Nkwa Nna anyị nye ndị nke ya

Maịkel biliri n'oge nsogbu nke ọ dịghị nke yiri ya, ndị na-ehi ụra wee teta — ụfọdụ na ndụ ebighị ebi, ụfọdụ na ihere. Daniel jụrụ ruo ole mgbe, a gwakwara ya ka o kachie akwụkwọ ahụ. O nwetaghị azịza ọ chọrọ, kama naanị nke a: gawa ụzọ gị, zuo ike, ma bilie maka ihe nketa Nna gị kwere ná nkwa.

Isi 12.

Nʼoge ahụ, Maịkel, onyeisi ukwu ahụ na-eche ụmụ ndị gị nche, ga-ebili. A ga-enwe mkpagbu nke na-enweghị myiri ya kemgbe mba niile malitere, ruo mgbe ahụ. Nʼoge ahụ, a ga-anapụta ndị gị—ndị niile e dere aha ha nʼakwụkwọ ahụ. Ọtụtụ ndị na-ehi ụra nʼaja ụwa ga-eteta—ụfọdụ baa na ndụ ebighị ebi, ụfọdụ baa nʼihere na nlelị ebighị ebi. Ndị maara ihe ga-enwu dịka ìhè nke mbara eluigwe; ndị na-eme ka ọtụtụ chigharịa bata nʼezi omume ga-adịkwa ka kpakpando, ruo mgbe ebighị ebi. Ma gị, Daniel, mechie okwu ndị a, kaakwa akwụkwọ ahụ akara ruo oge ọgwụgwụ. Ọtụtụ ga-agagharị ebe a na ebe ahụ, ihe ọmụma ga-abawanyekwa.

Mgbe ahụ, mụ onwe m, Daniel, leliri anya hụ mmadụ abụọ ọzọ ka ha guzo, otu nʼotu akụkụ osimiri ahụ, nke ọzọ nʼakụkụ nke ọzọ. Otu nʼime ha jụrụ nwoke ahụ yi uwe ọcha linin, onye nọ nʼelu mmiri osimiri ahụ, sị, “Ruo ole mgbe ka ọrụ ebube ndị a ga-akwụsị?”

Anụrụ m nwoke ahụ yi uwe linin, onye nọ nʼelu mmiri osimiri ahụ, ka o weliri aka nri ya na aka ekpe ya elu chee ihu nʼeluigwe ṅụọ iyi site nʼaha Onye ahụ dị ndụ ruo mgbe ebighị ebi, sị: ruo otu oge, na oge abụọ, na ọkara oge; mgbe a kwụsịchara ịkụrisị ike ndị nsọ ahụ, ihe ndị a niile ga-emezukwa. ^a

Anụrụ m, ma aghọtaghị m, ya mere m jụrụ, sị, “Onyenwe m, gịnị ka ọgwụgwụ ihe ndị a ga-abụ?”

Ọ sịrị, “Laa, Daniel, nʼihi na e mechiela okwu ndị a, kaakwa ha akara ruo oge ọgwụgwụ ahụ. A ga-eme ka ọtụtụ dị ọcha, mee ka ha chaa ọcha, nụchaakwa ha; ma ndị ajọ omume ga-anọgide na-eme ihe ọjọọ. Ọ dịghị onye ọbụla nʼime ndị ajọ omume ga-aghọta, ma ndị maara ihe ga-aghọta.

Site nʼoge e wepụrụ àjà a na-achụ kwa ụbọchị, na oge e guzobere ihe arụ ahụ na-eweta ịtọgbọrọ nʼefu: ụbọchị dị otu puku, narị abụọ na iri itoolu (1,290). Ngọzi na-adịrị onye ahụ na-eche ma rute ụbọchị dị otu puku, narị atọ na iri atọ na ise (1,335).

Ma gị, gaa ruo ọgwụgwụ. Ị ga-ezu ike, mesịa guzoro ọtọ nʼihi ihe nketa gị na ngwụcha ụbọchị ndị ahụ.”