Daniẹli 12

12 ¹Ní àkókò náà, Mikaeli, ọmọ-aládé ńlá tí ń ṣọ́ àwọn ọmọ ènìyàn rẹ, yóò dìde. Ìpọ́njú yóò wà, irú rẹ̀ kò sí rí láti ìgbà tí àwọn orílẹ̀-èdè ti bẹ̀rẹ̀ títí di àkókò náà. Ní àkókò náà, a ó gba àwọn ènìyàn rẹ là—gbogbo àwọn tí a kọ orúkọ wọn sínú ìwé. ²Ọ̀pọ̀ àwọn tí ń sùn nínú erùpẹ̀ ilẹ̀ yóò jí—àwọn kan sí ìyè àìnípẹ̀kun, àwọn kan sí ìtìjú àti ẹ̀gàn àìnípẹ̀kun. ³Àwọn ọlọ́gbọ́n yóò tàn bí ìmọ́lẹ̀ ojú ọ̀run; àwọn tí ó yí ọ̀pọ̀ padà sí òdodo, yóò dàbí ìràwọ̀, láé àti láéláé. ⁴Ṣùgbọ́n ìwọ, Daniẹli, ti àwọn ọ̀rọ̀ wọ̀nyí pa, kí o sì fi èdìdì di ìwé náà títí di àkókò òpin. Ọ̀pọ̀ ni yóò máa rìn sókè sódò, ìmọ̀ yóò sì pọ̀ sí i.

⁵Nígbà náà, èmi, Daniẹli, mo wò, mo sì rí àwọn méjì mìíràn tí wọ́n dúró, ọ̀kan ní bèbè odò níhìn-ín, àti ọ̀kan ní bèbè kejì. ⁶Ọ̀kan sì béèrè lọ́wọ́ ọkùnrin tí ó wọ aṣọ ọ̀gbọ̀, tí ó wà lókè omi odò náà pé, “Yóò ti pẹ́ tó kí àwọn ìyanu wọ̀nyí tó parí?”

⁷Mo sì gbọ́ ọkùnrin tí ó wọ aṣọ ọ̀gbọ̀, tí ó wà lókè omi odò náà, tí ó gbé ọwọ́ ọ̀tún àti ọwọ́ òsì rẹ̀ sókè ọ̀run, tí ó sì búra fún Ẹni tí ń bẹ láéláé pé: fún àkókò kan, àwọn àkókò, àti ààbọ̀ àkókò; nígbà tí fífọ́ agbára àwọn ènìyàn mímọ́ bá parí, gbogbo nǹkan wọ̀nyí yóò parí. ^a a v7 Ẹni ayérayé tí a fi búra náà — Ẹni tí ń bẹ láéláé — ni Baba wa, orísun àti òpin gbogbo ìran-ìran.

⁸Mo gbọ́, ṣùgbọ́n n kò yé e, nítorí náà mo wí pé, “Olúwa mi, kí ni yóò jẹ́ òpin àwọn nǹkan wọ̀nyí?”

⁹Ó sì wí pé, “Máa lọ, Daniẹli, nítorí a ti ti àwọn ọ̀rọ̀ náà pa, a sì fi èdìdì dì wọ́n títí di àkókò òpin. ¹⁰Ọ̀pọ̀ ni a ó wẹ̀ mọ́, tí a ó sọ di funfun, tí a ó sì tún dà; àwọn ìkà yóò sì máa hu ìwà búburú. Kò sí ọ̀kan nínú àwọn ìkà tí yóò ní òye, ṣùgbọ́n àwọn ọlọ́gbọ́n yóò ní òye.

¹¹Láti àkókò tí a bá mú ẹbọ ojoojúmọ́ kúrò, tí a sì gbé ohun ìríra tí ń fa ìsọdahoro kalẹ̀, ọjọ́ 1,290 ni yóò wà. ¹²Ìbùkún ni fún ẹni tí ó bá dúró, tí ó sì dé ọjọ́ 1,335 náà.

¹³Ṣùgbọ́n ìwọ, máa lọ títí dé òpin. Ìwọ yóò sinmi, nígbà náà ìwọ yóò dìde fún ogún rẹ ní òpin àwọn ọjọ́ náà.”