lukutakanu. 17Kafweti vundika mulembu wandi muna menga amana kasophula mbala nsambwadi ku thwala ya Tata wetu, ku thwala ya kibwiku. 18Kafweti tula ndambu ya menga ha mphoka za mesa ma kimenga ku thwala ya Tata wetu muna sombolu ya lukutakanu, amana kalubula moosu mahika ha tsi ya mesa ma kimenga kya kuyoka, ku mwelu wa sombolu ya lukutakanu. 19Kafweti katula madisa mawu moosu amana kayoka mawu ha mesa ma kimenga. 20Kafweti hanga ngombi yayi phila mosi yi ngombi ya kimenga kya disumu. Buna nganga Nzambi kafweti fidinga masumu ma bawu, amana malolukini. 21Kafweti nata ngombi ku phenza ya mbanza amana kayoka yawu bwosu kayoka ngombi ya theti; yawu yenina kimenga kya disumu kya kibuka.
22«Yuka ni pfumu kasadi disumu, konda kuzaya, mu kuhanga mosi mwa mana Tata wetu kázimbwala ni mafwaniku kuhangama, amana kakituka wa ndola, 23Yuka ni kazaya disumu dina kasadi, kafweti nata hanga dikabu dyandi nkhombu wa yakala konda lebakani. 24Kafweti tula koku dyandi ha mutwa wa nkhombu amana kakudika wawu kuna bisi kudika kimenga kya kuyoka ku thwala ya Tata wetu—kimenga kya disumu. 25Nganga Nzambi kafweti bonga ndambu ya menga ma kimenga kya disumu mu mulembu wandi, amana katula mawu ha mphoka za mesa ma kimenga kya kuyoka, amana kalubula mahika ha tsi yawu. 26Kafweti yoka madisa mawu moosu ha mesa ma kimenga, bwosu disa dya kimenga kya ngemba. Nganga Nzambi kafweti fidinga disumu dyandi, amana dyalolukini.
27«Yuka ni mutu wumosi wa batu ba phamba kasadi disumu konda kuzaya, mu kuhanga mosi mwa mana Tata wetu kázimbwala ni mafwaniku kuhangama, amana kazíta ndola, 28Muna tangwa kabakula disumu dyandi, kafweti nata nkhombu wa mukhetu konda lebakani hanga dikabu dyandi, kikuma kya disumu dina kasadi. 29Kafweti tula koku dyandi ha mutwa wa kimenga kya disumu amana kakudika wawu ku kifulu kya kimenga kya kuyoka. 30Mu mulembu wandi nganga Nzambi katula ndambu ya menga mawu ha mphoka za mesa ma kimenga kya kuyoka, amana kalubula moosu mahika ha tsi yawu. 31Kafweti katula madisa mawu moosu, bwosu bisi katula disa mu kimenga kya ngemba; nganga Nzambi kafweti yoka mawu ha mesa ma kimenga—tsudi ya kitoku kwena Tata wetu—amana kafweti fidinga disumu dyandi, amana dyalolukini.
32«Yuka ni kanata mwana mukoku hanga kimenga kyandi kya disumu, kafweti nata wa mukhetu konda lebakani. 33Kafweti tula koku dyandi ha mutwa wa kimenga kya disumu amana kakudika wawu hanga kimenga kya disumu kuna bisi kudika kimenga kya kuyoka. 34Mu mulembu wandi nganga Nzambi kafweti bonga ndambu ya menga ma kimenga kya disumu amana katula mawu ha mphoka za mesa ma kimenga kuna bisi hanga bimenga bya kuyoka, amana kalubula menga moosu mahika ha tsi ya mesa ma kimenga. 35Kafweti katula madisa mawu moosu, bwosu bisi katula disa dya mwana mukoku mu kimenga kya ngemba; nganga Nzambi kafweti yoka mawu ha mesa ma kimenga, hana thandu ya bimenga bya mbawu kwena Tata wetu. Buna nganga Nzambi kafweti fidinga disumu dyandi dina kasadi, amana dyalolukini.»
