Pwomès Papa a pou moun pa l yo

Mikayèl leve nan yon tan malè ki pa janm genyen parèy li, epi moun ki t ap dòmi yo leve — kèk pou lavi ki p ap janm fini, kèk pou wont. Danyèl mande pou konbyen tan epi yo di l sele liv la. Li pa janm jwenn repons li te vle a, sèlman sa: ale, repoze w, epi leve pou eritaj Papa w te pwomèt la.

Chapit 12.

Lè sa a, Michèl, gran chèf k'ap veye pitit pèp ou a, va kanpe. Va gen yon gwo lafliksyon pèsonn pa janm wè parèy li depi gen nasyon sou latè, jouk lè sa a. Lè sa a, pèp ou a—tout moun ki gen non yo ekri nan liv la—va delivre. Anpil moun k'ap dòmi nan pousyè tè a va reveye—gen ladan yo k'ap jwenn lavi etènèl, gen ladan yo k'ap jwenn wont ak mepri ki p'ap janm fini. Moun ki gen bon konprann yo va klere tankou limyè syèl la; moun ki mennen anpil lòt nan chemen ladwati a va klere tankou zetwal, pou tout tan gen tan. Men ou menm, Danyèl, fèmen pawòl sa yo, sele liv la jouk lè dènye tan an rive. Anpil moun va kouri ale vini toupatou, konesans va ogmante.

Apre sa, mwen menm Danyèl, mwen gade, mwen wè de lòt moun kanpe, youn sou chak bò rivyè a. Youn nan yo mande nonm ki te abiye ak twal fin blan an, ki te anwo dlo rivyè a: “Konbyen tan ki rete anvan mèvèy sa yo fini?”

Mwen tande nonm ki te abiye ak twal fin blan an, ki te anwo dlo rivyè a, li leve men dwat li ak men gòch li nan syèl la, li fè sèman sou non Sila a ki vivan pou tout tan an: pou yon tan, de tan, ak mwatye yon tan; lè pouvwa pèp ki apa pou Bondye a va fin kraze nèt, tout bagay sa yo va fini. ^a

Mwen tande, men mwen pa t' konprann, kifè mwen di: “Mèt mwen, ki jan tout bagay sa yo va fini?”

Li di: “Ale, Danyèl, paske pawòl yo fèmen, yo sele jouk lè dènye tan an rive. Anpil moun va netwaye, va blanchi, va pase nan dife pou yo pirifye; mechan yo va kontinye fè mechanste. Nan mechan yo, pa gen yonn k'ap konprann, men moun ki gen bon konprann yo va konprann.

Depi lè y'a wete ofrann bèt yo konn boule chak jou a, epi y'a plante bagay k'ap bay degoutans ki lakòz dezolasyon an: va gen 1.290 jou. Benediksyon pou moun ki tann, ki rive jouk nan 1.335 jou yo.

Men ou menm, ale jouk nan fen an. W'a poze kò ou, epi w'a leve kanpe pou resevwa pòsyon eritaj ou a lè dènye jou yo va rive.”