Yona Abufuw

Mmɔborohunu pɛpɛɛpɛ na Yona suroe. Ɔka sɛ esiane sɛ na onim sɛ yɛn Agya sesa n'adwene nti na oguanee, na ɔsrɛ sɛ ɔnwu. Afifide bi bɔ no sunsuma, sonson bi kum no, na yɛn Agya bisa sɛ adɛn nti na afifide a wanyɛ no nyin no som bo ma no sen kurow a nnipa mpempem wom.

Yɛn Agya kasa wɔ nkyekyɛmu ahorow 4, 9–11

Ti 4.

Nanso eyi haw Yona yiye, na ne bo fuw dennen. Ɔbɔɔ yɛn Agya mpae se, “Mesrɛ wo, Ao Agya, ɛnyɛ asɛm a mekae bere a na mewɔ me ankasa asase so no ni? Ɛno nti na mede ntɛm dwanee sɛ merekɔ Tarsis no. Na minim sɛ woyɛ Agya a wodom na wo yam hyehye, wo bo kyɛ fuw, wʼadɔe dɔɔso, na wusesa wʼadwene a womfa amanehunu mmra. Afei, yɛn Agya, mesrɛ wo, gye me nkwa fi me nsam. Owu ye ma me sen nkwa.”

Na yɛn Agya kae se, “Ɛfata sɛ wo bo fuw saa?”

Yona fii kuropɔn no mu kɔtenaa ne apuei fam. Ɔsii asese bi wɔ hɔ maa ne ho, na ɔtenaa ase wɔ ne nwini mu, twɛnee sɛ obehu nea ɛbɛto kuropɔn no. Na yɛn Agya hyehyɛɛ afifide bi maa enyin kɔɔ soro wɔ Yona atifi, sɛnea ɛbɛyɛ nwini ama ne ti na ayi ne haw afi hɔ. Enti Yona ani gyee afifide no ho yiye. Ade kyee no ahemadakye, yɛn Agya hyehyɛɛ sunsono bi ma ɛkaa afifide no, na afifide no woe. Bere a owia puei no, yɛn Agya maa apuei mframa a ɛhyew bɔe. Owia no bɔɔ Yona ti so kosii sɛ ne ho tɔɔ piri. Ɔsrɛe sɛ obewu se, “Ɛyɛ ma me sɛ mewu sen sɛ mɛtena nkwa mu.”

Nanso yɛn Agya bisaa Yona se, “Ɛfata sɛ wo bo fuw wɔ afifide no ho?” Ɔbuae se, “Ɛfata. Me bo afuw araa sɛ mepɛ sɛ mewu.”

Na yɛn Agya kae se, “Wo yam hyehyee wɔ afifide no ho, nea woanyɛ ho adwuma na woanhwɛ amma ennyin, nea efifii anadwo koro mu na ewuu anadwo koro mu no. Na ɛnsɛ sɛ me yam hyehye wɔ Ninewe, kuropɔn kɛse no, ho? Nnipa bɛboro mpem ɔha aduonu a wonhu wɔn nifa ne wɔn benkum ntam nsonsonoe wɔ mu, ne mmoa bebree nso.” ^a