ዳንኤል 12 FHB Father's Heart Bible™

12 ¹በቲ ጊዜ እቲ ድማ ሚካኤል፥ እቲ ንደቂ ህዝብኻ ዝሕሉ ዓብዪ መስፍን ክትስእ እዩ። ህዝብታት ካብ ዝጅመሩ ክሳዕ ሽዑ ዘይተራእየ ዓይነት ፀበባ ክኸውን እዩ። በቲ ጊዜ እቲ ድማ ህዝብኻ፥ እቶም ኣብ መፅሓፍ ዝተፀሐፉ ዅሎም፥ ክድሕኑ እዮም። ²ኣብ ሓመድ ምድሪ ደቂሶም ዘለዉ ብዙሓት ክበራበሩ እዮም፤ ገሊኦም ናብ ናይ ዘለኣለም ህይወት፥ ገሊኦም ድማ ናብ ውርደትን ናይ ዘለኣለም ንዕቐትን። ³እቶም ጠቢባን ከም ብርሃን ሰማይ ከብርሁ እዮም፤ እቶም ንብዙሓት ናብ ፅድቂ ዝመልሱ ድማ፥ ከም ከዋኽብቲ ንዘለኣለመ ኣለም ክኾኑ እዮም። ⁴ንስኻ ግና ኦ ዳንኤል፥ ነዝ ቃላት እዚ ዕፆ፥ ነቲ መፅሓፍ ድማ ክሳዕ ጊዜ መወዳእታ ሕተሞ። ብዙሓት ንየን ነዘን ክመላለሱ እዮም፤ ፍልጠት ድማ ክበዝሕ እዩ።

⁵ሽዑ ኣነ ዳንኤል ጠመትኩ፤ ክልተ ኻልኦት ድማ ደው ኢሎም ርኣኹ፤ ሓደ በዝ ወሰን ፈለግ፥ እቲ ሓደ ድማ በቲ ሓደ ወሰን ፈለግ ነበረ። ⁶ሓደ ኸዓ ነቲ ኣብ ልዕሊ ማያት ፈለግ ዝነበረ፥ ብሃሪ ዝተኸድነ ሰብኣይ “እዝ ተኣምራት እዚ ክሳዕ መዓስ ክውዳእ እዩ?” ኢሉ ሓተቶ።

⁷ነቲ ኣብ ልዕሊ ማያት ፈለግ ዝነበረ፥ ብሃሪ ዝተኸድነ ሰብኣይ ሰማዕኹ፤ ንሱ ኸዓ የማናይ ኢዱን ፀጋማይ ኢዱን ናብ ሰማይ ኣልዒሉ፥ በቲ ንዘለኣለም ህያው ዝኾነ ከምዙይ ኢሉ መሓለ፦ ንሓደ ዘመን፥ ንዘመናት፥ ንፈረቓ ዘመንን እዩ፤ ሓይሊ እቲ ቅዱስ ህዝቢ ናይ ምብትታን ምስ ተወድአ ድማ፥ እዝ ኵሉ ነገር እዚ ክውዳእ እዩ። ^a a v7 እቲ ማሕላ ዝተመሓለሉ ዘለኣለማዊ፥ እቲ ንዘለኣለም ህያው ዝኾነ፥ እቲ ናይ ኵሉ ዘመናት መጀመርታን መወዳእታን ዝኾነ ኣቦና እዩ።

⁸ኣነ ድማ ሰማዕኹ፥ ግና ኣየስተውዓልኩን እሞ፥ “ጐይታይ፥ መወዳእታ እዝ ነገር እዚ እንታይ እዩ?” በልኩ።

⁹ንሱ ኸዓ ከምዙይ በለ፦ “ኦ ዳንኤል፥ ኪድ፤ እቲ ቃላት ክሳዕ ጊዜ መወዳእታ ተዓፅዩ ተሓቲሙን ኣሎ እሞ። ¹⁰ብዙሓት ክነፅሁን ክፀዓዱን ክፅረዩን እዮም፤ እቶም ሓጢኣተኛታት ግና ክፉእ ክገብሩ እዮም። ካብቶም ሓጢኣተኛታት ሓደ እኳ ኣየስተውዕልን እዩ፥ እቶም ጠቢባን ግና ከስተውዕሉ እዮም።

¹¹ካብቲ ናይ ዕለት መስዋእቲ ዝለዓለሉን እቲ ዘባድም ርዅሰት ዝተተኸለሉን ጊዜ፥ ሽሕን ክልተ ሚእትን ተስዓን መዓልቲ እዩ። ¹²እቲ ዝፅበ ናብ ሽሕን ሰለስተ ሚእትን ሰላሳን ሓሙሽተን መዓልቲ ዝበፅሕ ብፁእ እዩ።

¹³ንስኻ ግና ናብ መወዳእታ ኪድ። ክተዕርፍ ኢኻ፤ ሽዑ ኣብ መወዳእታ እተን መዓልቲታት ንርስትኻ ደው ክትብል ኢኻ።”