ዮናስ 4

4 ¹ይህ ነገር ግን ዮናስን እጅግ አስከፋው፤ በቍጣም ነደደ። ²ወደ አባታችንም ጸለየ፤ “አባት ሆይ፣ እባክህ፣ በገዛ አገሬ ሳለሁ የተናገርሁት ይህ አልነበረምን? ባለ ጸጋ፣ ርኅሩኅ አባት፣ ለቍጣ የዘገየህ፣ በኪዳን ፍቅር የተትረፈረፍህ፣ መዓትን ከመላክ የምትመለስ መሆንህን ዐውቄ ነበርና አስቀድሜ ወደ ተርሴስ የሸሸሁት ስለዚህ ነው። ³አሁንም አባታችን ሆይ፣ እባክህ ነፍሴን ከእኔ ውሰድ፤ ከሕይወት ሞት ይሻለኛልና።”

⁴አባታችንም፣ “እንዲህ መቈጣትህ ተገቢ ነውን?” አለ።

⁵ዮናስም ከከተማዪቱ ወጥቶ በምሥራቅ በኩል ተቀመጠ፤ በዚያም ለራሱ ዳስ ሠርቶ ከጥላው ሥር ተቀመጠ፤ በከተማዪቱ ላይ የሚሆነውንም ለማየት ይጠባበቅ ነበር። ⁶አባታችንም ተክል አዘጋጅቶ በራሱ ላይ ጥላ እንዲሆንለት፣ ከመከራውም እንዲያሳርፈው በዮናስ ላይ ከፍ ብሎ እንዲያድግ አደረገው፤ ዮናስም ስለ ተክሉ እጅግ ደስ አለው። ⁷በማግስቱ ንጋት፣ አባታችን ተክሉን የሚመታ ትል አዘጋጀ፤ ተክሉም ደረቀ። ⁸ፀሓይ በወጣች ጊዜ፣ አባታችን አቃጣይ የምሥራቅ ነፋስ ላከ፤ ፀሓይም ዮናስ እስኪደክም ድረስ በራሱ ላይ መታው። ይሞትም ዘንድ ተመኝቶ፣ “ከመኖር ሞት ይሻለኛል” አለ።

⁹አባታችን ግን ዮናስን፣ “ስለ ተክሉ መቈጣትህ ተገቢ ነውን?” ሲል ጠየቀው። እርሱም፣ “ተገቢ ነው፤ እስከ ሞት ድረስ ተቈጥቻለሁ” አለ።

¹⁰አባታችንም እንዲህ አለ፤ “ላልደከምህበትም ሆነ ላላሳደግኸው፣ በአንዲት ሌሊት በቅሎ በአንዲት ሌሊት ለደረቀው ተክል ራራህለት። ¹¹ታዲያ ቀኛቸውን ከግራቸው ለይተው የማያውቁ ከመቶ ሃያ ሺህ የሚበዙ ሰዎች፣ እንዲሁም ብዙ እንስሳት ባሉባት በዚያች በታላቂቱ ከተማ በነነዌ እኔ ልራራ አይገባኝምን?” ^a a v11 መጽሐፉ በአባታችን የርኅራኄ ጥያቄ ይደመደማል፤ ይህም ከእስራኤል ባሻገር ላሉት አሕዛብ ያለውን ልቡን ያሳያል። ኢየሱስ የዮናስን ሦስት ቀንና ሦስት ሌሊት የራሱ ትንሣኤ ምልክት አድርጎ ይጠቅሳል (ማቴዎስ 12፥38-41)፤ የነነዌ ሰዎችን ንስሐም ንስሐ ባልገባችው እስራኤል ላይ ፍርድ እንደሆነ ይጠቅሳል።