Jonaeibü Khauang
Jona hatbü kho khei ho sanou ki. Haoei, seneibü Bou onoubü hoba amaibü hautila ka sepeibü che ki dogo ngeajinei ong satkei dogo thekukei, hoba hao sukojala ngekkei. Bulong cheei hao khua yeme kukei, yangei cheei kho souan apbei, hoba seneibü Bouei, haoei apienbü bulong che aila thounou müt hajar juongbü kibü sangnyu che toje juongbou ki dogo phekei.
4 1Lausikei khoei Jona aeibou maanga amaiko kikei, hoba hao aeibou khauangkei. 2Haoei seneibü Bou to welaukei, “Shangieda, O Abou, ngo toukei kü kaonyeka kijinei ngei laubü ho aying lo? Khoei ong ngo shaang Tarshish aeto satkei—aishanga nyi onoubü hoba sanoudambü Bou, khauangla maangyangsho, üeisanoua apsileko, hoba amaibü hautila ka maangpon sepeibü che ki dogo ngei ngeakei. 3Tou, O Abou, ngeibü langkei kü ka sunglangashi—aishanga ngo shanga langkei toje haibü maibou ki.”
4Hobaje seneibü Bouei laukei, “No ho tegü khauangbü tükde ki lo?”
5Jona sangnyu ka longan kho chaang aenei setkei; hoba khünei hao lolo shela che kümbei, hoba sangnyu to aila loushadla dogo chühla shanga kho yeme phanga setan kikei. 6Hobaje seneibü Bouei bulong che pienkei, hoba haoeibü khua yeme kubü hoba haoeibü khonsak solotila shanga, kho Jona thükto longtikei. Kheijinei bulong hangshong Jona maang yaangbou olinangko kikei. 7Nyibounyet ngeyang lange, seneibü Bouei bulong to komda yangei che pienkei, hoba bulong kho souan apbei. 8Ladang chanyu phaman kikei, seneibü Bouei souyaangbü chaangbou yei loutikei; hoba chanyuei Jona khua ngümbei, hao mangan shem shongko. Hoba hao haila shanga sukojako laukei, “Ngo shanga langkei toje haibü maibou ki.”
9Lausikei seneibü Bouei Jona to phekei, “No bulong shangabü khauangbü tükde ki lo?” Haoei laukei, “Tükde ki, ngo haila shongko khauangda.”
10Hobaje seneibü Bouei laukei, “Nyi aungan hoba aching, khüyou chenei longan khüyou chenei apbü bulong to nyi onoukei. 11Hobaje khüto mae ik si nanae ik janyinla athükbü müt 120,000 toje juong, hoba meisiau juong kibü, ho sangnyu yaangbü Ninevi to ngei onou akila lo?” a a v11 Ho lai kho seneibü Boueibü onou phebüei thonkei—kho Israel saabübü mütshuong shanga haoeibü maangpon lenenda. Jisuei Jona chalou sem hoba khüyou sem kibü kho, haololo langngaibü amaaphilabü che yingakei dogo lenkei (Matthew 12:38-41), hoba Ninevibü maangsepeibü kho, maang asepeibü Israel khulimbo matjembü che yingakei dogo lenkei.
