Esekiẹli 2

2 ¹Ó sọ fún mi pé, “Ọmọ ènìyàn, dìde dúró lórí ẹsẹ̀ rẹ, èmi yóò sì bá ọ sọ̀rọ̀.” ^a a v1 Níhìn-ín, “ọmọ ènìyàn” wulẹ̀ túmọ̀ sí “abínikú” lásán—ó fi Esekiẹli hàn gẹ́gẹ́ bí ènìyàn ẹlẹgẹ́ tí ó dúró níwájú Ọlọ́run alààyè, kì í sì í ṣe orúkọ oyè ọba tí Jesu wá gbà fún ara rẹ̀ lẹ́yìn náà.

²Ẹ̀mí Baba wa wọ inú mi bí Baba wa ti ń sọ̀rọ̀, ó gbé mi dúró lórí ẹsẹ̀ mi, mo sì gbọ́ tí ó ń bá mi sọ̀rọ̀.

³Ó sọ fún mi pé, “Ọmọ ènìyàn, mò ń rán ọ sí àwọn ènìyàn Israẹli, àwọn orílẹ̀-èdè ọlọ̀tẹ̀ tí wọ́n ti ṣọ̀tẹ̀ sí mi. Àwọn àti àwọn baba wọn ti dẹ́ṣẹ̀ sí mi títí di òní yìí. ⁴Olójú líle àti onígbọ̀nràngandan ọkàn ni wọ́n. Mò ń rán ọ sí wọn, ìwọ yóò sì sọ fún wọn pé, ‘Èyí ni ohun tí Baba Olódùmarè wí.’ ⁵Yálà wọ́n gbọ́ tàbí wọ́n kọ̀—nítorí ilé ọlọ̀tẹ̀ ni wọ́n—wọn yóò mọ̀ pé wòlíì kan ti wà láàrin wọn. ⁶Ìwọ, ọmọ ènìyàn, má bẹ̀rù wọn tàbí ọ̀rọ̀ wọn, bí ó tilẹ̀ jẹ́ pé ẹ̀gún àti òṣùṣú wà pẹ̀lú rẹ, tí ìwọ sì ń gbé láàrin àwọn àkéekèe. Má bẹ̀rù ọ̀rọ̀ wọn, bẹ́ẹ̀ ni kí ojú wọn má ṣe dẹ́rù bà ọ, nítorí ilé ọlọ̀tẹ̀ ni wọ́n. ⁷Ìwọ gbọ́dọ̀ sọ ọ̀rọ̀ mi fún wọn, yálà wọ́n gbọ́ tàbí wọ́n kọ̀, nítorí ọlọ̀tẹ̀ ni wọ́n. ⁸Ṣùgbọ́n ìwọ, ọmọ ènìyàn, gbọ́ ohun tí mo sọ fún ọ. Má ṣọ̀tẹ̀ bí ilé ọlọ̀tẹ̀ náà. Ya ẹnu rẹ, kí o sì jẹ ohun tí mo fi fún ọ.”

⁹Mo wò ó, ọwọ́ kan sì nawọ́ sí mi, nínú rẹ̀ sì ni àkájọ ìwé kan wà. ¹⁰Ó tẹ́ ẹ sílẹ̀ níwájú mi; níwájú àti lẹ́yìn rẹ̀ ni a ti kọ ìpohùnréré ẹkún, ọ̀fọ̀, àti ègbé.